Ads by Google Ads by Google

Tala otooto o Fa’amasinoga

TOE MOLIA FO’I STERLIN FUGA

O le alii lea e le’i leva tele atu ona tatala i tua mai le toese i Tafuna, ina ua faamaonia e le Fa’amasinoga Maualuga moliaga sa tuuaia ai o ia, ua toe molia fo’i e le malo i isi moliaga fou e aafia ai se tamaitai.

O le faalavelave lea ua toe molia ai le alii o Sterlin Fuga, na tulai mai i luga o se pasi sa aga’i mai i Leone mo Fagatogo, ao malaga mai ai le tamaitai na aafia i lana galuega.  Na oso ai fo’i i luga ma Fuga mai le isi pitonuu o Leone, ma alu atu ua saofa’i faatasi ma le tamaitai o lo o aafia.

Sa faalogoina e le tamaitai lea le pipii atu o le tauau a le ua molia i lona tino, o lona vae foi ua faapipii atu, ma ua amata ai ona oso lona fefe, ina ua ia vaaia foliga o le alii lea, e ta uma ai pe’a.

Na taua e le tamaitai i leoleo lona taumafai e toe soso aga’i i le faamalama o le pasi, ina ia aua ai ne’i toe pipii ona tino ma le tino o le ua molia, peitai o le taimi lava e soso ai i le faamalama, o le taimi foi lea e soso atu ai le ua molia i ona tafatafa, ma taumafai e faapipii atu lona tino ia te ia.

Na i’u lava i le tago atu o le ua molia ua uu mai le lima o le tamaitai na aafia, ae taumafai e kisi atu i ai, peitai sa toso ese e le tamaitai lona lima. Na fai le ua molia i le tamaitai pe la te o la te lunch, ae sa tali le tamaitai e leai, o lea na ia ofo atu ai le $100 mo ia pe afai la te o la te aai, ae na musu le tamaitai, sa toe ofo atu e le ua molia le $1,000 i le tamaitai ae sa faaauau pea ona musu le tamaitai.

Na taua e le tamaitai i leoleo, o le taimi atoa lea na talanoa atu ai le ua molia ia te ia, e le gata sa fefe, ae ua le mautonu fo’i lona mafaufau.

Na uma le talatalanoa o le ua molia i le tamaitai lea i tupe, ae ua amata nei ona ia talatalanoa i ai e faatatau i feusuaiga (tulou). Fai mai le tamaitai na aafia, o taimi uma lava e talatalanoa atu ai le ua molia ia te ia, e oso ai lava ona fefe ma lona popole, aua e leai ma se isi o le pasese o le pasi o amanaia le mea o lo o tupu ia te ia ma le ua molia.

Ae ana le nonofo lava le toatele o le pasese i Faleniu ma luma o le Kolisi Tuufaatasi, na faatoa iloa atu e se alii sa i totonu o le pasi, gaioiga a le ua molia o lo o fai i le tamaitai, atoa ai ma lona vaaia o foliga fefe ma le popole o lea tamaitai, o lea na ia valaau atu ai loa e alu atu la te nonofo faatasi i le nofoa o lo o nofo ai.

E lei faailoa e le tamaitai na aafia le mataupu i leoleo i le taimi lea, ona o lo o naunau e fia vave alu i lana galuega, aemaise ai, sa faatali se’i talanoa muamua i le Masela o le Faamasinoga ia Michael Nix mo se avanoa e momoli ai o ia i le Ofisa o Leoleo mo le failaina lea o lana tagi.

O lo o molia e le malo Fuga i le moliaga o le faaoolima i le tulaga tolu, ona o lona taumafai lea e tagofia vaega o le tino o le tamaitai sa aafia, faatasi ai ma le moliaga o le save’uina lea o le filemu o tagata lautele.

E $300 le tupe lea ua faatulaga e le faamasinoga e totogi ona faatoa tatala lea o Fuga i tua, e faatalitali ai taualumaga o lana mataupu.

FAILA MALO MATAUPU LONA TOLU FAASAGA IA KATERINA SILIGA

O le taeao ananafi na faila ai e le malo le mataupu lona tolu faasaga i le tamaitai talavou lea o lo o tuuaia i lona ave faagaoi o tupe a tagata sa totogi atu mo a latou Inisiua, i luma o le Faamasinoga Faaitumalo.

O Katerina Siliga lea o lo o tuuaia i moliaga o le faaaoga faasolitulafono o tupe sa tuuina atu ia te ia, atoa ai ma le gaoi i mataupu e lua na mua’i faila e le malo, ua toe molia i le moliaga e tasi o lona faaaoga faasolitulafono lea o tupe sa tuu atu na te vaavaaia.

O lea moliaga na afua mai i se tagi na faila e se alii sa ia totogia le inisiua a lona tama ia Siliga, ao galue i le kamupani o le South Seas Insurance.

Na taua e le alii o lo o aafia i leoleo e faapea, sa ia totogia le $84.20 ia Siliga i masina taitasi, amata atu i le masina o Me 2011, peitai ina ua oo atu ia Aokuso 2011, sa faailoa atu e le ua molia ia te ia, ua sii i le $127.78 le tupe na te totogia i le masina, o lea foi na ia totogia le tupe lea seia oo mai ia Iuni 2012.

O le masina o Me 2012 na maliu ai le tama a le alii o lo o tagi, o lea na ia faafesootaia ai le ua molia e uiga i le inisiua a lona tama, peitai sa faailoa ane e le ula lea ia te ia, e tatau ona faaauau le totogia pea o le tupe i le masina, sei oo i le taimi latou te mauaina ai le kopi o le pepa maliu.

Na toe telefoni le alii o lo o tagi ia Siliga e faatatau i le inisiua a lona tama, ae sa faailoa ane i ai e le ua molia, o lana pule o lo o malaga i fafo, o lea na alu ai loa le ua molia i le Ofisa o le South Seas Insurance i le masina o Iulai 2012 ma fesili i ai i le inisiua a lona tama, ae faailoa ane i ai e se tagata faigaluega, e le o i ai ni faamaumauga o se Inisiua a lona tama i le latou ofisa, o lisiti foi sa tuu atu e le ua molia ia te ia, e le o ni lisiti ia o lo o faaaoga e le latou kamupani Inisiua.

Ina ua fesiligia e le alii o lo o tagi le ua molia e uiga i le Inisiua a lona tama, sa faatoese i ai le ua molia ma lana talosaga, ua uma ona la faaaoga ma lana uo e igoa ia Mili le tupe o lana Inisiua, ae afai ae taulia lana taavale o lo o tau faatau, ona ia toe totogiina atu lea o lana tupe.

Ina ua fesiligia e leoleo le ua molia i le toese ao taofia ai o ia, sa musu e fai sana faamatalaga, peitai i le masina na te’a nei o Oketopa, na toe telefoni ai le alii o lo o tagi i lenei mataupu i le ofisa o leoleo ma faailoa i ai e faapea, sa telefoni atu Siliga ia te ia mai le falepuipui i Tafuna, ma faatoese atu e tusa ai o le mea ua tupu, faatasi ai ma lana talosaga, e alu e ave i tua lana tagi, ae afai ae magalo mai tua, o le a ia toe totogi atoa atu lana tupe.

O lo o taofia pea Siliga i le falepuipui i Tafuna i le taimi nei, e faatalitali ai le aso lea ua toe tolopo i ai lana mataupu fou e pei ona toe tulai ai i luma o le Faamasinoga Faaitumalo, ae o isi mataupu e lua na ulua’i tuuaia ai o ia e le malo, ua maea ona tuuina atu i luma o le Faamasinoga Maualuga, ma ua faatulaga ai lana ulua’i iloiloga e faia lea i le masina fou.