FELIUAI LIU

Ua toe tolopo e le fa’amasinoga maualuga le tuuina atu o sana fa’aiuga fa’asaga i le alii o Feliuai Liu, sei fa’atali isi fa’amaumauga e fa’atatau i lenei alii o lo o i luma o le Fa’amasinoga Fa’aitumalo, ona fuafua ai loa lea o se fa’asalaga talafeagai mo ia.

Na faamatala e le alii faifeau na molimau mo Liu e fa’apea, o le ua molia, o se ali’i sa vaai maualuga i ai e tatau ona avea ma faifeau i le lumana’i, ona o le tele o agavaa ma taleni o lo o ia te ia, e pei o le mafai lea ona ia lauga ma a’oa’o le afioga a le Atua i le mafutaga a autalavou a le Ekalesia, aemaise ai o le tomai e mafai ai ona ia aoina siva ma faaevagalia fa’aleagaga mo tupulaga talavou.

O le aso Faraile na te’a nei na fa’atulaga e lau ai le fa’asalaga a Liu, ae ua toe tolopo ina ua fa’ailoa e le loia a le malo ia Tiffany Oldfield i luma o le fa’amasinoga e fa’apea, sa i ai le taimi na molia ai le ua molia i luma o le fa’amasinoga fa’aitumalo i le moliaga o le fa’atupu vevesi atoa ai ma le fa’ao’olima i le tulaga tolu.

Na fa’atoese Liu e tusa ai o lana solitulafono sa faia, ma ia tautino ai i le faamasinoga lona salamo moni e tusa ai o le mea sa tupu. Sa ia faatoese foi i le tamaitai na aafia i lana solitulafono atoa ai ma lona aiga, ina ia alolofa ma fa’amagalo o ia.

Na finau le loia a Liu ia Karen Shelly i le faamasinoga, mo se avanoa e tuu ia Liu e toe fuata’i ai lona olaga mai mea sese sa ia faia. Na taua fo’i e Shelly le salamo moni o le ua molia mai le solitulafono sa ia faia, ma ia fa’asala o ia i se fa’asalaga faanofovaavaaia, ae lava le umi lea ua uma ona ia tuliina i le toese e avea ma ona fa’asalaga i lenei mataupu.

Na taua e le loia a le malo ia Tiffany Oldfield i le fa’amasinoga e fa’apea, e ui ua salamo le ua molia e tusa ai o lana solitulafono sa faia, ae tatau foi ona silasila le fa’amasinoga i fa’amaumauga mai le fa’amasinoga faaitumalo, lea fo’i o lo o taua ai le molia o le ua molia i isi moliaga.

Na taua foi e Oldfield e fa’apea, afai fo’i ua finau le ua molia mo se isi avanoa mo ia, ae faafefea isi avanoa sa tuu atu muamua e le faamasinoga faaitumalo ina ua molia muamua o ia i luma o le fa’amasinoga.

Talu ai e le i aofia i le ripoti a le ofisa nofovaavaaia pe o nofovaavaaia pea le ua molia pe leai fo’i, na toe tolopo ai loa e le faamasinoga le lauina o le fa’asalaga a Liu, ae sei saili mai faamaumauga mo le mataupu na ulua’i tuuaia ai o ia.

TAVITA ARONA

O le vaiaso na te’a nei na faila ai e le malo le moliaga mamafa o le ave ta’avale ao se’i le laisene fa’asaga ia Tavita Arona, ona o le fa’alavelave lea ua tuuaia ai o ia i lona fa’afoeina o se ta’avale ao se’i lona lasene.

O le masina o Fepuari na se’i ai e le fa’amasinoga fa’aitumalo le laisene a Arona mo le umi e 12 masina, ina ua ta’usala o ia e le fa’amasinoga i le moliaga o le ave ta’avale ‘ona, ma fautuaina ai loa o ia e le fa’amasinoga, afai ae maua o ia fa’afoeina se ta’avale i luga o le auala, e ono mafai e le malo ona molia o ia i le moliaga mamafa o le ave ta’avale ao se’i le laisene.

Ae afai e fa’amaonia e le fa’amasinoga lea moliaga, e ono mafai ona fa’asala o ia i le toese mo le umi e le silia i le 5 tausaga, e aofia ai ma le fa’amalosia lea o lona tuli o aso e 90 e pei ona fa’atulaga mai i lalo o le tulafono.

O le masina na te’a nei ao tiute leoleo i se vaega o le alatele i Nuuuli, na maitauina ai se pikiapu lanu mumua o lo o alu atu i luga o le auala i se saoasaoa e le fa’atagaina i tulafono i luga o le auala.

Na taofi e leoleo le ta’avale ma fesiligia le ave ta’avale i le mafua’aga ua soona alu saoasaoa ai lana ta’avale mai maila e fa’atulaga i luga o le auala, ae ina ua fesiligia Arona mo lana laisene, na faatoese le ua molia i leoleo e tusa ai o lana gaioiga sa faia, atoa ai ma lona laisene o lo o se’i e le fa’amasinoga mo le 12 masina.

Na ioe Arona i le leoleo, o le masina o Fepuari 2015 e mae’a ai le umi o lo o se’i ai lona laisene ave ta’avale.

O le vaiaso fou lea ua fa’atulaga e toe valaau ai le mataupu a Arona i luma o le fa’amasinoga.