LEVA’A LESULI

E na o le 6 masina lea ua poloaina e le fa’amasinoga maualuga e taofia ai Leva’a Lesuli i le toese i Tafuna, o se tasi lea o tuutuuga o lana nofovaavaaia, ina ua ta’usala o ia i le moliaga mamafa o le fa’ao’olima i le tulaga lua, e mafua mai i le fa’alavelave lea na ia fa’aaoga ai se fasi paipa u’amea e sasa ai le tua o le ali’i na a’afia ma manu’a ai o ia.

Na fa’atoese Lesuli i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia se’i toe to’i alu ai i tua e saili se galuega e tausi ai lona to’alua ma lana fanau.

Na taua e le ua molia i le fa’amasinoga, talu ai e a’afia lona to’alua i se gasegase fa’apitoa, o le mafua’aga lea e mana’omia lona alu e faigaluega e saili se tupe e tausi ai lona aiga. Sa ia faatoese foi i le alii na aafia ma lona aiga, ina ia alolofa ma faamagalo o ia.

Na faaluaina e le to’alua e le ua molia i lana molimau le talosaga a lona to’alua, mo se avanoa e toe tatala ai o ia i tua e saili sana galuega e tausi ai le la fanau. Na taua e le tina ma ona loimata i lana molimau, e na o lona to’alua lava e mafai ona faigaluega e maua ai se tupe e tausi ai o ia ma lana fanau.

Na tutu faatasi loia e finau i le faamasinoga ina ia faasala le ua molia i se faasalaga faanofovaavaaia, ina ia maua ai le avanoa e toe fo’i atu ai o ia i tua e saili se galuega e tausi ai lona aiga.

Ao le i tuuina atu le faasalaga a Lesuli, na saunoa le alii faamasino sili ia Michael Kruse e fa’apea, o le ua molia, o se ali’i e 36 tausaga le matua, na alu ma se fasi paipa u’amea i le fale o le isi aiga ma ia fa’ao’olima i le ali’i na a’afia ma manu’a ai o ia.

O le mea sa tupu e pei ona saunoa Kruse, na ita le ua molia ina ua alu atu le na aafia ma laulauvavale i le latou fale ma faia amioga e save’u ai le nonofo filemu ao momoe le ua molia ma lona aiga, ma avea ai loa ma itu na ita ai le ua molia ma ia faatinoina ai le solitulafono.

E talitonu le faamasinoga e pei ona saunoa Kruse, ana le faia e le alii na aafia nei gaioiga atonu e leai se fa’alavelave e tula’i mai i lea po, e le gata fo’i i lea, ua masani lelei le fa’amasinoga i le ali’i na a’afia ona o le fa’atele ona tula’i i luma o le fa’amasinoga i le tele o solitulafono na tu’uaia ai o ia.

E 5 tausaga na manatu le fa’amasinoga e taofia mo’i ai Lesuli i le falepuipui atoa ai ma lona totogiina o le salatupe e $1,000, peita’i ua manatu le fa’amasinoga o le a faamalumalu lona tuliina o le faasalaga faafalepuipui, ae o le a nofovaavaaia o ia mo le 5 tausaga i lalo o poloaiga e ao ona ia usitaia.

O ni isi o ia poloaiga e aofia ai lona tuliina o masina e 6 i le toese, a mae’a, ona saili lea o sana galuega e tausi ai lona aiga ma totogi ai lana salatupe e $1,000. Ua poloaina fo’i le ua molia na te totogi le pili o le falema’i a le ali’i na a’afia, ua faasa fo’i ona ia toe soli se tulafono.

LESALINA VUI

Ua talia e le fa’amasinoga maualuga se talosaga na toe fa’aulu e le tamaitai loia ia Karen Shelly o lo o tula’i mo Lesalina Vui, mo se poloaiga a le fa’amasinoga e fa’aitiitia ai le tupe ua fa’atulaga e tatala ai le ua molia i tua e fa’atali ai taualumaga o lana fa’amasinoga.

E $20,000 le tupe na faatulaga e le faamasinoga, peita’i na taua e lana loia i le faamasinoga e faapea, o le ua molia, e le gata o lo o i ai lana tama pepe e lei atoa se tausaga i le fale, ae o lo o ma’itaga fo’i o ia, e tatau lava ona maua se avanoa e nofo ai o ia i le fale e tausi lana pepa aemaise ai le mafutaga ma lona to’alua.

Na fa’ailoa fo’i e Shelly i ali’i fa’amasino e fa’apea, o le tamaitai lea na aafia i le solitulafono o lo o tuuaia ai Vui, o se tasi lava o lona aiga, ma ua mae’a ona toe teuteu le vevesi na tula’i mai i lo latou va, ua toe sologa lelei fo’i mea uma i totonu o le aiga i le taimi nei.

Na umi se taimi o iloilo e ali’i fa’amasino le talosaga, atoa ai ma siosiomaga uma o le mataupu e pei ona taofia ai Vui i le toese, ma talia ai loa le talosaga e faaitiitia le tupe taofia i le $5,000.

O Vui o lo o tuuaia i moliaga e aofia ai le talepe fale i le tulaga muamua, fa’aoolima i le tulaga lua ma le faaaoga faasolitulafono o se a’upega, ona o le fa’alavelave lea na ia ulufale fa’amalosi ai i totonu o le fale o le tina lea na a’afia i le amataga o le tausaga ma ia fa’aoolima ia te ia, e ala i lona faaaoga o se seleulu e oti ai lona ulu, sosoo ai ma lona faaaoga o se naifi e ta ai lona ulu, lea na manaomia ai filo e 8 e su’i ai le manu’a.

Na taua fo’i e le malo le faaaoga e le ua molia o se atigi fagu e sasa ai foliga o le tina na a’afia.

PESEFA TUIGAMALA

E 2 tausaga lea ua nofovaavaaia ai le alii o Pesefa Tuigamala i luma o le fa’amasinoga maualuga, i lalo o tuutuuga e ao ona ia usita’i i ai, o ni isi o ia tuutuuga e aofia ai le auai i ni aoaoga e fesoasoani ai i aafiaga o le ava malosi, fa’asa ona ia toe tagofia le ava malosi, fa’asa fo’i ona ia toe soli se tulafono.

Na tu’uaia Tuigamala i le fa’alavelave lea na la fa’aoolima ai ma le alii o Fernandez Euini i le ali’i na a’afia ma manu’a ai.

Na tuuaia e le malo ia Tuigamala i lona taofi lea o le ali’i na aafia ae fa’aoolima i ai Euini, e ala i lona fa’aaoga o se ma’a e tu’i ai le ulu ma i’u ina matapogia ai le na a’afia. O Tu’igamala na ta’usala i le moliaga mama o le inupia ae lei atoa le 21 tausaga.

Na tutu faatasi loia e finau i le faamasinoga ina ia faanofovaavaaia le ua molia, ae aua nei tuuina atu i ai se faasalaga faafalepuipui, lea fo’i na talia e le fa’amasinoga.