PEPELO I ONA TAUSAGA ONA O LE FIA FACEBOOK

MINNESOTA - O le tina pito i matua o le lalolagi e 114 tausaga o lona soifua lea na maliu i le vaiaso nei, sa ia ta’u pepelo ona tausaga i le vaega o le ‘Facebook’ ina ia mafai ai ona avea o ia o se tasi o tagata e lesitala mo le fa’aaogaina o le ‘Facebook’. O le tina o Anna Stoehr mai Plainview i Minnesota, na atoa i le masina o Oketopa 2014 lona 1114 tausaga, ae i ai le talitonuga o lona 113 tausaga na lesitala ai o ia i le ‘Facebook’, peita’i sa ia pepelo e na o le 90 ona tausaga.

Na matua faateia le to’atele i Amerika ina ua latou maua lenei fa’amatalaga, ma fai meaalofa atu ai le to’atele i fugalaau ma pepa e tusia ai alofaaga i lana fanau, ona o le latou misia o lenei tina. Na soifua mai Anna i le tausaga e 1900, i le taimi e lei tagatavaleina le alii peresetene o William McKinley atoa ai ma le maliu o le Tupu Tama’ita’i o Queen Victoria. E to’a 5 lana fanau, to’a 27 fanau a lana fanau, ae to’a 12 fanau o fanau a lana fanau. Na taua e le lana fanau i tusitala i Amerika, o Anna o se fai fa’atoaga, o lona olaga atoa fo’i sa nofo ai i totonu o le fa’atoaga, ae na fa’atoa alu ese mai o ia ma nofo i se fale mautotogi ina ua 112 ona tausaga. O lona to’alua na maliu i le 1998.

MASALOMIA FAIGA FAATERORISI I AUSETALIA

SINI - Ua masalomia le malosi o faiga fa’aterorisi i totonu o Sini Ausetalia i le taimi nei, i le mae’a ai lea ona taofia fa’apagota e leoleo ma sui o le feterale a Ausetalia ni ali’i se to’alua, ma tu’uaia i moliaga o le taupulepule lea e fa’atupu faiga fa’atupu fa’alavelave i totonu o le atunu’u. O ali’i e to’alua ua taofia e 20 tausaga o le isi ae 21 tausaga le matua o le isi. O se poloaiga mai le fa’amasinoga e saili ai le fale sa nonofo ai nei ali’i, na mafai ai ona fa’amaonia masalosaloga a leoleo, o lo o faia e i laua nei fesootaiga i auala e fa’atino ai ni osofaiga fa’asaga i le malo o Ausetalia.

Na taua i ripoti a leoleo le tele o faamaumauga sa maua i fale na nonofo ai i laua nei, ma ua fesoasoani malosi nei fa’amaumauga i su’esu’ega fa’aauau a leoleo fa’asaga i tagata fa’atupu fa’alavelave ua masalomia le fa’atupulaia i totonu o Ausetalia. O le itu na fa’afetaia e le ali’i palemia o Ausetalia ia Tony Abbott, o le maua lea o i laua nei ae le i o o i le taimi e fa’atino ai ni isi o la osofaiga fa’asaga i tagata lautele. O lo o matua maualuga puipuiga a le malo o Ausetalia i le taimi nei i faiga fa’atupu fa’alavelave ua ofi atu i le atunu’u. O lo o masalomia e i le va o le 15 i le 20 tagata o atunu’u i Sasa’e e feso’ota’i ma le vaega fa’atupu fa’alavelave a le ISIS o lo o nonofo i totonu o Ausetalia.

FUFUSU SE ALI’I 18 TAUSAGA MA LONA TAMA

FLORIDA - Na taofia uma e leoleo se tama e 55 tausaga le matua ma lona atali’i e 18 tausaga le matua i le po o le kerisimasi na te’a nei, ina ua tula’i mai se fusuaga le pupula i lo la va i le latou aiga i Florida. O le tama na aafia ia Kevin Nash, sa avea o ia ma tama pi’i ta’uta’ua i le maea pi’i o le WWE, sa fa’atele fo’i taimi na ia umia ai fusi o le siamupini o le lalolagi, ae na ita o ia ina ua ‘ona atu lona atali’i i le latou fale i le po o le kerisimasi, ma ia titina i loa le ua o lona atali’i ae togi i lalo o le fola o le fale. Na vili e aiga tuaoi leoleo ina ua fa’alogoina le pisapisao mai o le aiga, ma loka ai uma laua e leoleo, mulimuli ane na toe tatala e fa’atali ai le aso la te tutula’i ai i luma o le fa’amasinoga fa’aitumalo. Na fa’ailoa e le Kevin i leoleo e fa’apea, na mafua ona ia fasia lona atali’i, sa taumafai e puipui lona tina ina ua fefe i amioga a lona atali’i.

AVE FA’ANANA FANA I LUGA O LE VA’ALELE

ATLANTA - O le vaiaso nei na pu’e fa’apagota ai e sui o le FBI se ali’i sa faigaluega i le kamupani va’alele a le Delta, ae o ia fo’i o se leoleo mo le malae va’alele i Atlanta, ona o tu’uaiga i lona fesoasoani lea i se isi ali’i sa malaga i se va’alele i le fela’uaina o fana i luga o va’alele. I faamaumauga mai le FBI sa taua ai e fa’apea, e 129 fana laiti ma ni fana lapopo’a se 2 na sapalai e le ali’i o Eugene Harvey mai Atlanta e aga’i atu i Niu Ioka, talu mai le masina o Me seia oo mai i le masina lenei o Tesema.

O le gaioiga sa faia e Harvey, o le taimi lava e uma ai ona siaki se tagata malaga i le vaega o lo o i ai masini a le malae va’alele, ona ia tu’uina atu loa lea o le fana i le tagata ua ia filifilia e alu ma ia, ma sapalai atu ai e le tagata lea le fana i le nofoaga ua fa’amoemoe e ave aga’i i ai. O se tasi o fana sa sapalai aga’i atu i Niu Ioka sa fa’atau atu i se ali’i leoleo nana, ma mafua ai loa ona alia’e fa’amatalaga e uiga i lenei mataupu.

fa’aliliu S.A.M