Ads by Google Ads by Google

Tala otooto o Fa’amasinoga

IOE MOTULIKI I TUUAIGA A LE MALO

 

Ua faamaonia e le alii o Wesley Motuliki, i luma o le faamasinoga tuuaiga faasaga ia te ia, i lona faia o ni uiga mataga i se teineititi 16 tausaga, lea ua i’u ina maitaga ai le tamaitai.

 

O lo o moliaga Motuliki i moliaga mamafa lua o le faiaiga ma se tamaitai 16 tausaga, tagofia o itutino sa, ma le moliaga mama o le faia o gaioiga e ono lamatia ai le saogalemu o fanau laiti, ae i lalo o le maliliega lea sa ia sainia ma le malo ma ua talia foi e le faamasinoga maualuga i le taeao ananafi, ua ia tali ioe ai i le moliaga o le tagofia lea o itutinosa o se tamaitai, ae solofua isi moliaga e lua o lo o totoe ai.

 

I le tali ioe ai o le ua molia i le moliaga e pei ona tausala ai o ia, sa ia tautino ai i le faamasinoga e faapea, i se taimi o le masina o Aokuso 2012, sa ia tagofia ai le itutinosa o le tamaitai na aafia.

 

Ua malamalama le ua molia, afai ae tuuina mai se faasalaga a le faamasinoga o ia ae le tau ai lona loto, e le mafai ona toe suia lana tali ioe ua tuuina atu i le faamasinoga.

 

O le mataupu lenei na tofu atu i le ofisa o leoleo ina ua faila e le grandfather o le tamaitai na aafia se tagi i le ofisa o leoleo, ina ua mautinoa ua ma’itaga lona afafine i le ua molia.

 

O le aso 31 Me lea ua faatulaga e lau ai le faasalaga a le faamasinoga mo Motuliki, lea o lo o taofia pea i le toese i Tafuna i le taimi nei.

 

FINAU E KAIO LANA MATAUPU I LE VAEGA ILOILO IUGA

 

O le aso 14 Ianuari 2014 lea ua faatulaga e faia ai le faamasinoga autu a le alii o Kaio Levao, ina ua finagalo le faamasino sili e le tatau ona toe tolopo iloiloga mo lenei mataupu e pei ona talosagaina e loia a itu e lua.

 

Ina ua valaau le mataupu a Levao i le vaiaso na tea nei, sa toe talosaga foi loia ina ia toe tolopo lenei mataupu mo se isi lua vaiaso, ae sei faagasolo talanoaga mo se maliliega aufaatasi.

 

O lo o tuuaia e le malo Levao i moliaga o le tagofia lea o itutinosa o se tamaitai e 19 tausaga le matua, i totonu ma fafo o le fale ata o le Talofa Video i Fagatogo i le tausaga na tea nei.

 

Ina ua fesiligia e leoleo le ua molia e uiga i lenei mataupu, sa ia faailoa i ai e faapea, sa faapea o ia e talafeagai lana gaioiga sa faia ina ua ia iloa e 19 tausaga o le tamaitai na aafia, faatoa maea foi ona fanau o ia.

 

O lo o taofia pea Levao i le toese i Tafuna ina ua le mafai ona ia totogiina le $10,000 sa faatulaga e tatala ai o ia.

 

TETE’E JOE MA McCLUSKY I TUUAIGA A LE MALO

 

Ua teena e le alii o Joe Faagata ma lona uso o McClusky Faagata Jr tuuaiga a le malo faasaga ia te i laua, ina ua la tutulai i luma o le faamasinoga maualuga i le vaiaso na tea nei.

 

I lo la teena ai o tuuaiga faasaga ia te i laua, ua faatulaga ai loa le la ulua’i iloiloga e faia lea i le masina o Aperila, lea foi ua faamoemoe e tatau ona oo atu i ai ua manino le tulaga e taoto i ai le la mataupu, i le faia lea o se maliliega ma le malo poo le faatulaga lea o se aso e faia ai le la faamasinoga autu.

 

O lo o tuuaia e le malo le auuso ua molia i le moliaga o le faaoolima i le tulaga lua, ona o le faalavelave lea na tulai mai i le aso 25 Fepuari i Fagatogo, lea o lo o tuuaia ai i laua i lo la faaoolima lea i ni alii ma manunu’a ai.

 

MIKAELE LOTU

 

O le alii lea o lo o tuuaia i lona faaaogaina o se naifi e faaoo ai manua i se tamaitai, ua faatulaga lana ulua’i iloiloga e faia i le masina o Aperila, ina ua ia teena moliaga o le faaoolima i le tulaga muamua, faaoolima i le tulaga tolu ma le faatupu vevesi i nofoaga faitele faasaga ia te ia.

 

O moliaga faasaga ia Mikaele Lotu na afua mai ina ua fai atu le tamaitai na manu’a e soia le soona pisapisao ua leva le afiafi, ae ita ai le ua molia ma faaoolima i le tamaitai na aafia, ma i’u ai loa i lona faaaogaina o se naifi e ta tui ai lona ua (tulou) e pei ona taua i faamaumauga a le faamasinoga.

 

O lo o taofia pea Lotu i le toese i Tafuna sei vagana ua ia totogiina le $50,000 ona faatoa mafai lea ona tatala o ia i tua mai le toese.