PALEMIA SALANOA

O le aso Faraile na te’a nei na faia ai le poloaiga a le fa’amasino sili ia Michael Kruse, ina ia tuuina atu le mataupu a le susuga a Palemia Salanoa e fa’ataunuu le lauina o lona fa’asalaga i luma o le Fa’amasinoga o Aiga, Fualaau oona ma le ava malosi (FDA Court), ona o ni isi o vaega o lenei mataupu e le tatau ona iloiloina fa’alaua’itele ao fa’afofoga tagata lautele.

E ui na faatoese le ua molia e tusa ai o lana solitulafono, atoa ai ma lana talosagaina o se isi avanoa mo ia, aemaise ai o talosaga a loia faapea ai lona to’alua, peita’i ua faia le fa’aiuga a le faamasino sili e toe tolopo le lauina o le fa’asalaga a Salanoa seia aulia le masina fou.

Na taua e le to’alua a le alii ua molia lona manaomia tele o Salanoa i totonu o le aiga, e le gata i le tausiga o le la fanau e to’alima, ae fa’apea foi i le atina’eina o le la aiga.

E ui na finau le loia a Salanoa i le faamasinoga mo se faasalaga mama mo lia, peita’i na toe fa’amanatu e le loia sili lagolago a le malo ia Jessica Bargman isi faasalaga mama e pei o le faatupu vevesi i nofoaga faitele na ulua’i tu’uaia ai o ia e le malo i le 2005 ma le 2007.

O le fa’alavelave lea ua ta’usala ai Salanoa na afua mai ina ua fai tuliga a leoleo ma le ua molia ao i ai lana fanau laiti i totonu o le ta’avale.

O lo o taofia pea le ua molia i le toese e faatatali ai le aso lea ua faatulaga e lau ai lona fa’asalaga.

LEO PETELO

Ua solofua nei e le fa’amasinoga maualuga moliaga mamafa sa tu’uaia ai e le malo le ali’i o Leo Petelo, ina ua talia e le fa’amasinoga se talosaga na fa’aulu e le malo, ina ia solofua tuuaiga fa’asaga i le ua molia, ina ua manatu le malo e le mafai ona latou fa’amaonia tu’uaiga fa’asaga i le ua molia.

Na taua e le loia a le malo i le fa’amasinoga e fa’apea, talu ai le fete’ena’i ma le eseese o fa’amatalaga e fa’atatau i le mea moni sa tupu, ua manatu ai e le mafai ona latou fa’amaonia tu’uaiga fa’asaga ia Petelo.

O tu’uaiga fa’asaga ia Petelo na afua mai i le fa’alavelave lea na fai mai le malo sa ia taumafai ai e ave le $50 i le teineititi na a’afia pe afai e mafai ona la kisi.

O tuuaiga fa’asaga i le ua molia e aofia ai lona tagofia o itutinosa o le teineititi na a’afia atoa ai ma lona faia o ni uiga mataga fa’afeusuaiga.

NOFOVAAVAAIA LE ALII GAOI

E 12 masina lea ua nofovaavaaia ai se ali’i mai Tafuna na ta’usala e le fa’amasinoga faasolitulafono i le moliaga mama o le gaoi, ona o le faalavelave lea na ia gaoia ai ni oloa mai totonu o se faleoloa a se tamaloa mai Asia i le masina na te’a nei.

O oloa na gaoia faamalosi e Viliamu Tanielu e aofia ai ni apa meaai se lua e ta’i $2.15 i le apa ma ni fagu pia Vailima, lea na faatoa iloa e le pule o le faleoloa ina ua matamata i ata sa pu’eina e le masini pu’eata a le faleoloa i le isi po ma ia iloa ai, e i ai oloa na nana e le ua molia i le taga o lona ofu sa fai.

Na faatoese le ua molia e tusa ai o lana solitulafono, ma ia talosagaina ai se isi avanoa mo ia e faaauau ai pea ona mafuta ma lona aiga, lea fo’i na talia e le fa’amasinoga.

O isi tuutuuga o le nofovaavaaia e aofia ai le faasa lea ona ia toe soli se tuafono a le malo, ua fa’asa foi ona ia toe alu i totonu o le faleoloaa na tula’i mai ai le faalavelave, ae alu e saili sana galuega e toe totogi ai oloa sa ia ave faagaoi.