ARONA AMITUANA’I

O le aso 18 o Aokuso lea ua fa’atulaga e toe tula’i ai Arona Amituana’i i luma o le fa’amasinoga maualuga, i le mae’a ai lea ona ia teena o moliaga o lo o tu’uaia ai o ia e le malo, e mafua mai i ni mataupu eseese se lua ua faila fa’asaga ia te ia.

O le loia fautua a Amituana’i ia Michael White na fa’aleoina le tali tete’e a le ua molia i luma o le fa’amasinoga maualuga i le taeao ananafi.

O le mataupu muamua o lo o tuuaia ai e le malo ia Amituana’i i moliaga mamafa o le osofale i le tulaga lua, fa’ao’olima i le tulaga lua, faapea ai ma moliaga mama o le faaleaga meatotino, faaoolima i le tulaga tolu atoa ai ma le faatupu vevesi i nofoaga faitele.

Ae i le mataupu lona lua fa’asaga ia te ia, o lo o tuuaia ai o ia i le moliaga mamafa o le tete’e atu i leoleo ao taumafai e pu’e fa’apagota o ia, faaoolima i le tulaga tolu ma le faatupu vevesi i nofoaga faitele.

E $32,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala Amituana’i i tua mai le toese i Tafuna.

STEVEN TUPUOLA

Ua tuuaia nei e le malo le ali’i o Steven Tupuola i le moliaga o le fa’atupu vevesi nofoaga faitele, ona o le mataupu lea na ulufale fa’amalosi ai i totonu o le fale o se aiga ma ia taumafai e tago tago atu i ni ali’i se to’alua o lo o momoe, ma le faamoemoe e ono mafai e le malo ona faila ni isi moliaga fa’aopoopo fa’asaga ia te ia.

O le mataupu e pei ona tu’uaia ai Tupuola e le malo na alia’e mai ina ua logo e se aiga le ofisa o leoleo i Tafuna mo se fesoasoani, i se ali’i na ulufale fa’amalosi i totonu o le potu moe o lo o momoe ai ni ali’i se to’alua ma ia taumafai e tago tago i ogavae o le isi ali’i.

Na taua e le ali’i na a’afia i leoleo e fa’apea, na fa’ateia o ia ao momoe ma le isi ali’i i luga o le moega, ina ua ia fa’alogoina se tagata ua oso atu i luga o le la moega ma taoto i lo la va, ona tago tago atu lea o le tagata i lona ogavae, ona ia ala lea i luga ma fafagu le isi ali’i na la momoe fa’atasi e ki le moli o le potu.

Ina ua ki le moli, sa la vaaia ai Tupuola ua tu i luga ma oso aga’i i le fa’amalama o le potu ma tauanau laua latou te fusu, o le taimi lea na la tulioso atu ai loa ma pu’e Tupuola i lalo ma taofi ae vili e le isi tagata o le aiga leoleo mo se fesoasoani.

Na taunuu leoleo ma latou taofia faapagota ai Tupuola i totonu o le ta’avale, ae se’i tau fesiligia molimau e tusa ai o le fa’alavelave na tupu, ma tau pu’e ata o vaega o le fale na leaga i le taimi na ulufale faamalosi ai Tupuola i totonu o le potu, peita’i na fa’ateia leoleo ina ua valaau mai tagata o le aiga, o Tupuola ua sola i fafo ma le ta’avale a leoleo.

Na fai tuliga a leoleo ma Tupuola, ma maua mai ai e isi tagata o le aiga i tafatafa o le pa pua’a, ma toe taofia faapagota ai loa o ia ae auina atu i le ofisa o leoleo mo suesuega.

I totonu o le ta’avale a leoleo, na lu’i ai e Tupuola leoleo latou te fufusu, atoa ai ma lona folafola o le fasiotiina o tagata o le aiga na logoina le ofisa o leoleo i le mea sa tupu.

Na ‘ona le ua molia i le taimi na tula’i mai ai le fa’alavelave, e pei ona taua i fa’amaumauga a le fa’amasinoga.