JAMES LATU

E 2 tausaga lea ua nofovaavaavia ai e le fa’amasinoga fa’aitumalo le ali’i o James Latu, ina ua ta’usala o ia i moliaga mama e lua o le fa’ao’olima i le tulaga tolu, ona o le fa’alavelave lea na ia fa’ao’olima ai i se ali’i sa la vevesi i ni taimi eseese se lua.

O taimi o ta’aloga a tupulaga i se pito nuu o Tafuna i se tasi afiafi i le masina o Aperila, na tula’i mai ai le vevesi i le va o Latu ma le ali’i na a’afia, mulimuli ane ina ua tuana’i le vaiaso e tasi, sa toe fa’aoolima fo’i Latu i le ali’i na a’afia, ma logo ai loa e le tina o le ali’i na a’afia leoleo mo se fesoasoani.

Na fa’ailoa e le ali’i fa’amasino ia Latu e fa’apea, e le tatau ona pulea e lona loto ita faaiuga na te faia, aemaise lava pe afai o se faaiuga e lamatia ai le saogalemu o se isi tagata po o ia fo’i, ae o se itu lelei, ona e le i manatu le ali’i na a’afia e tali atu i se isi auala malosi i ana gaioiga uma sa faia.

Na faatoese Latu e tusa ai o lana solitulafono sa faia, ma ia talosagaina ai se isi avanoa mo ia.

O ni isi o tuutuuga o le nofovaavaaia a Latu e aofia ai le aoga i ni aoaoga e fesoasoani ai i le ita, ma ia aua nei ona toe soliina se tulafono a le malo i totonu o le 2 tausaga o lana nofovaavaaia.

FA’ATULAGA ILOILOGA MO ISI MATAUPU 8 FALETUPE O ATINA’E

O le aso Faraile nei lea ua fa’atulaga e fofogaina ai isi mataupu e 8 i le va o le Faletupe o Atina’e a le malo, ma i latou sa fa’amanuiaina i le polokalame e fausia ai fale mautotogi mo i latou e maualalo le tamaoaiga, ina ua faila e le Faletupe o Atina’e sana tagi i le fa’amasinoga maualuga, e poloaina ai i latou nei ina ia toe totogi atu tupe i le polokalame, ina ua latou le tausisia aiaiga ma tu’utu’uga o le fa’aaogaina o ia tupe.

O le ulua’i taimi na fofogaina ai mataupu i le va o le Faletupe o Atina’e ma i latou o lo o faia fa’asaga i ai lenei tagi, sa fofogaina lea i luma o le ali’i fa’amasino sili ia Michael Kruse, peita’i o le vaiaso nei lea ua fa’atulaga e fofogaina ai i luma o le ali’i fa’amasino sili lagolago ia Lyle L. Richmond, ina ua manatu ia Kruse o le a fa’asee tuagalu mai lona iloiloina o nei mataupu, e mafua mai i le i ai lea o se la so’otaga ma se tasi o lo o a’afia i le tagi a le Faletupe o Atina’e, ina ne’i avea lea ma fete’enaiga i le taimi o le iloiloga.

O mataupu e 8 ua fa’atulaga e fofogaina i le aso Faraile nei mo le ulua’i iloiloga e aofia ai Dennis Ahoia; Maria Shimasaki; afioga i le ali’i senatoa ia Sao Nua; Leon Malauulu; Salamasina Schuster; Fred Ahoia ma Peleiupu Niko.