FALEPUIPUI FITIAO MO LE 18 MASINA

E 18 masina lea ua fa’asala ai e le fa’amasinoga maualuga le ali’i o Fetaui Fitiao i le toese i Tafuna, o se tasi lea o tuutuuga o lana nofovaavaaia e 5 tausaga, ina ua ta’usala o ia i moliaga e lua o lona umia fa’asolitulafono o vaega o le fualaau fa’asaina o le mariuana, fa’apea ai ma le moliaga o le ave ta’avale ‘ona.

O moliaga e pei ona ta’usala ai e le fa’amasinoga ia Fitiao, na afua mai i le fa’alavelave lea na taofia ai e leoleo lana ta’avale ina ua masalomia o lo o ia fa’afoeina le ta’avale a o ‘ona, ae maua ai e leoleo ma sikaleti mariuana se 11 i totonu o le ta’avale.

O le itu e pito sili ona matuia ai le gaioiga sa faia e Fitiao i lea aso e pei ona taua e le loia a le malo ia Tony Graf, o le i ai lea o isi tagata sa ti’eti’e i tua o le pikiapu sa ia fa’afoe a o ia tagofia le ava malosi, o le fa’alua ai fo’i lea ona ta’usala o ia e le fa’amasinoga i le solitulafono lenei o le ave ta’avale ‘ona.

A o le i tu’uina atu e le fa’asalaga a le fa’amasinoga, na fa’atoese Fitiao e tusa ai o lana solitulafono sa faia, ma ia talosagaina ai se isi avanoa mo ia, se i toe fo’i atu ai e saili sana galuega e tausi ai lona aiga.

Sa ia fa’atoese fo’i i lona aiga, nu’u ma lana ekalesia, ina ua ta’uvalea i latou i le gaioiga sa ia faia. Na folafola fo’i e le ua molia i le fa’amasinoga, ua matua lagona lona salamo e tusa ai o lana solitulafono sa fai.

Na talosaga le loia a Fitiao ia Joel Shiver i le fa’amasinoga ina ia fa’asala le ua molia i se fa’asalaga nofovaavaaia, ina ia mafai ai ona maua le avanoa e alu ai i tua e saili sana galuega e tausi ai lona aiga, peita’i na finau le itu a le malo ina ia fa’asala le ua molia i le toese mo le 18 masina, lea fo’i na talia e le fa’amasinoga.

Saunoa le ali’i fa’amasino sili ia Michael Kruse i le taimi na lau ai le fa’asalaga a Fitiao e fa’apea, e foliga mai e le i maua e le ua molia se aoaoga mai le ulua’i taimi na ta’usala ai o ia e le fa’amasinoga fa’aitumalo i le ave ta’avale ‘ona.

“O le itu o lo o pito sili ona mata’utia i le silasila a le fa’amasinoga, e le gata o le fa’alua ai lea ona ta’usala oe i le ave ta’avale ‘ona, ae o lea fo’i sa e alu ma feavea’i tagata i tua o lau ta’avale, toe feavea’i atu ai ma mariuana”, o le saunoaga lea a Kruse.

O ni isi o ia tuutuuga o le faanofovaavaia e aofia ai lona tuliina o masina e 18 i le toese, totogi le salatupe e $500, fa’asa ona ia tagofia le ava malosi po o ni fualaau fa’asaina, fa’asa fo’i ona ia toe fa’afoeina se ta’avale i totonu o le 5 tausaga o lana nofovaavaaia.

LESALINA VUI

O le aso 15 Aokuso lea ua fa’atulaga e toe tula’i ai Lesalina Vui po o Linda Talimatasi fo’i e pei ona iloa ai o ia i luma o le fa’amasinoga maualuga, i le mae’a ai lea ona ia teena i moliaga mamafa e tolu ua tuuaia ai nei o ia e le malo, ona o le fa’alavelave lea na tula’i mai i le aso 21 o Iuni i  Malaeimi, lea o lo o tu’uaia ai o ia i lona ulufale fa’amalosi i totonu o le fale o le tina na a’afia ma ia fa’ao’olima ia te ia e fa’aaoga ai se seleulu ma se naifi.

Na fa’ailoa e le ali’i loia ia Michael White o lo o tula’i mo Vui le teena e le ua molia o tu’uaiga a le malo, ma ua toe taofia nei o ia i le toese sei vagana ua totogi le $20,000 ua fa’atulaga e le fa’amasinoga ona fa’atoa mafai lea ona tatala o ia i tua.

O le mataupu lenei na tofu atu i le ofisa o leoleo ina ua logo e le falema’i i Fagaalu leoleo mo se fesoasoani, ona o se tina sa auina atu i le falema’i mo se fesoasoani, ona o manu’a tuga sa a’afia ai lona ao.

Na taua e le tina na a’afia i leoleo e fa’apea, a o moe i lona fale, na te’i ina ua ulufale atu ni tamaitai se toalua i lona fale e aunoa ma se faatanaga ma la fa’aoolima ia te ia, e ala i le saofa’i o le ua molia i luga o lona fatafata ma ta tu’i ona foliga, sosoo ai ma le ooti o lona lau ulu i se seleulu, toe faaaoga le naifi e faaoolima ai ia te ia, ae o le isi tamaitai sa ia poina lana tama teine e 7 tausaga le matua.

TAAVILI PENIAMINA

E 12 masina lea ua nofovaavaaia ai le ali’i o Taavili Peniamina i luma o le fa’amasinoga fa’aitumalo, ina ua ta’usala o ia e le fa’amasinoga i le vaiaso na te’a nei i le solitulafono o le fa’aoolima i le tulaga tolu.

O se faalavelave na tulai mai i le Bowling Alley i le masina o Aperila na te’a nei, ina ua fa’aoolima Peniamina i se ali’i na la tau upu i fafo o le fale kalapu, ma molia ai loa o ia i le solitulafono e pei ona faasala ai o ia e le faamasinoga.

O ni isi o tuutuuga o le nofovaavaaia a le ua molia e aofia ai le faasa ona ia toe tagofia le ava malosi i totonu o le 12 masina, faasa ona ia toe ulufale i totonu o le Bowling Alley, fa’asa fo’i ona ia toe taumafai e fa’afesootai le ali’i na a’afia i lenei mataupu.

Ua poloaina foi o ia e le faamasinoga na te totogi le salatupe e $100 i le fa’amasinoga, ma ia auai i ni aoaoga e fesoasoani ai i le tulaga o le ita ma aafiaga o le ava malosi i lona olaga.

Na fa’ailoa e John Ward II ia Peniamina e fa’apea, e sili loa pe a taofi lona tagofia o le ava malosi i le taimi nei, manu e le i tula’i mai se isi fa’alavelave e ono a’afia ai lona saogalemu.