FILOIALII MATAU

O le ali’i talavou mai Pago Pago lea na tuuaia e le malo i lona ulufale faamalosi i totonu o le Ofisa o le kamupani o le Tri Marine International ma ave faagaoi le sefe sa teu ai le silia i le $20,000 a le kamupani, ua ia ta’utino i luma o le fa’amasinoga e fa’amaonia tu’uaiga fa’asaga ia te ia.

I lalo o se maliliega na sainia e Filoialii Matau ma le malo, ua ia tali ioe ai i le moliaga mamafa o le talepe fale i le tulaga muamua, ae solofua e le fa’amasinoga isi moliaga mamafa e lua o lo o totoe ai i le pepa o tagi sa fa’aulu e le malo, le moliaga o le gaoi atoa ai ma lona ave faagaoi o ni mea sa tuuina atu i lalo o lana vaavaaiga.

I le tali ioe ai o Matau i le moliaga e pei ona tausala ai o ia, sa ia tautino ai e fa’apea, i se taimi o le masina o Iuni 2013, na ia ulufale fa’amalosi ai i totonu o le ofisa o le kamupani na a’afia, ma ia gaoia le sefe sa teu ai le tupe, ona ia ave lea o le tupe ma fa’aaoga ae tia’i le sefe i se auvai i tafatafa o le malae soka i Pago Pago.

Na fa’ailoa e sui o le kamupani i leoleo, e $41,000 le tupe sa i totonu o le sefe i le taimi mulimuli na la faitauina ai le tupe, peita’i na taua e Matau i leoleo ina ua fesiligia o ia, e $23,000 le tupe sa ia maua i totonu o le sefe.

O Matau sa avea ma leoleopo mo le kamupani a le Tri Marine, peita’i e tula’i mai le fa’alavelave e pei ona ta’usala ai o ia e le fa’amasinoga, ua atoa le vaiaso talu ona fa’amalolo o ia mai le galuega sa galue ai.

Na fa’aalu e Matau se vaega o le tupe na ia gaoiina mai e fa’atau ai ona lavalava ma teuga, atoa ai ma le totogiina o se ta’avale rental e fa’ati’eti’e ai lana uo teine ina ua faatoa fo’i mai i Niu Sila, o le tama’ita’i lava fo’i lea na ia ta’uina Matau i leoleo.

O lo o taofia pea le ua molia i le toese e fa’atali ai le aso 19 Setema lea ua faatulaga e lau ai lona faasalaga.

JASON LAFITAGA

O le vaiaso nei na faila ai e le malo le moliaga mamafa o le ave ta’avale ao se’i le laisene faasaga ia Jason Lafitaga, ina ua maua e leoleo o ia o lo o ia faafoeina se ta’avale i le masina na te’a nei, ae o lo o se’i lona laisene mo le 6 masina, ina ua ta’usala a le faamasinoga o ia i le moliaga o le ave ta’avale ‘ona.

Na taua i fa’amaumauga a le fa’amasinoga e fa’apea, na taumafai leoleo e tuli le taavale a le ua molia ina ua molimauina le alu saoasaoa, ma vaaia ai ua afe i se faleoloa i Tafuna e fai ai lana fa’atau.

Na mae’a le fa’atau ona toe savali mai lea o le ua molia ma toe oso i lana ta’avale ma alu ese atu loa, e le i umi ae taofi loa e leoleo o ia ma fesiligia i le mafua’aga o le alu saoasaoa o lana ta’avale, ae ina ua fesiligia i lana laisene, sa tali le ua molia ua leiloa lana laisene.

Mulimuli ane ina ua fesiligia pea o ia, sa ia tautino ai o lana laisene o lo o se’i mo le 6 masina.