MATA’UTIA FAIGA A LE ISIS I ASIA I SASA’E

O ata video lata mai nei sa fa’asalalau e se televise Asia i luga o ala ata eseese i le lalolagi e aofia ai ma le CNN, ua maitauina ai le mata’utia o faiga a le vaega fa’atupu fa’alavelave a le ISIS ua vaaia i so o se itu o le lalolagi i le taimi nei, e aofia ai le fa’aaogaina o se tamaititi pe a ma le 15 tausaga le matua na te fasiotia ni alii Rusia e ala i le tafana o i laua i luga o se toafa.

Na taua i ripoti e fa’apea, o se tasi o itu mata’utia o lo o taumafai pea malo aufa’atasi aemaise ai Amerika e taofi mai le ISIS, o le faaaga lea o tupulaga laiti e faatino ni isi o faiga faasolitulafono, e pei o le fasiotia o tagata i auala mataga.

MASALOMIA TUPULAGA SAMOA I LE FA’ATUPU MISA

AUKILANI, NIU SILA - A o fa’agasolo ai su’esu’ega a le Ofisa o Leoleo i Aukilani i le fa’alavelave lea na tula’i mai ai se misa tele i le ‘Downtown Transport Center, ua taua ai i ni ripoti le masalomia e leoleo o ni isi o i latou sa aofia i nei vevesi, o ni tupulaga Samoa. Na taua e le pulesili o le vaega o Fela’uaiga a Aukilani ia Mark Lambert e fa’apea, mo nisi polokalame e faia i le nofoaga lenei i le lumana’i, e manaomia le to’atele ai o leoleo e leoleoina le saogalemu.

E silia i le $20,000 le tupe e fa’aleleia ai mea sa fa’aleagaina i lea nofoaga, ina ua tula’i mai lea vevesi ma tau fai tauai solo ai ma’a ma atigi fau i totonu o le nofoaga. O se tasi o faafitauli tele na tula’i mai ai, o le taofia lea o femalagaaiga a nofoAafi sa faamoemoe e fela’uai ai le mamalu o le atunu’u i le taimi tonu na tula’i mai ai lea vevesi. E leai se isi ua taofia e leoleo i lenei fa’alavelave, ae o lo o fa’aauau pea suesuega i le mafua’aga o le vevesi. Pau ripoti a leoleo, sa iai ni isi sa mannunu’a ina ua a’afia i ma’a ma fagu sa tauai solo.

OVA $30 MILIONA TAU FUALAAU FAASAINA MAUA E LEOLEO

SUVA, FIJI - O lo o taofia pea i le falepuipui i Suva ali’i e to’alua ia na taofia mai e leoleo ina ua latou osofaia se nofoaga sa masalomia le gaosi ai o fualaau faasaina toe toto ai le laau faasaina o le mariuana, e fa’atali ai le aso o le la fa’amasinoga.

E silia i le $30 miliona le tau aofa’i o fualaau faasaina sa maua e leoleo i le latou osofaiga sa fai ai luga o le uafu i Lautoka, i le mae’a ai lea ona maua e leoleo suesue o se fa’amatalaga mai se molimau, e faatatau i ni alii se toalua o lo o taumafai e faaulufale atu fualaau faasaina i le isi motu, ma aga’i atu ai loa leoleo ma taofi se pikiapu sa malaga atu ai ali’i ua taofia nei, ma maua ai i totonu o le ta’avale ni taga papa’e se 10 sa tutumu i lau mamago o le mariuana, ae o isi taga e lua sa iai vaega o le pauta o le aisa. O isi vaega o le pauta o le aisa sa maua i totonu o pa’u pasika sa i totonu o le ta’avale.

fa’aliliu: S.A.M.