FASI FA’AMO’AMO’A LONA TO’ALUA MAFUA I LE FU-A

O le alii lea na ia fasi fa’amo’amo’a si ona to’alua i le aso Lua na te’a nei i Pago Pago, sa ia fa’ailoa i leoleo, na mafua ona ia faia lea gaioiga ona o lona alofa fu-a i si ana manamea.

Na tofu atu i le ofisa o leoleo lenei mataupu ina ua vili e ni aiga tuaoi leoleo mo se fesoasoani, i le mae’a ai lea ona latou fa’alogoina o se fafine o lo o alaga mai i le fia ola mai totonu o le latou fale.

Na taunuu leoleo ma latou molimauina ai manu’a tuga i foliga o le fafine na a’afia, atoa ai ma unaoa i isi vaega o lona tino.

O le tina na a’afia o lo o ma’itaga o ia, peita’i e le i avea lea ma itu na taofia ai le fa’ao’olima i ai o lona to’alua, e pei ona taua e le fafine i leoleo.

E lua moliaga mama ua faila fa’asaga i le ali’i ua molia, ma le fa’amoemoe o le itu a le malo, e ono mafai ona latou faila ni isi moliaga fa’aopoopo fa’asaga ia te ia, pe a mae’a a latou su’esu’ega o lo o fa’agasolo fa’asaga i lenei mataupu.

Ua poloaina e le fa’amasinoga le ua molia ina ia saili se isi nofoaga e nofo ai mo le taimi nei, aua ne’i toe taumafai e fa’afeso’ota’i lona to’alua ma lana fanau, se’i vagana ua tu’uina atu se isi poloaiga a le fa’amasinoga.

MOLIA SE ALI’I FAIGALUEGA OFISA FEMALAGAAIGA FASI ‘AVA

O le alii faigaluega a le Ofisa o Femalagaaiga a le malo lea ua tu’uaia e le malo i lona fa’aaoga o se naifi e fa’aoolima ai i lona to’alua, ua fa’atulaga lana ulua’i iloiloga e faia i le masina fou o Fepuari, ina ua ia teena tu’uaiga fa’asaga ia te ia i le taeao ananafi.

O moliaga o lo o tu’uaia ai le ua molia e aofia ai moliaga mamafa e lua o le fa’ao’olima i le tulaga lua, fa’apea ai ma le moliaga mama e tasi o le fa’ao’olima i le tulaga tolu.

O tu’uaiga fa’asaga i le ali’i ua molia, na afua mai i se vevesi na tulai mai i le va o ia ma lona to’alua, e mafua mai i meaai e pei ona taua i fa’amaumauga a le fa’amasinoga, ma avea ai loa ma itu na ita ai le ua molia ma fa’asaga atu loa ua fasi lona to’alua, sosoo ai ma lona aapa atu i se naifi fai meaai ma taumafai e ta tui ai le fatafata o le fafine, peita’i na vave ona taofi e lana fanau e to’alua lana gaioiga sa fai.

E $15,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atalitali ai taualumaga o lana fa’amasinoga.

TETE’E TUITELELEAPAGA I TU’UAIGA A LE MALO

O le tagata faigaluega a le Matagaluega o Aoga a le malo lea o lo o tu’uaia i lona gaoia o le siaki a se faiaoga e silia i le $1,000 le aofa’i, ua fa’atulaga lana ulua’i iloiloga i luma o le fa’amasinoga maualuga i le masina fou o Fepuari, ina ua ia tula’i ma teena moliaga mamafa e lua o lo o tu’uaia ai o ia e le malo.

O moliaga e lua o lo o tu’uaia ai Selati Tuiteleleapaga e aofia ai le gaoi ma lona ave fa’agaoi o ni tupe sa tu’uina atu i lalo o lana va’ava’aiga.

O Tuiteleleapaga e galue i le aoga a Lupelele o se Failautusi, e pei ona taua i fa’amaumauga a le fa’amasinoga, ma o lo o taofia pea o ia i le toese i Tafuna i le taimi nei, ina ua le mafai ona ia totogi le $15,000 u fa’atulaga e le fa’amasinoga e tatala ai o ia i tua.