JAMES TAITO

O le ali’i lea o loo tuuaia i lona osofaia lea o se fale i Ottoville ma ave faagaoi le tele o oloa sa i totonu i le masina o Tesema 2014, ua molia nei e le malo i moliaga o le talepe fale ma le gaoi.

O le taeao ananafi na tula’i ai i lumao le fa’amasinoga maualuga le ali’i o James Taito ma ia teena ai moliaga fa’asaga ia te ia - e aofia ai moliaga mamafa e lua o le talepe fale ma le gaoi, faapea ai ma le moliaga mama e tasi o lona tu fua lea i le fale o le isi tagata.

E tusa ai ma fa’amaumauga a le fa’amasinoga o loo taua ai e fa’apea, o le mataupu lenei na tofu atu i le ofisa o leoleo i le aso 2 Tesema 2014, ina ua faila e le tina o le aiga sana tagi fa’asaga i lona fale na talepe e se tagata, ma ave fa’agaoi ai le tele o oloa e alu i le uila (electronics), lea e silia ma le $2,000 le tau aofa’i.

O se tasi o oloa sa gaoia i lenei osofaiga, o se laptop ua mae’a ona polokalame e le ulugalii e ana le fale, ma o le laptop lea sa mafai ona fesoasoani i le tau sailiina o le tagata sa ia osofaia le fale, ina ua maitauina e le ulugalii e ana le fale le la laptop o loo ola, ma, o loo fa’aaoga e se tagata le initaneti mai le masini laptop, ma fesiligia ai loa le kamupani telefoni a le BlueSky, ma latou fa’ailoa mai ai le igoa o le tagata e ana le initaneti sa fa’aaoga, ma mafai ai loa e leoleo ona maua le ali’i o Taito.

Ina ua sailia e leoleo le fale o Taito, sa latou maua ai le tele o mea totino sa ia gaoia mai i le fale o le ulugali’i na a’afia.

O lo o taofia pea Taito i le toese i Tafuna ina ua le mafai ona ia totogi le $10,000 ua fa’atulaga e le fa’amasinoga e totogi, e fa’atali ai le isi ana iloiloga lea ua fa’atulaga e faia i le fa’aiuga o le masina o Iulai.

FALEFATU ASI

O le aso Faraile o le vaiaso nei lea ua fa’atulaga e le fa’amasinoga maualuga, o le avanoa mulimuli lea mo le ali’i o Falefatu Asi e faailoa ai lana loia i luma o le fa’amasinoga, ao lei tuuina atu lana fa’asalaga.

Ua fa’afa ona tolopo le lauina o le fa’asalaga a le ali’i o Asi i luma o le fa’amasinoga, ona o le tau sailiina o sana loia fautua, i le mae’a ai lea ona ia fa’ate’a le tama’ita’i loia sa tula’i mo ia, le tama’ita’i loia ia Sharron Rancourt.

O le aso Faraile na te’a nei na fa’atulaga e lau ai le fa’asalaga a Asi, peita’i sa toe tolopo fo’i ina ua fa’ailoa e le ali’i lea i le fa’amasinoga, e lei maua lava sana loia e tula’i mo ia, ma fautuaina ai loa e le fa’amasinoga le ofisa o loia fautua e vaai pe le mafai ona latou fesoasoani i le mataupu a Asi.

O Asi na ta’usala e le fa’amasinoga i lona fesoasoani lea i isi alii e toalua i le osofaia o le faleoloa o le Gold Gonda i Fagaalu i le masina o Me 2014.

O lo o taofia pea Asi i le toese i Tafuna e fa’atali ai le aso Faraile nei lea ua fa’amoemoe e toe tula’i ai i luma o le fa’amasinoga.

TOLOPO FA’AMASINOGA AUTU O SOOSEMEA TINAE

Ua toe tolopo e le fa’amasinoga maualuga le fa’amasinoga autu a le ali’i o Soosemea Tinae, lea na fa’atulaga e faia i le vaiaso nei, ina ua fa’aalia e loia le tatau lea ona tolopo lenei mataupu, ona o ni isi o fa’amaumauga o loo mana’omia le fia tu’u fa’atasia ao lei fa’ataunu’uina le fa’amasinoga autu.

Na talia e le fa’amasinoga talosaga a loia ma toe tolopo ai loa le mataupu a Tinae seia aulia le aso 3 Novema 2015.

O Tinae, lea o lo o taofia pea i le toese i Tafuna i le taimi nei, o lo o tuuaia i moliaga o lona faia o uiga mataga faafeusuaiga i se tama’ita’i e talavou i lalo o le tulafono, atoa ai ma lona tagofia o ona itutinosa, e mafua mai i le fa’alavelave lea na ave ai le tamaitai na aafia i se vaega i Tafuna ae faia i ai uiga mataga e pei ona taua.

O loo tetee malosi Tinae i tuuaiga a le malo.