TETE’E APELU MOSE I TUUAIGA A LE MALO

O le masina fou lea ua fa’atulaga e faia ai le ulua’i iloiloga a le ali’i o Apelu Mose i luma o le fa’amasinoga maualuga, ina ua ia tula’i ma teena le moliaga o lona umia fa’asolitulafono o vaega o le fualaau fa’asaina o le mariuana, i luma o le ali’i fa’amasino sili ia Michael Kruse.

O tuuaiga faasaga ia Mose na afua mai ina ua alu e tafao i le fale kalapu o le Country Club i le fa’aiuga o le vaiaso i ona tua atu, ae tuuaia ai o ia i lona taumafai e fa’alavelave i tagata tafafo atoa ai ma lona taumafai e tago tago atu i se tamaitai i le vaega o lo o i ai laulau piliaki.

Na masalomia e leoleopo o le fale kalapu o le fa’aaoga e Mose o fualaau faasaina i le po lea, ona o le tele o taimi e alu ai i fafo ma toe fo’i atu i totonu o le fale kalapu. Ina ua saili e leoleo le tino o Mose sa maua i ai ni sikaleti mariuana ua uma ona taai, faapea ai ma se afifi o lo o i ai isi lau mariuana mamago.

O lo o taofia pea Mose i le falepuipui i Tafuna ina ua le mafai ona ia totogiina le $10,000 na fa’atulaga e tatala ai o ia i tua.

FAUTUAINA ALI’I E TO’ALUA E LE FA’AMASINOGA

Ua fautuaina e le fa’amasinoga maualuga i le taeao ananafi ni alii talavou se to’alua mai Aua, ia tausisi pea i lo la usitaia o poloaiga a le fa’amasinoga, e pei o le totogi lea o le ta’i $2,600 mo vaega o masini sa faaleagaina, ma aua nei la toe solia se tulafono a le malo i totonu o le 2 tausaga lea ua nofovaavaaia ai i laua.

O Billy Tusi ma Patrick Upusili na ta’usala i le moliaga o le faaleaga meatotino, e mafua mai i le faalavelave lea na la faaleagaina ai masini fai auala a le kamupani a le McDonnell Dowell i Aua i le tausaga na te’a nei.

O le ulua’i 6 masina o le la nofovaavaaia talu mai le masina o Novema 2013 na lau ai le la fa’asalaga, na poloaina ai e le fa’amasinoga le tatau lea ona mae’a ai ona totogi le tupe mo masini na faaleaga. Sa poloaina foi laua la te totogi salatupe ta’i $1,000. O le ripoti a le Ofisa Nofovaavaaia sa tuuina atu i luma o le faamasinoga ananafi, na manino ai le usitaia pea e alii talavou nei o poloaiga a le faamasinoga, ma fautuaina ai loa laua e le alii faamasino sili ia Michael Kruse ina ia tumau pea lo la usitaia o poloaiga ua tuuina atu ia te laua.

SOLOFUA MOLIAGA FA’ASAGA IA JOHNNY PATU

Ua talia e le fa’amasinoga maualuga le talosaga na faila e le malo, e solofua ai moliaga sa faia faasaga ia Johnny Patu, ina ua manino i fa’amaumauga a le malo ua maliu le susuga a Patu.

O le tamaitai loia ia Jessica Bargman na fai ma sui o le malo na te fa’aleoina le talosaga i luma o le fa’amasinoga ananafi, lea fo’i e le i tete’e i ai le loia a Patu, le susuga a Michael White.

Na tuuaia e le malo Patu i lona taliaina o ni oloa sa ave fa’agaoi e se isi tagata ma fa’atau atu ia te ia.