Ads by Google Ads by Google

Tala otooto o Fa’amasinoga

TOE FA’AFO’I LE ALI’I “OVERSTAYER” I SAMOA

O le itula e 4:30 i le afiafi ananafi na tuua ai e Faiga Samuelu le teritori mo Apia i lalo o se faatonuga a le Faamasinoga Faaitumalo, ina ua molia o ia i le tulafono, ae maua ifo, e ‘overstayer’.

O Samuelu, na loka e leoleo ina ua nofo ma fasi se tamaititi e 12 tausaga le matua i Faleniu i le vaiaso na te’a nei. ma e tasi le tausaga ua faatonu e le faamasinoga, e sa ona toe tuvae mai ai Samuelu i le teritori.

I se maliliega na sainia e Samuelu ma le malo, na ioe ai Samuelu i le moliaga mama o le faaoolima i le tulaga tolu, ae solofua le moliaga o le faatupu vevesi i nofoaga faitele.

Sa tautino Samuelu e faapea, i le afiafi o le aso 17 o Oketopa i le taimi o le vavao a le latou nuu i le afiafi, sa ia faatonuina ai ni alii laiti se toatolu e soia le taaalo, peitai sa le usita’i le alii na aafia, i lana faatonuga, o le mafuaaga lea na ia fasia ai ma vili ai e le tama o le tamaititi leoleo.

Na faatoese Samuelu i luma o le faamasinoga e tusa ai o le solitulafono sa ia faia, sa ia faatoese foi i le tamaitiiti na aafia ma lona aiga.

TOLOPO FAAMASINOGA AUTU O AARON WISDOM

O le aso 10 o Tesema lea ua toe faatulaga e le faamasinoga e faataunuu ai le faamasinoga autu a le alii o Aaron Wisdom, ina ua talia e le faamasinooga le talosaga a le malo ina ia toe tolopo le faamasinoga autu o lenei alii lea na faatulaga e faia i le aso 5 Novema.

Na taua e le loia a le malo o Cabel Poag e faapea, ua mafua le talosaga a le malo e tolopo le faamasinoga, ona o le vaiaso tonu lea o le palota a le atunuu, ae oo atu foi i le taimi lea e lei taunuu mai molimau faapitoa a le malo mai Kalefonia.

O Wisdom o lo o tuuaia i moliaga o le umia o fualaau faasaina, e afua mai i ni vaega o fualaau faasaina sa maua i totonu o fagu na aumai i se koneteina na aumai i lalo o lona igoa.

O le tamaitai loia ia Sharron Rancourt o lo o tulai mo Wisdom.

TETE’E ELIOTA SIAUMAU SR I TU’UAIGA MALO

Ua teena e Eliota Siaumau Sr le moliaga e tasi ua tuuaia ai o ia e le malo, ina ua tulai i luma o le Faamasinoga Maualuga i le vaiaso na te’a nei ma ua faatulaga ai loa lana ulua’i iloiloga.

O lo o molia Siaumau i se faalavelave na tupu i le falekalapu a le Taps i le po o le aso 15 o Me, 2010.  Ma e tusa ai ma faamaumauga a le faamasinoga, na amata le pisa i luga o le nofoaga e sisiva ai tagata, i le va o le ua molia ma ni isi alii talavou se toalua, ma alii o lo o aafia i le mataupu.

O lo o taua i faamaumauga a le famaasinoga le vaaia e molimau o Siaumau Sr ma ni alii se toalua, o kiki ma fasi ni alii se toalua, o leisi sa taatia i lalo.  Na vaaia foi e molimau le tu’i e Siaumau Sr. o leisi o alii na aafia, ae misi ma lavea ai se tamaitai ma matapogia ai le tamaitai.

Na ta’ua i faamaumauga, le taumafai o le tasi o alii na a’afia, e sola, peitai na togi e Siaumau Sr. i se maa ma tau i le ulu ma pa’u ai i lalo.  Na taofia lea alii i le falemai mo togafitiga i ona manua.

O lo o tumau pea poloaiga o lo o tatala ai i tua ia Siaumau ao faagasolo lana mataupu i luma o le faamasinoga maualuga.

TALI IOE PETITA I LONA MOLIAGA

O le masina fou lea ua faamoemoe e lau ai le faasalaga a le alii o Toeitiiti Petita i luma o le Faamasinoga Maualuga, ina ua talia lana tali ioe sa tuuina atu i lalo o se maliliega sa latou sainia ma le malo, i le moliaga o le faaoolima i le tulaga lua.

Ua faamaonia e Petita lona faaoo lima ia Farani Farani, e ala i lona fa’aaogaina o se tama’i naifi, i se faalavelave na tula’i mai i le aso 21 o Aperila 2011, i le nofoaga o le Kolisi Tuufaatasi i Malaeimi.

Na talosaga le malo e solofua moliaga e fa o lo o totoe i le pepa o tagi, lea e aofia ai moliaga e tolu o le taumafai e faaleaga mea molimau a le malo ma le faatupu vevesi i nofoaga faitele.

O lo o taofia pea i le toese i Tafuna le ua molia e faatali ai le aso lea ua faatulaga e lau ai lana faasalaga.

O le tamaitai loia fautua ia Ruth Risch-Fuatagavi o lo o tulai mo Petita ae o Cabel Poag o lo o tulai mo le malo i lenei mataupu.