TAMIANO MINO

O le aso 23 Iuni 2015 lea ua toe tolopo i ai e le fa’amasinoga maualuga le aso e faia ai le fa’amasinoga autu a le ali’i ave taxi o Tamiano Mino, i le mae’a ai lea ona talia e le fa’amasinoga i le aso Faraile na te’a nei o se talosaga na fa’aulu e le loia a le malo, mo se avanoa e toe tolopo ai le fa’amasinoga autu, lea sa fa’atulaga e faia i le vaiaso fou.

Na taua e le loia mo le malo ia Tiffany Oldfield e fa’apea, o le tama’ita’i lea o lo o fa’amoemoe e avea ma molimau autu a le malo i lenei mataupu, o lo o i ai o ia i Hawaii i le taimi nei, sa malaga mo le gasegase a lona tina, e le gafatia ona toe fo’i mai o ia i le taimi tonu lea ua fa’atulaga e faia ai le fa’amasinoga.

Na vave ona fa’auilavea le loia a Mino ia Joel Shiver ma ia fa’aalia lona tete’e i le talosaga a le malo, ma ia fa’ailoa ai i le fa’amasinoga e fa’apea, ua sauni Mino ma lana itu e fa’ataunu’u lana fa’amasinoga autu i le vaiaso fou.

Na toe talosaga le malo i le fa’amasinoga e fa’apea, talu mai le ulua’i taimi na fa’atoa faila ai lenei mataupu ma fa’atulaga le aso e faia ai lona fa’amasasinoga autu, o le taimi muamua lava lenei ua talosaga ai le malo ina ia toe tolopo le fa’amasinoga, ona o se fa’alavelave le maalofia ua mafua ai ona malaga ese atu ma le atunu’u le molimau autu a le malo.

Ae na toe finau Shiver e fa’apea, ua 15 masina talu ona fa’atali Mino mo le fa’ataunu’uina o lana fa’amasinoga autu, ua le toe i ai fo’i se isi mea e ala ai ona toe taofia le fa’ataunu’uina loa le fa’amasinoga i le vaiaso fou.

Sa taua fo’i e Shiver e faapea, o le aso 13 o Aokuso 2013 na amata taofia mai ai Mino i le toese, ma ua umi tele fo’i ia masina.

Na fesili le ali’i fa’amasino sili lagolago o Lyle L. Richmond i le loia a le malo, pe le mafai ona fa’aaoga isi molimau o lo o taua i le latou lisi e avea ma molimau autu o lenei mataupu, peita’i na taua e le tama’ita’i loia ia Oldfield e fa’apea, e ui lava i le mau molimau o lo o i ai, e taua tele le auai o le molimau autu lea.

Sa ia fa’ailoa fo’i i le fa’amasinoga e fa’apea, afai e oo atu lava i le aso lea e lei fo’i mai lava le molimau autu, ona faila loa lea e le malo o se latou talosaga talafeagai.

O Mino o lo o tu’uaia e le malo i lona faia o uiga mataga i se tama’ita’i sa alu e momoli i lana taxi, atoa ai ma le moliaga o le gaoi, ona o tu’uaiga sa ia gaoia se tupe sa i le tino o lea tama’ita’i i le taimi na tula’i mai ai le fa’alavelave.

O lo o tete’e malosi le ua molia i tu’uaiga fa’asaga ia te ia, ma o lo o taofia pea o ia i le toese e fa’atali ai le aso o lana fa’amasinoga.

TOMASI FILO

E 12 masina lea ua poloaina e le fa’amasinoga fa’aitumalo le ali’i o Tomasi Filo, e le tatau ona ia toe tagofia ai le ‘ava malosi, pe toe tu vae ai fo’i i le nofoaga o lo o i ai le fale kalapu o le Bowling Alley, lea na taofia faapagota mai ai o ia e leoleo i le masina o Mati, ina ua ‘ona ma fa’atupu tupu vevesi solo ai.

Na fa’ailoa e le fa’amasinoga fa’aitumalo ia Filo i le vaiaso na te’a nei e fa’apea, e le o toe fiafia le fa’amasinoga e tu’u ni avanoa i tagata solitulafono latou te le manatu mamafa i poloaiga a le fa’amasinoga.

Na ta’usala e le fa’amasinoga Filo i le moliaga o le fa’aoolima i le tulaga tolu, ona o le faalavelave lea na ia tu’iina ai se ali’i sa tafao i totonu o le Bowling Alley, i le mae’a ai lea o se feeseeseaiga na tula’i mai i lo la va, ae ina ua taumafai alii leoleo po o le fale kalapu e fa’afilemu o ia, sa ia lafo i ai upu palauvale.

Ua poloaina fo’i o ia na te totogi le salatupe e $175 i totonu o le ulua’i 3 masina o lana nofovaavaaia.