Ads by Google Ads by Google

Tala otooto o Fa’amasinoga

TU’UAIA SE ALII I LE FAIAIGA MA SE TEINEITITI 16 TAUSAGA

 

O moliaga ua tuuaia ai se alii e 26 tausaga e aofia ai le faiaiga ma se teineititi talavou; tagofia o itutinosa o se tamaitai e le’i faaipoipo i ai, atoa ai ma lona faia o ni gaioiga e ono lamatia ai le soifua o fanau e laiti i lalo o le tulafono.

 

O lenei mataupu na tofu atu i le Ofisa o Leoleo i le aso 5 o Fepuari 2013, ina ua faila e le tama matua o le tama’ita’i na aafia sana tagi faasaga i le ua molia, i lona faia o ni uiga mataga i lona afafine ma i’u ina ma’itaga ai o ia.

 

O lo o ta’ua i faamaumauga a le faamasinoga, le amata alia’e o lenei mataupu ia Aokuso 2012, i le 16 tausaga o le teineititi, ma na faafesootai ai e le tina o lenei tamaitai ia leoleo mo sa latou fesoasoani, peitai e le’i oo atu ni leoleo.  Na manatu le aiga e fofo i tua le mataupu ae na faamatala e le tama matua o le teineititi i leoleo e faapea, i le vaiaso muamua o Fepuari, sa la vaaia ai foliga ma’i o le tamaitai, ma la manatu ai e ave i le falema’i e vaai le foma’i, peitai o iina na faailoa atu ai e le foma’i ia te i laua, o le teine ua lima masina o lona ma’itaga.

 

Ina ua fesiligia e leoleo le tamaitai na aafia e tusa ai o lenei faalavelave, sa ia taua ai e faapea, o le masina o Ianuari 2012 na amata mai ai le la mafutaga ma le ua molia, ae na faatoa la faiaiga i le masina o Aperila 2012, o lona taimi muamua foi lea.

 

Pe faatasi i le masina ona mafuta le ua molia ma le tamaitai na aafia, peitai ina ua oo ia Setema 2012, na toeititi lava o la mafuta i po uma, ma o iina na iloa ai e le tamaitai na aafia o ia ua ma’itaga.

 

Na faamaonia e le ua molia, i leoleo mea uma lava sa faamatala e le tamaitai ua aafia.

 

O le taeao nei lea ua faamoemoe e tulai ai le ua molia i luma o le Faamasinoga Maualuga.  O lo o taofia pea o ia i le toese i Tafuna, ina ua le mafai ona totogi le $50,000 e tatala ai o ia i tua.

 

FALEPUIPUI JUBY KOLIO MO LE 7 TAUSAGA

 

O le alii lea na ia faia ni amioga mataga i se tamaititi e 11 tausaga le matua, ua faasala e le Faamasinoga Maualuga i le toese mo le 7 tausaga.

 

O Kolio na ulua’i tuuaia e le malo i le moliaga o le faia o uiga mataga i fanau laiti ma le moliaga feololo o le faia o uiga mataga i se isi alii, ae i lalo o se maliliega sa ia sainia ma le malo, na tali ioe ai le ua molia i le moliaga feololo ae solofua e le faamasinoga le moliaga mamafa.

 

O le faaiuga a le faamasinoga maualuga na tuuina mai i le vaiaso na te’a nei, ina ua maea ona faafofoga le faamasinoga i faafinauga a loia, atoa ai ma le faatoesega a le ua molia o Juby Kolio ma lona tina.

 

Na saunoa le alii faamasino sili ia Michael Kruse e faapea, o le gaioiga sa faia e Kolio i le tamaititi e 11 tausaga, o se gaioiga matuia ma mataga i le soifuaga faa Samoa.

 

Fai mai Kruse, o Kolio, o se alii mai Samoa ua leva ona nofo faasolitulafono i Tutuila nei e aunoa ma ni pepa nofomau, e le faigaluega, ae na o le taa solo e aunoa ma se mea lelei sa ia faia.  “E le aoga, e le faigaluega e matua leai lava se olaga lelei sa ola ai, lea fo’i ua faai’u i lona soli o le tulafono e pei ona tulai ai i luma o le faamasinoga i le taeao nei (taeao o le aso Faraile na te’a nei.),” o le saunoaga lea a le alii faamasino sili.

 

Na faaamuia Kruse ia Kolio, ina ua tele le avanoa ua ia maua mai se faasalaga e ono faasala atu ai o ia e le faamasinoga, ina ua malie le malo e solofua le moliaga pito mamafa sa ulua’i molia ai o ia, ae tali ioe i le isi moliaga feololo.

 

 Ua poloaina foi le lesitala o lona igoa i le lisi o i latou ua tausala i le faia o uiga mataga i fanau laiti, ma ia faia se suega i lona tino e iloa ai poo ia tauaveina le siama o le HIV.

 

Ua poloaina foi e Kruse le faapipii faatasi o le faaiuga a le faamasinoga ma se tusi mai i le Ofisa o Femalagaaiga, ina ia tuuina atu faatasi i luma o le Komiti Faafoe a le Ofisa o Femalagaaiga i le taimi e iloilo ai le fono a le ua molia mo ona pepa nofomau.

 

NOFOVAAVAAIA UNULOTO MOONIA MA SAMOA MATAAFA

 

O alii talavou ia na tausala i le talia o ni oloa sa ave faagaoi atoa ai ma le tagofia o le ava malosi ae le’i atoa le ta’i 21 tausaga le matutua, ua faamalumalu le la tuliina o se faasalaga faafalepuipui mai le faamasinoga faaitumalo, ae ua nofovaavaaia i laua mo le 2 tausaga i lalo o poloaiga a le faamasinoga.

 

O le alii o Unuloto Moonia na tausala i le moliaga mama o lona taliaina lea o ni oloa sa ave faagaoi e ni isi tagata, ma faasala ai e le faamasinoga e loka i le falepuipui mo le 120 aso, ae o Samoa Mataafa na tausala i moliaga mama e lua o le faatupu vevesi i nofoaga faitele atoa ai ma le tagofia o le ava ae le’i atoa le 21 tausaga, ma faasala ai e le faamasinoga i le 90 aso i le toese.

 

Ua faamalumalu le tuliina e i laua nei o la faasalaga faafalepuipui, ae ua nofovaavaaia i laua mo le 2 tausaga i lalo o poloaiga a le faamasinoga.

 

O ni isi o ia poloaiga e aofia ai le faasa lea ona la toe tagofia le ava malosi, faasa ona toe pipii i le au alii ia na aumai ai oloa gaoi, ma aua nei o la toe soli se tulafono a le malo.

 

E ta’i $200 salatupe ua tuu atu e le faamasinoga e totogi e Moonia ma Mataafa i totonu o le ulua’i 2 masina o le la nofovaavaaia, atoa ai ma le $50 lea ua poloaina Moonia na te toe totogi mo le tau o oloa gaoi lea na ia taliaina ma faaaoga.