FALEPUIPUI SE TAMAITAI MO LE 60 ASO

E 60 aso lea ua poloaina e le fa’amasinoga fa’aitumalo e taofia ai i le falepuipui i Tafuna le tamaitai o Dianne Panapa, ina ua ta’usala o ia e le fa’amasinoga i le solitulafono mama o le fa’atupu vevesi i nofoaga faitele.

O lea fa’asalaga o lo o tuli fa’atasi ma isi fa’asalaga fa’afalepuipui, sa tu’uina atu e le fa’amasinoga i mataupu tau solitulafono e lua na ulua’i tu’uaia muamua ai o ia e le malo.

O le mataupu e pei ona fa’asala ai Panapa e le fa’amasinoga, na afua mai i le aso 10 Oketopa 2013 i le afioaga o Alao, ina ua la poloka ma se tasi o tamaitai le auala a le malo i ma’a, atoa ai ma lona alu ma se fasi paipa u’amea i le alii ave pasi na a’afia, ma avea ai ma itu na fefe ai le ave pasi ma ia faafesootaiina ai loa le Ofisa o Leoleo mo se fesoasoani.

Na taua e le alii ave pasi i leoleo e faapea, e toalua ni tamaitai ua la poloka le auala a le malo i Alao i ma’a, ma ua le mafai ai e lana pasi ona toe aga’i mai i le taulaga.

Na taua e le alii ave pasi e fa’apea, na te’i ina ua fo’i mai lana pasi mai Tula i le aso e pei ona taua, ae tau mai lana vaai i se pa maa o lo o poloka ai le auala, ae o le taimi foi lea o lo o talo talo atu le ua molima ma le isi tamaitai ia te ia e taofi lana pasi.

Ina ua latalata le pasi a le alii na aafia i le vaega o lo o i ai le pa maa, sa ee atu le ua molia ia te ia ma palau vale atu, ao ia uu se fasi u’amea i lona lima, ma o lo o aga’i atu ia te ia.

Na faasolomuli e le ave pasi lana pasi i tua ona o le popole i lona saogalemu atoa ai ma lana pasese o lo o i totonu o le pasi.

Na taunuu leoleo ma latou vaaia ai le ua molia ma le tamaitai na la toalua o lo o nofonofo mai i le faletalimalo, ma auina atu ai loa le ua molia i le ofisa mo suesuega.

Ina ua fesiligia Panapa e leoleo, sa ia ioeina ai lona polokaina o le auala i se pa maa, atoa ai ma lona alu ma se fasi paipa u’amea i le ave pasi, talu ai lona ita i lana tala sa lafo atu ia te ia.

Na finau le loia a Panapa i le faamasinoga mo se fa’asalaga faanofovaavaaia, ae ua lava aso e 5 na taofia ai le ua molia e avea ma ana fa’asalaga i lenei mataupu, peitai na finau le malo ina ia tuu i ai sina fa’asalaga faa falepuipui, ona o le matuia o le gaioiga sa ia faia.

E le gata ua fa’asala e le faamasinoga Panapa i le toese mo le 60 aso, ae ua poloaina fo’i o ia ina ia avea o ia ma tagatanuu lelei, i le taimi e magalo mai ai i tua. O le aso 29 Oketopa 2014 lea ua faatulaga e magalo mai ai Panapa i tua mai le toese i Tafuna.

TEENA FA’AMASINOGA TALOSAGA A HUNT

Ua teena e le Vaega Iloilo o le Fa’amasinoga Maualuga le talosaga na fa’aulu e Kalilimotu Hunt ma Tuputausi Hunt, mo se poloaiga a le fa’amasinoga e fa’aleaoga ai le tagi na fa’aulu e le Faletupe o Atina’e fa’asaga ia te i laua, e mafua mai i lo la le usitaia o tuutuuga o le fa’aaogaina o se vaega tupe fesoasoani mai le feterale, lea na faamatuu atu e fausia ai le la fale i lalo o se polokalame ‘Section 1602’.

O le mataupu lenei na tofu atu i luma o le fa’amasinoga, ona o se talosaga na faaulu e le Faletupe o Atina’e fa’asaga ia Hunt, ina ua la le tausisia tuutuuga o le polokalame e pei ona faamatuu atu ai le vaega tupe e $68,000 e fausia ai le la fale i Auto, i le polokalame mo tagata e maualalo le tamaoaiga.

Talu ai ua finau le faletupe ua le tausisia e Hunt tuutuuga o le polokalame, na talosagaina ai loa se poloaiga a le fa’amasinoga e fa’atonu ai Hunt ina ia toe totogi le tupe e $68,000, atoa ai ma tupe tului.

Na finau Hunt i le fa’amasinoga ina ia faaleaoga le tagi a le Faletupe, ona e leai se malosi o le Vaega Iloilo o le Fa’amasinoga e iloilo ai le mataupu lenei, se’i vagana ai le Vaega o Fanua ma Suafa, ona o le mataupu o lo o a’afia ai mataupu tau fanua.

Na taua e le Faletupe i lana tagi e fa’apea, o le aso 4 Novema 2010 na faamanuiaina ai Hunt i le vaega tupe e pei ona taua, ma tuu atu ai le maliliega ina ia mae’a le galuega i le aso 3 Novema 2011, e ui o aiaiga na tuu mai e le feterale mo galuega nei e tatau ona mae’a i le aso 31 Tesema 2012.

Na finau le Faletupe i le fa’amasinoga, e uma le tausaga e 2012 e lei maea le galuega a Hunt, o lea na tuu atu ai e le Faletupe le aso 3 Aokuso 2013 e tatau ona o o atu i ai ua mae’a le galuega, peitai ina ua toe asia le galuega i le masina o Fepuari 2014, e le i mae’a lava.

I le faaiuga a le faamasinoga na taua ai e fa’apea, e talitonu le fa’amasinoga o lo o i ai i le Vaega Iloilo o le Fa’amasinoga ona taulimaina le mataupu e pei ona talosagaina e le Faletupe, ona o mataupu ia o lo o aofia ai tagi mo vaega tupe e toe totogi atu e silia i le $15,000.

E talitonu foi le faamasinoga, o le mataupu lenei e le tatau ona tuuina atu e iloilo e le Vaega o Fanua ma Suafa o le Fa’amasinoga Maualuga, ma, o le talosaga a Hunt ua teena.

O le afioga i le faamasino sili lagolago ia Lyle L. Richmond na iloiloina le faaiuga, i lalo o le lagolago a le afioga i le alii faamasino lagolago ia Muasau T. Tofili.