I’UGAFONO E ALOA’IA AI TAUTUA SENATOA AMITUANA’I ETEUATI ENE II

Na pasia e le Senate i le taeao ananafi se i’ugafono malilie fa’atasi, e momoli atu ai alofaaga o le faavauvau ma le agaga o le faamaisega o le Fono Faitulafono ma tagata Amerika Samoa, i le faletua o Mokemarie Ahutoa Amituana’i ma le paia o le Aiga sa Amituana’i, i le tuumalo o le afioga i le alii Senatoa ia Amituana’i Amituana’i Eteuati Ene II, ma avatu ai le faafetai i lana tautua faaaloalo i lona aiga, nuu, itumalo ma le atunuu.

O Senatoa Amituanai na soifua mai i le aso 24 Aperila 1933 ae na valaauina e le Atua i le aso 19 Novema 2011 ina ua 78 tausaga o lona soifua.

O lenei iugafono malilie faatasi a le Senate ua maea ona tauaao atu i le taimi o le sauniga faalemalo a le afioga i le alii Senatoa i le masina na tea nei.

SAUNI FAIPULE TOE ILOILO TULAFONO LAFOGA I TOTOGI

O le taeao nei lea ua fa’atulaga e le Komiti o Sailiga o le Manuia a le maota o sui, e amata iloiloina ai le pili lea sa pasia e le Fono Faitulafono ma sainia e le kovana i le tausaga na te’a nei, e fa’aopoopo ai le lafoga e 2% i totogi.

O lea iloiloga o le a fa’atautaia e le ta’ita’ifono o le komiti, le afioga ia Toeaina Faufano Autele.

I sana saunoaga, na fa’apupula ai e Toeaina i luma o le maota e fa’apea, o le mafua’aga o lenei iloiloga, o se taumafaiga a le komiti e saili nisi auala e mafai ai e le malo ona maua nisi alagatupe faaopoopo, ina ia fesoasoani i le tulaga pagatia i le itu tau tupe o lo o fa’aauau pea ona latou feagai.

O nisi o molimau mo lenei iloiloga e aofia ai le Pule o le Ofisa o Lafoga o Melvin Joseph, Teutupe a le malo ia Magalei Logovii ma le Fa’atonu Ofisa Paketi ia Malemo Tausaga.

Mai pili tupe e lima na tu’u atu e le kovana i le Fono i le tausaga na te’a nei, e na o le pau lea o le pili tupe na pasia e le fono ma sainia e le kovana.

Na fa’ailoa e Togiola Tulafono i lana saunoaga ina ua tatala aloaia le Fono Faitulafono i le Aso Gafua na tea nei, e tusa ma le $1 miliona le tupe sa mafai ona ao mai e le malo ina ua pasia le lafoga lenei i le tausaga na te’a nei, ma o lea tupe sa mafai ona fesoasoani ai i nisi o gaioiga faatino a le malo.

FEAGAI PEA MANU’A MA FA’AFITAULI TAU FEMALAGAA’IGA

E mavae atu lea auga tupulaga ma lea auga tupulaga, ae le mafai ona ave’esea le feagai pea o le itumalo o le Manu’atele ma fa’afitauli tau i femalagaaiga.

O le itu matuia o ia fa’afitauli na le mafai ai ona malaga mai ni isi o fanau aoga mai Manu’a mo le toe amataina o a’oa’oga i le vaiaso na te’a nei, ina ua le ofi le va’a o le MV Sili, fa’atasi ai ma le fa’aletonu i femalagaaiga i va’alele, e pei ona fa’amaonia mai e le afioga i le alii faipule ia Alexander Eli Jenning, o le taitaifono o le komiti o Fela’uaiga a le maota o sui.

Saunoa le alii faipule, o se tasi lenei o lu’itau o lo o feagai ma lana komiti, o le taumafai lea e saili ni auala e foia ai fa’afitauli o lo o feagai ma uso i Manu’a.

Na taua e se tagatanu’u mai Ta’u lona le fiafia ina ua fesiligia e le Samoa News i le aso ananafi, ona o le tulaga fa’aletonu i femalagaaiga a le MV Sili, aemaise ai lava le fa’atapula’a mai o pasese e mafai ona ave.

Na taua e lea tama, e lei finagalo e fa’ailoa lona  suafa, o tulafono o lo o fa’amalumalu i luga o le femalagaaiga mo Manu’a, ua mafua ai ona tele fa’afitauli ma faigata i tagata ona faimalaga mai Manu’a i Tutuila, ae maise ai lava le tele o taimi e faasala ai e le Coast Guard le vaa ona o nisi o vaega e masani ona maua o loo faaletonu.

Ae na saunoa Alexander, e taua tele tulafono a le U.S Coast Guard o lo o puipuia ai le saogalemu o femalagaaiga i Manu’a, pau le tulaga o lo o taumafai i ai le komiti, o se auala e foia ai le toe tulai mai o fa’aletonu i femalagaaiga ma a’afia ai tagata.

Fai mai le tomumu a le isi olomatua mai Manu’a sa fesiligia e le Samoa News, ua avea le tumu o le pasese a le va’a i lana malaga i le vaiaso na te’a nei ma itu na le a’o’oga ai le tusa ma le toa 20 o fanau aoga mai Manu’a, ina ua le mafai ona o mai i le malaga a le vaa.

O le fa’atonusili o Uafu ma Taulaga ia Matagi Ray McMoore ma le taitai o le Coast Guard ia Lt. Steven Caskey o le a molimau i le iloiloga lea ua faatulaga mo le Aso Lua o le vaiaso fou.