FALEPUIPUI MO LE 20 MASINA LE ALII NA GAOIA LE ATO TUPE SA I AI $15,000

O se alii mai Tonga na tuuaia i le gaoia o se ato tupe a se fafine Asia sa i ai se tino i tupe e tusa ma le $15,000, ua poloaina e le faamasinoga e tuli sana 20 masina  i le toese i Tafuna, o se tasi lea o tuutuuga o lona nofovaavaaia mo le lima tausaga.  A mae’a lea, ua poloa’iina o ia e tu’ua le teritori mo lea lima tausaga.

O se tasi o itu sa mataina i le silasila a le faamasinoga ina ua fofogaina le faasalaga a Nesiasi Latu, o se alii mai Tonga na ulufale mai i se pemita e 30 aso i le tausaga e 1998, ma aumau faasolitulafono ai lava i le teritori seia oo mai i le taimi na ia faatinoina ai le solitulafono i le aso 25 Tesema 2010.

E ui i tulaga faaletonu o pepa nofomau a Latu, ae sa mafai ona faauu mai i se tasi o aoga maualuga a le atunuu, ona sa nofo o ia faatasi ma le pulelua o lea aoga maualuga.

I le tausaga e 2009 na molia ai Latu i le solitulafono o le tagofia o le ava malosi ae lei atoa le 21 tausaga, peitai na solofua e le malo lea moliaga, i lalo o se latou maliliega sa faia ma Latu, o le a ia tuua le teritori ona o tulaga faaletonu i ona pepa nofomau, ae ina ua maua e le ua molia lana tusi folau e toe fo’i atu ai i lona atunuu, sa le’i alu ese o ia ma le teritori.

O le ato tupe a le fafine Asia lea na gaoia e Latu, sa i totonu o le taavale.  Ma a’o faia se misa a le fafine Asia ma sana uo i totonu o le fale, ae se’i ai e Latu le ato tupe.  Na fa’aaoga e Latu se vaega o lea tupe e faatau ai meaai ma pia ma ana uo, ae o leisi vaega tupe sa ia tufatufaina i ana uo, e pei ona ta’ua i faamaumauga a le faamasinoga.

I faamaumauga a le faamasinoga o lo o taua ai e faapea, o se misa sa faia i le va o le fafine e ana le ato tupe ma sana uo i totonu o le fale, na tulai mai ai le faalavelave ina ua toe liliu mai le fafine Saina i lana ato sa i totonu o lana taavale, ua leai se mea.

E na o le $1,854.12 na mafai ona toe maua e leoleo mai ia Latu ma ni isi o ana uo, ma toe faafoi atu i le fafine e ana le ato.

O lo o taofia pea Latu i le toese i Tafuna i le taimi nei e tuli ai lona faasalaga ma le faamoemoe a maea, ona ia tuua lea o le teritori.

IOE VAISAGOTE I TUUAIGA A LE MALO

O le tamaitai lea na tuuaia e le malo i lona ave faagaoi o se vaega tupe e lata i le $5,000 mai teugatupe a le kamupani sa galue muamua ai, ua ia tautino i le faamasinoga maualuga e faamaonia tuuaiga faasaga ia te ia.

O Fuamoli Vaisagote na ulua’i tuuaia e le malo i le moliaga mamafa o lona ave faagaoi o se vaega tupe sa tuuina atu i lalo o lana vaavaaiga, ae i lalo o se maliliega sa latou sainia ma le malo ma talia e le faamasinoga, ua ia tali ioe ai i le moliaga feololo lea ua toe suia e le malo, o lona fesoasoani e faatino le solitulafono o le ave faagaoi o vaega tupe a le kamupani.

I le tali ioe ai o Vaisagote i le moliaga ua tausala ai o ia, sa ia tautino ai i le faamasinoga e faapea, i le taimi ao galue i le kamupani o le GHC Reid, sa ia ave faagaoi ai se vaega tupe e tusa ma le $4,850.10 mai totonu o se ato sa teu ai tupe a le kamupani.

Ua malamalama lelei le ua molia, e le mafai ona toe suia lana tali ioe ua tuuina atu i le faamasinoga, pe afai e tuuina mai se faaiuga a alii faamasino ae le tusa ai ma lona mana’o.

I faamaumauga a le faamasinoga o lo o taua ai e faapea, sa malie le ua molia na te toe totogiina le tupe a le kamupani sa ia faaaogaina, peitai e oo mai i le taimi nei, e na o le $110 le tupe ua maea ona ia toe totogiina i le kamupani.

O lo o taofia pea le ua molia i le toese i Tafuna e faatali ai le aso 24 Me lea ua faatulaga e lau ai lona faasalaga.