NIKOLAO PESAMINO

A o le i tu’uina atu le fa’asalaga a le fa’amasinoga fa’aitumalo i le taeao ananafi fa’asaga i le susuga ia Nikolao Pesamino, ina ua ta’usala o ia i le moliaga mama o le fa’ao’olima i le tulaga tolu, sa fautuaina e le ali’i fa’amasino o John L. Ward II le ua molia, ina ia tausi le filemu i totonu o le nuu ma le aiga, ma aua nei toe tula’i mai se isi vevesi i le fanua lea sa tula’i mai ai le fa’alavelave e pei ona ta’usala ai o ia.

I lalo o se maliliega na sainia e Pesamino ma le malo, na tali ioe ai le ua molia i le moliaga mama o le fa’ao’olima i le tulaga tolu, ae solofua e le fa’amasinoga isi moliaga,

O tu’uaiga fa’asaga ia Pesamino na alia’e mai i se fa’alavelave na tula’i mai i le masina o Oketopa 2013, ina ua ia fa’ao’olima i le tagata na a’afia e mafua mai ona o se mataupu i le fanua.

Ina ua fesiligia e Ward le ua molia e uiga i le mea sa tupu, na taua ai e Pesamino e fa’apea, o le vevesi na tula’i mai ina ua ia fautuaina le tagata na a’afia e aua ne’i ona toe avatuina ni tagata ese i totonu o lona fanua o lo o nofo ai, ae lafo atu e le ali’i lea upu na tiga ai lona loto, o lea na ia tago atu ai ma eu ese lana mata tioata o lo o fai ae fai atu i ai e pupula sa’o atu ia te ia.

O le fanua e pei ona tula’i mai ai le vevesi lea ua i’u atu i le fa’amasinoga fa’aitumalo, o lo o i ai se fa’amasinoga i luma o le fa’amasinoga o Fanua ma Suafa o lo o fa’agasolo, e pei ona fa’amaonia e Pesamino i luma o le fa’amasinoga, ua mae’a fo’i ona tu’uina atu i ai le poloaiga a le fa’amasinoga i le aiga na a’afia ina ia aua ne’i toe fausia se fale pe toe tagofia se vaega o le fanua, ae le mafai lava le le fa’alogo o le aiga i le poloaiga a le fa’amasinoga, e pei ona fa’ailoa e Pesamino i le fa’amasinoga.

Sa fautuaina e Ward ia Pesamino e taofi le toe tula’i mai o ni isi vevesi i le fanua, ae taoto atu pea le mataupu i luma o le fa’amasinoga.

E 6 masina lea ua nofovaavaaia ai Pesamino i lalo o poloaiga a le fa’amasinoga e ao ona ia usita’i i ai, e aofia ai lona totogiina o le salatupe e $50 i totonu o le lua vaiaso, ma auai i ni aoaoga e fesoasoani ai i le ita.

JUN SUN PARK

O ananafi na faila ai e le malo moliaga fa’asaga i le ali’i o Jun Sun Park, ona o le fa’alavelave lea na tula’i mai i le aso 12 Fepuari 2014 i Satala, lea na ia fa’ao’olima ai i le ali’i na a’afia ma manu’a ai foliga o lea ali’i.

O moliaga faasaga ia Park e aofia ai le moliaga mamafa o le fa’ao’olima i le tulaga lua, faapea ai ma le moliaga mama o le fa’atupu vevesi i nofoaga faitele, ma ua toe tolopo lana mataupu e toe fofogaina i le aso Faraile o le vaiaso nei, o le aso lea ua fa’atulaga e faia ai lana ulua’i iloiloga mo lenei mataupu.

I faamaumauga a le faamasinoga o lo o taua ai e faapea, o le vevesi na tula’i mai i le va o le alii na aafia ma le ua molia, ina ua alu se la tafaoga i le Karaoke Bar i Satala i le aso 12 Fepuari, 2014, ina ua fautua atu le alii na aafia ia Park e fa’atatau i le ulaula tapa’a i totonu o le fale kalapu, ae na avea ma itu na ita ai le ua molia ma ia togiina ai le na aafia i le ipu sa inu ai lana ava malosi, ona sosoo ai loa lea ma lona oso atu ma ta tu’i le ua molia seia pau i lalo ma le nofoa.

A o ta’atia le na a’afia i lalo, sa aapa atu le ua molia i le fagu whisky ma ta ai lona ulu, ae na faaaoga e le alii na aafia ona lima e kava ai lona ulu, ma fula ai lona lima ina ua tau ai le fagu.

Na auina atu le ali’i na a’afia i le falema’i mo togafitiga, ona o manu’a sa a’afia ai lona tino e pei o le fula o lona laugutu, o ona sa fula uma aemaise ai maosia i ona tulivae.

Na fa’ailoa e ni molimau se to’alua i leoleo lo la vaaia o Park o ia fa’ao’olima i le ali’i na a’afia, e ala i lona togiina o ia i le ipu malamalama sa inu ai lana ava malosi, atoa ai ma lona ta tu’iina o ona foliga, ae na taua e le isi molimau lona vaaia o Park o ia taina le na a’afia i le fagu whisky.

E $5,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua.

Afai ae mafai ona tatala o ia i tua, ua poloaina o ia ina ia aua ne’i ona toe taumafai e fa’afeso’ota’i le ali’i o lo o a’afia i lenei mataupu, aua fo’i ne’i ona toe solia se tulafono.

O le ali’i loia ia Marcelus T. Uiagalelei o lo o tula’i mo le ua molia, ae o le tama’ita’i loia ia Lonalei Meredith o lo o tula’i mo le malo i lenei mataupu.

TETE’E TAMA NA FA’AO’OLIMA I LONA TO’ALUA

O le masina fou o Iuni lea ua fa’atulaga e faia ai le ulua’i iloiloga o le ali’i mai Pago Pago lea ua tu’uaia i lona fa’aaoga o se agaese e fa’ao’o ai ni manu’a i lona to’alua, ina ua ia teena le moliaga mamafa e tasi fa’asaga ia te ia i luma o le fa’amasinoga maualuga i le taeao ananafi.

Na taua e le loia a le malo i luma o le fa’amasinoga fa’aitumalo e fa’apea, e le matuia tele manu’a na a’afia ai le papatua o le fafine na a’afia i le agaese, o le mafuaaga lea ua manatu ai le malo e molia le tama o le aiga i le moliaga o le fa’ao’olima i le tulaga lua, e ui i le matuia o le a’upega sa ia fa’aaogaina e fa’atino ai le solitulafono.

O lo o taofia pea i le toese i Tafuna le ua molia ina ua le mafai ona ia totogiina le tupe e $10,000 na fa’atulaga e le fa’amasinoga e tatala ai o ia i tua, ae afai e mafai ona tatala o ia i tua, o se tasi o poloaiga e ao ona ia usita’i i ai, o le aua lea nei toe oo i le fale o lo o nonofo ai lona to’alua ma lana fanau, aua fo’i ne’i ona toe taumafai e fa’afeso’ota’i le fafine i so o se auala.