Ads by Google Ads by Google

Tala otooto o Fa’amasinoga

NOFOVAAVAAIA LE ALII NA FAAOOLIMA LONA TUAFAFINE MA LONA TOALUA

O le alii lea na togia le ulu o lona tuafafine ma lona tuia o le toalua o lona tuafafine, toe vaovao i ai le sapelu, ua poloa’ia e le Faamasinoga Faaitumalo, e tu’ua le teritori mo le tausaga e tasi.

Mai moliaga e tolu na ulua’i tuuaia ai e le malo Maua Lesoapule, o le aso ananafi na ia ioeina ai le moliaga e tasi o le faaoolima i le tulaga tolu, ae solofua isi moliaga e lua o le faaoolima i le tulaga tolu faapea ai ma le faatupu vevesi i totonu o lona aiga.

O le malaga a le vaa o le Lady Naomi i le vaiaso nei lea ua faamoemoe e tietie ai le ula lea i Apia.

O le vevesi na tulai mai i le taimi ao faia le umu a le aiga mo le faifeau i Seetaga, ina ua faateia le ulugalii na aafia a’o faia sa laua taugaupu, ua togi e Lesoapule  lona tuafafine i le ulu peitai na misi.

Na oso atu si tamaloa ma taumafai e faatoafilemu le vevesi ae faasaga atu Lesoapule ua tu’i ona foliga, ma faaauau ai lava ana fika i le vaovao ma le agaese i le toalua a lona tuafafine.

I luma o le faamasinoga ananafi, na faamaualalo ai Lesoapule i lona tuafafine ma lona toalua e tusa ai o le mea sa tupu. O lana tautinoga, o le a avea le mea ua tupu ma auala e aoaoina ai se lesona taua mo ia i le lumanai.

E 45 aso na manatu le faamasinoga e loka ai Maua i le falepuipui, peitai ua faamalumalu lona tulia o lea faasalaga, ae ua faanofovaavaaia o ia mo le 2 tausaga i lalo o poloaiga, e aofia ai lona tuua o le teritori, faasa ona toe tagofia le ava malosi po o fualaau faasaina, ma ia aua foi nei ona toe solia se tulafono ao i ai i le atunuu.

Na fautuaina foi e le faamasinoga le ua molia e faapea, afai ae maua ane o ia ua toe ulufale mai i le atunuu ae le’i atoa le tausaga lea ua poloaina o ia e toe foi ese ai, o le a toe taofia loa o ia ma molia i lona taumafai lea e ulufale faamalosi mai i le atunuu.

TETE’E FETA’I AULEAFE TUUAIGA MALO

Na teena e le alii o Feta’i Auleafe le moliaga e tasi ua tuuaia ai o ia e le malo, ina ua tulai i luma o le faamasinoga maualuga i le taeao ananafi. I lona teena ai o lea moliaga, ua faatulaga ai loa lana ulua’i iloiloga e faia lea i le masina fou, lea o le a iloa ai pe tuuina atu lana mataupu e faataunuu se faamasinoga autu, poo le faia fo lea o se maliliega ma le malo ma faamuta ai loa lana mataupu.

O le moliaga o le umia faasolitulafono lea o vaega o le pauta o le aisa o lo o tuuaia ai Auleafe, na afua mai ina ua maua e leoleo se tamai pepa iila o lo o i ai vaega o le aisa ia te ia i le vaiaso na te’a nei.

O lo o tuuaia foi o ia i lona faaulaula lea o ni tamaitai laiti se toalua i aisa.  E le o mafai ona tatala le ua molia i tua, sei vagana ua totogi le $50,000 sa faatulaga e le faamasinoga.

ILOILO FAAMASINO TALOSAGA A SE ALII PAGOTA

Ua taoto atu nei i se faaiuga a afioga i alii faamasino o le faamasinoga maualuga, le talosaga na faaulu e le alii pagota lea ua tuli lana faasalaga faafalepuipui i le faalavelave lea na ia taumafai e ave faamalosi lona toalua, ina ua ia talosaga i le faamasinoga maualuga i le taeao ananafi, mo se avanoa e toe faia ai se isi ana faamasinoga fou.

E le o mafai ona faalauiloa le suafa o lenei ona o puipuiga lava i le ono mafai ona iloa atu ai ma lona faletua o lo o aafia, peitai o le vaiaso na te’a nei na faasala ai e le faamasinoga o ia i le toese mo le umi e 7 tausaga, ina ua faamaonia e se vaega iloilo iuga moliaga e lua o le taumafai e ave faamalosi lona toalua, faapea ai ma lona taofia faapagota o lona toalua i se auala faasolitulafono.

E lua vaega o le talosaga na faaleo e le alii loia o lo o tofia e tulai mo le ua molia, ma o ia vaega e aofia ai le tulaga lea, e lei lava mau na tuu atu e le malo e lagolagoina ai moliaga ua tausalaina ai le ua molia.

Fai mai le alii loia, afai e manatu le faamasinoga o lo o lava mau sa lagolagoina ai moliaga faasaga i lenei alii, ona ia talosagaina lea o le faamasinoga ina ia toe faamama lana faasalaga faa falepuipui ua tuuina atu i le ua molia.

Ae i le faafinauga a le malo na taua ai e le tamaitai loia o Camille Philippe e faapea, sa lava mau na tuuina atu e le malo e lagolagoina ai moliaga ua tausalaina ai le ua molia.

O lo o taofia pea i le toese le ua molia mo le tuliina o lana faasalaga, e faatali ai se faaiuga a le faamasinoga i lana talosaga ua tuuina atu.