SIAUMAU SIAUMAU JR

Ua talosagaina e le ali’i loia fautua o lo o tula’i mo Siaumau Siaumau Jr ia Michael White le fa’amasinoga maualuga, ina ia taoto pea i luma o le fa’amasinoga se tasi o talosaga na fa’aulu e le loia na ulua’i tula’i mo Siaumau Jr i le mataupu lenei, atonu e mafai ona faia se fa’aiuga e fa’aleaoga ai lea talosaga, pe a o o i le taimi e valaau ai se vaega iloilo iuga latou te iloiloina se fa’aiuga o le mataupu fa’asaga i le ali’i o lo o molia.

O le vaiaso na te’a nei na toe valaau ai le mataupu a Siaumau Jr i luma o le fa’amasinoga, ona o se talosaga na fa’aulu e le ali’i loia ia Tautai Aviata Fa’alevao lea na avea muamua ma ana loia, ina ia suia se nofoaga e fa’ataunu’u ai le fa’amasinoga autu a Siaumau Jr.

Na taua e White e fa’apea, e le mafai ona iloa pe tatau ona sui le nofoaga e faataunuu ai le fa’amasinoga a Siaumau Jr, pe afai e le fesiligia muamua tagata iloilo iuga o le a valaauina e auai i le iloiloina o se fa’aiuga o lenei mataupu, ma fesiligia i ni o latou manatu e fa’atatau i le mataupu lenei.

“Afai loa e fesiligia le to’atele o i latou ae tali mai, ua fa’atele ona latou fa’alogo i ripoti e fa’atatau i lenei mataupu, ua tele fo’i taimi o latou faitau i nusipepa, fa’alogologo i le leitio e fa’atatau i le mataupu lenei, o iina e tatau ai loa i le fa’amasinoga ona silasila toto’a i le talia o le talosaga, e suia ai se isi nofoaga e fai ai le fa’amasinoga autu mo lenei mataupu”, o le saunoaga lea a White i le Samoa News e fa’amanino atili ai le uiga o le talosaga.

E to’a 7 ali’i leoleo na tiute i fafo o le fale fa’amasino maualuga i le aso Tofi na te’a nei, a o fa’agasolo ai le iloiloina o le mataupu a Siaumau Jr i luma o le ali’i fa’amasino o Lyle L. Richmond, fa’atoa toe i ai lava lea o ni leoleo e tiute i fafo o le fale fa’amasino i taimi e tula’i ai Siaumau Jr i luma o le fa’amasinoga, talu mai se taimi umi.

O Siaumau Jr o lo o tu’uaia i le fa’alavelave lea na tagatavaleina ai le ali’i leoleo o Det. Lt. Lusila Brown i luma o le fale fa’amasino le tumau i Fagatogo ia Iulai 2010, ma o lo o taofia pea o ia i le toese e aunoa ma se tupe ua fa’atulaga e tatala ai, e fa’atali ai le aso e faia ai lana fa’amasinoga autu.

MATAIMOANA ELISARA

O le ali’i e 52 tausaga le matua lea na fai lana toga laau mariuana i luga o le fanua o se ali’i Leoleo Sinia la te aiga, ua poloaina e le fa’amasinoga le taofia o ia i le toese i Tafuna mo le umi e 5 tausaga, ina ua manatu le fa’amasinoga, talu ai o le fa’alua lenei ona molia o ia i le ituaiga moliaga lava lenei e tasi, e atagia mai ai le leai o se lesona taua o ia a’oa’oina mai le ulua’i taimi na fa’asala ai o ia e le fa’amasinoga.

Na fa’atoese Elisara i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia sei toe fo’i atu ai i tua e tausi le latou aiga ma toe fa’aleleia vaega o lona olaga ua fa’aletonu.

Na taua fo’i e Elisara i le fa’amasinoga e fa’apea, “ua ou manatu e sili ai loa le tu’u o lo’u tagofia o mariuana, ae lelei pe a saili se isi lumana’i lelei mo a’u ma lo’u aiga”. Sa ia fa’ailoa fo’i i le fa’amasinoga e fa’apea, ua uma ona toe talia o ia e lona aiga, ma ua manana’o fo’i lona aiga ia te ia ina ia toe fo’i atu.

Talu ai ua taua e Elisara le tulaga o le aiga, na mafua ai loa ona fesiligia o ia e le ali’i fa’amasino sili ia Michael Kruse, po o aofia ai ma le ali’i Leoleo Sinia o Comdr. Sagapolutele i le aiga lea ua ia taua, na tali le ua molia “ioe”.

“O Comdr. Sagapolutele la lea na taua oe, ma mafua ai ona tula’i mai le mataupu lenei”, o le toe fesili atu lea a Kruse ia Elisara, ae na tali fo’i le ua molia, “ioe”.

E le i mana’o le loia a Elisara ia Michael White e finau i le fa’amasinoga mo se fa’asalaga mo le ua molia, e le i fanau fo’i le loia a le malo ia Tiffany Oldfield i le fa’amasinoga mo se fa’asalaga, ae sa ia manatu e taoto atu pea i se fa’aiuga a ali’i fa’amasino.

E le i atoa se minute na iloilo ai e ali’i fa’amasino la latou fa’aiuga ae maua, ma latou toe fo’i mai lea ma fofogaina i luma o le fa’amasinoga.

Na fa’ailoa e Kruse ia Elisara e fa’apea, “o le fa’alua lenei ona molia oe i le ituaiga moliaga lava lenei, ma e foliga mai i le silasila a le fa’amasinoga, e te le i aoaoina se lesona mai le ulua’i taimi na molia ai oe”.

Saunoa fo’i Kruse e fa’apea, “o se mea pito sili lenei ona le atamai ua e faia, o le toto o lau toga mariuana i le fanua o se ali’i Leoleo Sinia, lea ua i’u ina maua ai oe” ma ia poloaina ai loa le taofia o Elisara i le toese i Tafuna mo le 5 tausaga ma le totogiina o le salatupe e $5,000.

O afioga i ali’i fa’amasino lagolago ia Logoai Siaki ma Fa’amausil Pomele na fesoasoani i le iloiloina o se fa’aiuga mo lenei mataupu.

ETEUATI MISI

O le ali’i mai Samoa lea na poloaina e le fa’amasinoga fa’aitumalo i le aso Tofi na te’a nei, ina ia toe fo’i i lona atunu’u na sau ai mo le umi e tasi le tausaga, o se tasi lea o tuutuuga o lana nofovaavaaia e lua tausaga.

O Eteuati Misi, 34 tausaga mai Samoa na ta’usala i le moliaga mama o le fa’atupu vevesi i nofoaga faitele, e mafua mai i se vevesi na tula’i mai i se latou inugapia sa faia ma ni isi tagata i le po o le aso 24 Me, 2014.

Na taofia o ia e leoleo ina ua pisapisao, laulau vavale fa’apea ai ma lona lafo o upu tau fa’amata’u i le ulugali’i na latou vevesi, ae ina ua suesueina ma fesiligia o ia e leoleo, na iloa ai ua silia ma le 4 masina talu ona mae’a le aoga o le pemita 30 aso na malaga mai ai.

E $50 le salatupe ua fa’asala ai fo’i o ia e le fa’amasinoga, ma ua poloaina e le fa’amasinoga le malo, e saili le sponsor a le ali’i ua molia mo le totogiina o le salatupe.