MAUA LE ALI’I NA TAU SAILIA E LEOLEO

O le ali’i e 55 tausaga le matua mai Nu’uuli, lea na tu’uaia i lona fa’ao’olima i lona to’alua i le po o le aso Faraile ua te’a, na tula’i i luma o le fa’amasinoga fa’aitumalo i le taeao ananafi ma ia teena ai tu’uaiga fa’asaga ia te ia, ina ua maua e leoleo o ia i le tuana’i aso e lua talu ona tau sailia o ia.

E le o fa’alauiloa e le Samoa News le suafa o le ali’i o lo o molia, ona o puipuia i le ono faigofie lea ona iloa atu ai ma le na a’afia i lenei mataupu.

O le mataupu lenei na tofu atu i le ofisa o leoleo i Tafuna, ina ua vili e se isi o aiga leoleo mo se fesoasoani. Na taunu’u leoleo i le fale ma latou iloa ai ua sola ese le ua molia, se’i vagana ai lona to’alua sa mafai ona alu ane ma talanoa ma leoleo, ma ia fa’amatalaina ai loa le mea atoa sa tupu.

Na taua e le tina i leoleo e fa’apea, pe tusa o le itula e 10:12 i le po o le aso Faraile na te’a nei, na tula’i mai ai le vevesi ina ua fo’i mai sa latou tafaoga ma lana fanau mai le Paka Liona i Tafuna sa fa’asavili ai.

E taunu’u atu le tina ma le fanau i le fale, ua ‘ona le ua molia ma amata loa ona ia ee i lona to’alua ma ote, soso’o ai lava ma lona fa’ao’olima loa ia te ia e ala i lona ta tu’i o ona foliga, a o fa’aaoga e le fafine ona lima e tali ai tu’i a lona to’alua.

Na vili e le tama teine a le uluali’i se tasi o a latou tausoga i Fagaima e logo i ai le mea sa tupu, ma vili ai loa e le tausoga lea leoleo mo se fesoasoani.

I le tuana’i ai o aso e lua talu ona tau sailia e leoleo le ua molia, sa ia maua ai loa o ia i lona fale i Nu’uuli i le po o le aso Sa na te’a nei, ma latou pu’e fa’apagota mai ai loa o ia ma taofia i le toese i Tafuna.

MEFI IE

O le ali’i e 39 tausaga mai Faleniu lea na laulau vavale solo ma pisapisao i totonu o le nu’u i le fa’aiuga o le vaiaso, ina ua ‘ona ma ia lu’i se isi ali’i la te fufusu, ua toe taofia nei i le toese i Tafuna e leai ma se tupe ua fa’atulaga e tatala ai o ia i tua, ina ua tula’i mo lana ulua’i iloiloga i luma o le fa’amasionga fa’aitumalo i le taeao ananafi.

O le po o le aso Faraile o le vaiaso na te’a nei, na tali atu ai leoleo i se valaau mai Faleniu ina ua manaomia se fesoasoani.

Na taua e le molimau i leoleo e faapea, na alu atu le ua molia ma lu’i lana uo la te fufusu, sosoo ai ma lona lafo atu o upu mataga i lana uo, ona toe tuua ai lea e le ua molia le nofoaga.

E lei umi ae toe fo’i atu le ua molia ma ni ali’i se to’afa, ona ia toe lu’iina fo’i lea o lana uo tama la te fusu ma lana fa’aupuga, o lea ua alu e aumai ana tama e puipuia o ia, ina ne’i tula’i mai se isi fa’alavelave ia te ia, o le taimi lea na fa’afeso’ota’i ai loa leoleo mo se fesoasoani, ma vaaia ai loa le tuua e le ua molia o le nofoaga ma alu ese ina ua fa’alogo ua vili leoleo.

Na teena e le ua molia le moliaga mama o le fa’atupu vevesi i nofoaga faitele ua tu’uaia ai o ia e le malo, ma ua toe fa’atulaga le isi ana iloiloga e toe faia i le vaiaso fou.

TAOFIA SE ALI’I NA TAUMAFAI OSOFA’I SE FALEOLOA

O le ali’i lea na taumafai e osofa’i se faleoloa i Iliili i le vaveao o le aso To’ona’i na te’a nei, ua tu’uaia nei e le malo i le moliaga mama o lona faia lea o ni gaioiga e save’u ai le nonofo filemu o tagata lautele, ma ua toe taofia nei o ia i le toese i Tafuna e aunoa ma se tupe ua fa’atulaga e tatala ai o ia i tua, i le mae’a ai lea o lana ulua’i iloiloga i le taeao ananafi i luma o le fa’amasinoga fa’aitumalo.

O tu’uaiga fa’asaga ia Ulafala Ha’aulu na afua mai i le fa’alavelave lea na tula’i mai i Iliili, ina ua logo e se molimau leoleo mo se fesoasoani, e uiga i se ali’i o lo o laulau vavale ma fai upu mataga i luma o le faleoloa, ma aga’i atu ai loa leoleo e tali i le valaau.

Na taunu’u leoleo i le nofoaga na tula’i mai ai le fa’alavelave, ma latou vaaia ai se ali’i o loo taofi mai e ni isi tagata i luma o le faleoloa, mulimuli ane fa’amaonia e leoleo, o le ali’i sa taofi e tagata o Ha’aulu.

Na taua e le pule o le faleoloa i leoleo e fa’apea, na te’i ina ua ia fa’alogo mai i le vaveao e i ai le tagata o lo o pao atu i luma o le faleoloa, e foliga mai o lo o taumafai e tatala le faitoto’a pito i luma, ma ia fa’afesoota’iina ai loa le ali’i latou te tuaoi mo se fesoasoani, ma vili ai loa e le tuaoi le ofisa o leoleo.

Na taua e se molimau i leoleo lona vaaia o Ha’aulu o lo o taumafai e ulufale i totonu o le faleoloa i se taimi o le vaveao, ae ina ua valaau atu i ai poo a ana mea o lo o tau fai, sa fai atu lima e le ua molia ia te ia e ta’u atu ai, soia le pisa.