AMATA ALOAIA LE FAAMASINOGA AUTU O SITAU OFOIA JR

O le amataga o le vaiaso nei na amata aloaia ai le faamasinoga iloiloga a le alii o Sitau Ofoia Jr, i luma o le alii faamasino sili lagolago ia Lyle L. Richmond.

O lo o tuuaia Ofoia Jr i le moliaga mamafa o le taumafai e faaoo le oti i tagata, lua moliaga o le faaoolima i le tulaga muamua, faatupu vevesi i nofoaga faitele, o pepa sala e 4 i lona le usitaia o tulafono i luga o le alatele, atoa ai ma le moliaga o lona le faailoa i leoleo o le faalavelave sa tupu.

O moliaga o lo o tuuaia ai Ofoia Jr na afua mai i se faalavelave na manu’a ai se alii i Tafuna i le aso 8 o Aperila 2012, na maua atu e leoleo o taatia i luga o le auala e aga’i i le malae vaalele ua matapogia.

Na taua e molimau i leoleo na o latou vaaia o le so’a e le taavale a Ofoia Jr. le na aafia, lea o lo o taua i faamaumauga a le faamasinoga, o lona uso i le tulafono (brother-in-law).

Ina ua fesiligia e leoleo le ua molia e uiga i lenei mataupu sa ia taua e faapea, o lona taumafai e seu ese lana taavale mai le fetoai ma le isi taavale i luga o le alatele, ae ona so’aina ai le alii na aafia, peitai na faateia o ia ina ua alu atu e siaki ma ia iloa ai o lona brother-in-law lea o lo o manu’a.

O lo o tatala i tua Ofoia Jr mai le toese i Tafuna ina ua ia totogi le $100,000 sa faatulaga e le faamasinoga, e faatalitali ai taualumaga o lana faamasinoga iloilo lea ua amataina nei.

O molimau o le a valaau e le malo e aofia ai le alii leoleo suesue sa gafa ma le suesueina o lenei mataupu, le susuga ia Det. Sgt. Siliaivao Sea.

FALEPUIPUI SE ALII FILIPAINA MO LE 20 MASINA

O le alii mai Filipaina lea na tuuaia e le malo i le moliaga mamafa e lua o lona tagofia o itutinosa o se tamaitai, atoa ai ma lona tete’e atu i leoleo a’o taumafai e taofia faapagota o ia, ua poloaina e le Faamasinoga Maualuga ina ia taofia i le toese mo le 20 masina, o se tasi lea o tuutuuga o lana nofovaavaaia e 5 tausaga.

O Victor Liwan Tacloloy na tali ioe i le moliaga o le tete’e atu i leoleo ao taumafai e pu’e faapagota o ia, ae solofua e le faamasinoga le moliaga o lona tagofia o itutinosa o se tamaitai.  O lo o faamalumalu se faasalaga faa falepuipui mo le lima tausaga o lenei alii, ae ua faanofovaavaaia o ia i le umi lava e tasi, i lalo o tuutuuga a le faamasinoga.

I le tali ioe ai o Victor i le moliaga e pei ona tausala ai o ia, sa ia tautino ai i le faamasinoga e faapea, ao taumafai leoleo e pu’e faapagota o ia i le aso na tulai mai ai le faalavelave, sa ia tete’e ma taumafai e alu ese mai i leoleo.

O le tamaitai loia ia Mitzie Jessop na tulai mo le malo, ao le alii loia fautua ia Douglas Fiaui na tulai mo Victor.

FAATULAGA ASO O LE FAAMASINOGA AUTU O FIAPAPALAGI

O le aso 6 o Ianuari 2014 lea ua faatulaga e faia ai le faamasinoga autu o Fiapapalagi Eteuati Letuli, ina ua talia e le Faamasinoga Maualuga se talosaga a lana loia ia Matailupevao Leupolu Jr sa tuuina atu i luma o le faamasinoga maualuga i le vaiaso nei, mo se taimi e iloiloina ai se maliliega ua faaoo atu e le malo.

Afai e le talia e le ua molia le ofa a le malo, lona uiga o le a faatulaga loa le aso mo le faamasinoga autu o lenei mataupu.

 e tatau ona faatulaga loa se aso e ai le faamasinoga autu o lenei mataupu.

O Letuli o lo o tuuaia i moliaga mamafa e 16, lea e aofia ai moliaga e valu o le gaoi ma isi moliaga e valu o le faia o faamaumauga tau faasese, ona o tuuaiga i lona sainia faamalosi o siaki mai le Ofisa o le ‘American Samoa Economic Stimulus Recovery (ASESRO) sa tuuina atu i le igoa o le isi tagata faigaluega a le Ofisa.

O lo o tuuaia o ia i lona tuuina atu o pepa mo taimi faigaluega a Gale Clarke ina ia maua ai lona totogi, ao le taimi lea o lo o livi ai Clarke e le o faigaluega.

Mai le aso 14 Ianuari 2011 e oo atu i le aso 5 Aokuso 2011, e 8 siaki o lo o tuuaia e le malo na saini ma tala e le ua molia, i le aofai e $7,860.65