SEAFA SEAFA JR

E 6 aso lea ua fa’asala ai e le fa’amasinoga fa’aitumalo le ali’i o Seafa Seafa Jr, ina ua ta’usala o ia i le solitulafono mama o le fa’atupu vevesi i nofoaga faitele, o se tasi lea o tuutuuga o lana nofovaavaaia.

E ui o se solitulafono mama lea ua ta’usala ai Seafa Jr, peita’i i fa’amaumauga a le fa’amasinoga o lo o atagia mai ai, ua silia i le fa’alua ona tula’i le ua molia i ituaiga solitulafono faapenei, lea e a’afia ai le fa’atupu vevesi i nofoaga faitele atoa ai ma le tagofia o le ava malosi.

O se vevesi na tula’i mai ao faia se inugapia i le va o Seafa Jr ma ana uo, na tula’i mai ai se feeseeseaiga laititi, ma i’u ina laulau vavale ai le ua molia ma leoleoa, ao fa’alogologo aiga tuaoi, ma logo ai loa e ni molimau le ofisa o leoleo mo se fesoasoani.

Na fa’atoese le ua molia i le fa’amasinoga e tusa ai o lana solitulafono sa faia, ma ia talosagaina ai loa se isi avanoa mo ia, se’i fa’aauau ai pea ona mafuta i lona aiga ma tausi lona to’alua ma si ana fanau, e na o ia e faigaluega e maua mai ai tupe e tausi ai lana fanau, ae o lona toalua e le faigaluega.

Na finau le loia a le ua molia i le faamasinoga mo se faasalaga faanofovaavaaia mo Seafa Jr, ina ia maua ai le avanoa e mafuta ai pea i lona aiga, peita’i na finau le loia a le malo e talafeagai le tuu atu o se fa’asalaga fa’a falepuipui mo Seafa Jr, e aoaoina ai lona mafaufau, e le o le taimi muamua lea ua molia ai o ia i le tulafono.

E 6 masina na manatu le fa’amasinoga e faasala ai Seafa Jr i le toese i Tafuna, peita’i o le a fa’amalumalu lona tuliina o lea fa’asalaga, ae o le a nofovaavaaia o ia mo le 24 masina i lalo o tuutuuga e ao ona usita’i i ai.

O se tasi o tuutuuga e aofia ai lona tuliina o aso e 6 i le falepuipui i Tafuna, ae na o fa’aiuga o vaiaso e tuli ai lea fa’asalaga, lona uiga e tolu fa’aiuga o vaiaso.

O le itula e 5:00 i le afiafi o le aso Faraile nei lea ua poloaina e le faamasinoga e tatau ona taunu’u ai Seafa Jr i le toese mo le amata tuliina o lana faasalaga, ae toe tatala i tua i le aso Sa i le itula e 5:00.

Saunoa le afioga i le alii faamasino ia Fiti Sunia na iloiloina le fa’aiuga o le mataupu a le ua molia, o le faasalaga ua tuuina atu ia te ia, ia maua ai le avanoa e faaauau ai pea ona faigaluega ma tausi lona aiga.

“Ae aua nei galo ia te oe, e te toe solia loa se isi poloaiga a le faamasinoga, o le a le toe i ai loa se avanoa mo oe ae o le a taofia mo’i loa oe i le toese mo le 6 masina”, o le saunoaga lea a Sunia.

LAWRENCE SEVA’AETASI

O le ali’i talavou lea na tu’uaia i lona faiaiga i se tama’ita’i e laititi i lalo o le tulafono, ua ia ta’utino i luma o le fa’amasinoga maualuga i le vaiaso nei, e moni ma fa’amaoni tu’uaiga fa’asaga ia te ia.

E tolu moliaga na ulua’i tuuaia ai e le malo le susuga ia Lawrence Seva’aetasi, e aofia ai le faia o uiga mataga faafeusuaiga ma se tamaitai e laititi i lalo o le tulafono, tagofia o itutinosa o se tamaitai laititi, ma le faia o uiga mataga e ono lamatia ai le saogalemu o fanau laiti.

Ae i lalo o le maliliega na sainia e le ua molia ma le malo ma talia e le faamasinoga, ua ia tali ioe ai i le moliaga mamafa o le tagofia o itutinosa o se tamaitai laititi, ae solofua e le faamasinoga isi moliaga o lo o totoe.

I le tali ioe ai o Sevaaetasi i le moliaga e pei ona ta’usala ai o ia e le fa’amasinoga, sa ia tautino ai e fa’apea, i se taimi o le aso 3 Oketopa 2013 i Tula, sa ia tagofia ai itutinosa o se tamaitai e laititi i lalo o le tulafono.

I fa’amaumauga a le fa’amasinoga o lo o taua ai e faapea, o le aso 3 Oketopa 2013, na logo ai e se ulugalii le ofisa o leoleo i Fagaitua mo se fesoasoani, ona o se alii sa ia faia ni uiga mataga i le la tama teine e 14 tausaga le matua.

Na taua e le teineititi na aafia i leoleo e faapea, i le po na sosoo ma le aso na tula’i mai ai le fa’alavelave, na vili atu ai le ua molia ia te ia, ma fai atu e alu atu i le taeao e sosoo ai la te eva ae aua nei alu i le aoga.

I le taeao na sosoo ai ina ua usu le tamaitai na aafia i le aoga, sa lei alu i le aoga ae na faasasa’o i le fale a le ua molia i Tula ma la eva ai.

Na taua e le teineititi na aafia, ina ua la taunuu i totonu o le potu a le ua molia, sa faailoa atu e le ua molia ia te ia lona alofa moni ia te ia, atoa ai ma le fia avea o ia e fai ma ona to’alua i le lumana’i, ma o nei fa’aupuga uma na mafua ai ona ia talia le mana’o a le ua molia la te faiaiga.

O lo o taofia pea le ua molia i le toese e fa’atali ai le aso lea ua fa’atulaga e le fa’amasinoga e lau ai lana fa’asalaga.