TEENA TU’UAIGA FA’ASAGA IA FETA’I AULEAFE

Ua le fa’amaonia e le fa’amasinoga maualuga tu’uaiga a le malo fa’asaga ia Feta’i Auleafe, i lona le usitaia lea o tuutuuga o lana nofova’ava’aia, ina ua fa’ailoa e le loia a le malo i le fa’amasinoga i le aso Faraile na te’a nei, e le o mautinoa e le malo le tulaga o le mataupu o lo o tu’uaia ai Auleafe i luma o le fa’amasinoga fa’aitumalo.

O le aso Faraile na te’a nei na fa’atulaga e faia ai se ulua’i iloiloga o le mataupu a Auleafe, i le mae’a ai lea ona faila e le malo o se talosaga ina ia fa’aleaoga le nofovaavaaia a le ua molia.

Ae ina ua o o atu i le taimi o le iloiloga, sa fa’ailoa ai e le loia a le malo o Jessica Bargmann, le leai o ni mau e lagolago ai tu’uaiga fa’asaga i lenei mataupu, e le o mautinoa fo’i le tulaga o le mataupu o lo o tu’uaia ai Auleafe i luma o le fa’amasinoga fa’aitumalo.

O le taimi lea na fa’aulu ai loa e le ali’i loia fautua ia Douglas Fiaui le talosaga ina ia fa’aleaoga le iloiloga sa fuafua e faia mo lea mataupu, lea fo’i na talia e le fa’amasino sili ia Michael Kruse.

Na fa’ailoa e Kruse i le loia a le malo e fa’apea, e taua le fa’avae o talosaga i luga o mau e fa’amaonia, o faiga fa’avae ia e mulimulita’i i ai le fa’amasinoga i iloiloga fa’apitoa fa’apea.

TOE TOLOPO MATAUPU DET. IOANE PASELIO

O le aso 13 Mati, 2015 lea ua toe tolopo i ai e le fa’amasinoga fa’aitumalo le mataupu a le ali’i leoleo su’esu’e ia Det. Ioane Paselio, ina ua talia e le afioga i le ali’i fa’amasino ia Elvis P. Patea le talosaga a le itu tete’e, mo se isi lua vaiaso se’i fa’amae’a ai a latou su’esu’ega e tusa ai o mau fa’amaonia ua tauaao atu e le malo.

Na taua e le itu tete’e e fa’apea, talu ai le taua o fa’amaumauga o lo o fia maua e le latou itu, ua mafua ai ona ia talosagaina se isi lua vaiaso e toe tolopo ai lenei mataupu, lea fo’i na talia e Patea e aunoa ma se fa’atuiese i ai o le malo.

E tele moliaga mama o lo o tu’uaia ai e le malo ia Det. Paselio, e mafua mai i le fa’alavelave lea sa ia fa’ao’olima ai i le Leoleo Faitoto’a o le fale kalapu a le Evalani i Pago Pago ma lona uso, soso’o ai ma lona tu’iina o le tioata o le Fale Kalapu ma ta’e ai, ae fa’ai’u i lona savali i totonu o le ta’avale leoleo sa ia fa’aaogaina i le po lea ma aumai ai se fana ma fa’alala solo i tagata sa i ai, e pei ona taua i fa’amaumauga a le fa’amasinoga.

O lo o tumau pea le tete’e a Det. Paselio i tu’uaiga fa’asaga ia te ia, ma o lo o tumau pea fo’i tu’utu’uga o lo o tatala ai o ia i tua, e fa’atali ai le isi aso o lana iloiloga.

TOE MOLIA FO’I SIAOSI IEREMIA I LE FA’AMASINOGA

O le ali’i lea na fa’atoa magalo mai i tua i le amataga o le masina o Fepuari na te’a nei, ua toe taofia fo’i i le toese i Tafuna, ona o tu’uaiga i lona faia lea o se isi solitulafono, ma ua ia soli ai tuutuuga o ana nofovaavaaia i luma o le fa’amasinoga fa’aitumalo ma le fa’amasinoga maualuga.

Na taofia e leoleo ia Siaosi Ieremia i le po o le aso Tofi na te’a nei ina ua maua o ‘ona, ma toe taofia ai o ia i le toese i Tafuna.

Na fa’ailoa e le ali’i fa’amasino ia Elvis P. Patea ia Ieremia e fa’apea, e atagia mai i lana gaioiga lea ua mafua ai ona toe taofia o ia e leoleo, na te le i aoaoina se lesona aoga mai avanoa sa tu’uina muamua e le fa’amasinoga ia te ia.

“O le aso 3 Setema, 2014 na fa’asala ai oe i le toese i Tafuna mo le 6 masina e le fa’amasinoga maualuga, ae foliga mai o lea fa’atoa toe tatala mai oe i tua a o lea fo’i ua toe loka mai oe i le isi solitulafono”, o le saunoaga lea a Patea ia Ieremia, ma ia fa’atulaga ai loa le $500 e totogi ona fa’atoa mafai ona tatala le ua molia i tua, e fa’atali ai le isi ana iloiloga lea ua fa’atulaga e faia i le aso Tofi o le vaiaso nei.