APELU MOSE

Ua molia nei e le malo i luma o le faamasinoga le alii o Apelu Mose, ona o tuuaiga i lona umia faasolitulafono o ni vaega o le laau faasaina o le mariuana.

O se vevesi na tulai mai i le fale kalapu o le Country Club i Iliili lea na amata e Mose, na mafua ai loa ona aga’i atu leoleo e fofo le fa’afitauli, ae ina ua saili e leoleo le tino o le ua molia, sa maua i ai ni sikaleti mariuana.

I faamaumauga a le faamasinoga o lo o taua ai e faapea, na logo e se molimau le ofisa o leoleo mo se fesoasoani, ona o se vevesi na tulai mai i totonu o le fale kalapu o lo o aafia ai le ua molia.

Na faailoa e le molimau i leoleo e faapea, o amioga sa faia e le ua molia e aofia ai lona faalavelave i tagata tafafao i totonu o le fale kalapu, e aofia ai lona tago i se tamaitai ao taalo i le laulau piliaki.

Na taua foi e le molimau i leoleo le masalomia o Mose o lo o ia umia ni vaega o le laau faasaina o le mariuana, ona ua maitauina le faatele ona alu i fafo ma toe alu atu i totonu o le fale kalapu, e foliga mai o lo o alu e ula ana sikaleti mariuana.

Na taunuu leoleo ma latou vaaia ai Mose o lo o loka e leoleopo o le fale kalapu ona lima aga’i i se niu i fafo o le fale kalapu, ona latou tatala lea o ia ma amata loa a latou suesuega, ma maua ai e leoleo se afifi i le isi taga o lona ofu, o lo o i ai lau mamago o le mariuana.

Na toe su’e le isi ana taga ma maua i ai ni sikaleti mariuana se lua ua uma ona taai, ma logo ai loa le Vaega e Suesueina Fualaau faasaina a le Ofisa o Leoleo mo le suesueina atili o le mataupu.

Ina ua fesiligia e leoleo ia Mose, sa ia ioeina ai lona umia o mariuana, atoa ai ma lona ulaina o mariuana ao tafao ai i le fale kalapu.

Ua molia nei o ia i lona umia faasolitulafono o vaega o fualaau faasaina o le mariuana, atoa ai ma le moliaga mama o le faatupu vevesi i nofoaga faitele, ma o lo o taofia pea o ia i le toese i Tafuna, sei vagana ua ia totogi le $10,000 ona faatoa mafai lea ona tatala o ia i tua.

LEAI NI FA’ALAVELAVE MATUIA O LE  ‘LABOR DAY’

E leai ni fa’alavelave matuia na tutupu i le aso malolo o le Labor Day na sei mavae atu nei, e pei ona manino i mataupu tau solitulafono na faila e le Matagaluega o Leoleo i luma o le Fa’amasinoga Fa’aitumalo i le taeao ananafi.

Mai le to’a 11 o tagata na taofia e leoleo i le fa’aiuga o le vaiaso e aofia ai ma le aso malolo na mavae atu nei, o le to’alua o i latou nei ua molia i le ave ta’avale ‘ona ae to’a 9 o lo o tu’uaia i solitulafono eseese e aofia ai le fa’ao’olima mama faapea ai ma le fa’atupu vevesi i nofoaga faitele.

O le mataupu e pei ona tuuaia ai se ali’i talavou i le fa’ao’olima, na mafua mai ina ua ia fa’ao’olima i se isi ali’i la te aulotu fa’atasi, e mafua mai lava i ni vevesi na tutupu i totonu o le nu’u.

E to’alua isi ali’i na taofia mai e leoleo i Tafuna i le fa’aiuga o le vaiaso, ina ua onana ma fa’atupu vevesi solo i luga o le auala, ma avea ai ma itu e ono lamatia ai le saogalemu o tagata ma ta’avale feoa’i.

Na taua e se ali’i leoleo sinia e le i finagalo e fa’ailoa lona suafa, e leai ni fa’alavelave matuia e ono aafia ai se soifua o se tasi na tula’i mai i le fa’aiuga o le vaiaso.

O le taeao ananafi na tutula’i uma ai i latou nei i luma o le fa’amasinoga fa’aitumalo, ma o ni isi o i latou na toe tatala i tua e aunoa ma se tupe na fa’atulaga, ae o isi na faatulaga e le fa’amasinoga vaega tupe e tatala ai i latou i tua.