Ads by Google Ads by Google

Tala otooto mai le Fono Faitulafono

FUAFUA LE UMUSAGA O LE FALE FOU A LE FONO FAITULAFONO

Ua i ai se finagalo o taitai o le Fono Faitulafono, o le maea ai o le palota lautele a le atunuu e pei ona alo atu i ai i le lua vaiaso o lo o lumana’i nei, o le a tatala aloaia ai loa le maota fou a le Fono e pei ona fausia i le itu i sasa’e o le maota fono.

Na faalauiloa aloaia e le afioga i le alii peresetene o le Senate ananafi e faapea, o lo o i ai le faamoemoe e tatau ona umusa le galuega ao lei maea galuega o lenei nofoaiga, ma fai ai ma pine faamau o lenei nofoaiga le maota fou lea ua toeititi lava maea lelei vaega uma e pei ona faatinoina.

O le Ofisa lea a le Fono o le a avea ma nofoaga autu o faamaumauga mo maota e lua, lea na fausia mai i se vaega tupe mai le ARRA, faatasi ai ma se vaega tupe na aumai i le nonogatupe e $20 miliona a le malo mai le Vaega a le Litaea.

O lenei galuega na fausiaina e le konekarate a le Paramount.

PILI E AVEA AI LE VAEGA TOSOVAA MA FAALAPOTOPOTOGA TUMAOTI

Ua i luma o le Fono Faitulafono se pili mai le ofisa o le alii kovana, e avea ai le Vaega Tosovaa a le malo i Satala ma Faalapotopotoga Tumaoti a le malo, suia ai le Mataupu 20 o le Tusi Tulafono Toeteuteuina a Amerika Samoa.

O le agaga autu ua manatu ai le malo e faatulai lenei faalapotopotoga ina ia avea ma vaega tumaoti, ina ia maua ai e le aufai vaa fagota auaunaga lelei mo a latou vaa fagota, ma fesoasoani ai i le atinaeina o pisinisi tau vaa fagota i le teritori.

I le tino o le tulafono o lo o taua ai e faapea, o le avea ai o le vaega tosovaa ma Faalapotopotoga tumaoti a le malo, e toalima sui o lana Komiti Faafoe o le a tofia e le kovana ma faamaonia mai e le maota maualuga, e taitaia lenei vaega tumaoti a le malo.

O le a tofia e i latou e toalima sa latou taitaifono e fai ma taitai, peitai afai ae i ai se faafitauli e tulai mai, o le a tofia e le kovana se isi e sui tulaga i lea tagata, sei vagana ua toe nofoia le fono ona toe tuuina atu lea i ai o se isi tofiga.

O le a mafai e le komiti faafoe o le a tofia ona toe faia ni suiga i tulafono e pasia mo le faalapotopotoga, pe afai e tusa ai ma le lua-vaetolu o le palota a le komiti.

O le faatupeina o galuega a le vaega tosovaa, o le a faatupe mai lava i tupe e maua mai lana tautua, e le o ni tupe foi e mafai ona faaaitalafu atu i tua, ae o le a teuina ma toe faaaoga mo le faatinoina ai o lana tautua mo le atunuu.

O nisi o matafaioi ua faatulai mo le Faalapotopotoga e pei o meatotino, o tupe ma suega tusi, o le a faatinoina uma lava i lalo o le faatonuga a le komiti faafoe.

O aitalafu uma e mafai ona maua e le vaega tosovaa, o le a le mafai ona taua o ni aitalafu a le malo, aua o lea o le a avea i latou ma vaega tumaoti mo le malo.

O lenei tulafono o le a aloaia i totonu o le 60 aso talu mai le aso na pasia ma aloaia ai lenei tulafono e le fono faitulafono.

FESILIGIA FAAFITAULI TULAI MAI FALEAOGA AOGA MAUALUGA LEONE

Na fesiligia e le afioga i le alii faipule ia Galumalemana Bill Satele i luma o le maota o sui i le taeao ananafi, le mafuaaga o le faafitauli lea sa aafia ai le faleaoga o le Aoga Maualuga a Leone i le faaiuga o le vaiaso, ina ua talepe e ni tagata potu aoga se lua ma faaleaga meaaoga sa i totonu.

Na taua e le alii faipule le logoina atu o ia e leoleo e uiga i le faalavelave, ma maua ai foi le avanoa e matamata ai i potu aoga ua faaleagaina, o lana molimau, ua matua faaleagaina lava meaaoga sa i totonu o potu aoga e aofia ai ma le potu o lo o faapitoa mo le JROTC.

Na taua e le alii faipule lona maofa tele ona o lenei mea ua tupu, e ui o lo o talitonu lona taofi e le tatau ona tulai mai lenei ituaiga faafitauli.

O ni tusitusiga o lo o tusia ai i puipui o potu aoga ua faaleagaina e pei ona taua e le alii faipule, ua tulai mai ai masalosaloga i ituaiga tagata sa latou faia lenei gaioiga.

Ae i le saunoaga a le fofoga fetalai ia Savali Talavou Ale, sa ia taua ai lona le talitonuina o ituaiga amioga nei e fai e fanau aoga, aua o lo o aoaoina i latou i le poto ma le atamai i taimi uma, peitai e aafia ai fanau aoga, ona fesiligia lea o aoaoga o lo o aoaooina ai i latou.

Na talosagaina e Savali le taitaifono o le komiti o aoga a le maota ia Lemapu Suiaunoa Talo, ina ia silasila totoa i lenei mataupu ma faatulaga se iloiloga ma le matagaluega o aoga, sei fesiligia i le mafuaaga o nei faafitauli.

Ina ua fesiligia le vaega o Leoleo Suesue i le aso ananafi, na faamaonia mai ai le faaauau o a latou suesuega e uiga i lenei mataupu. E oo mai i le taimi nei e le o i ai ni isi o o masalomia po ua taofia foi, na pau le itu na mafai ona faamaonia mai, e le o se taimi muamua lenei ua faaleaga ma osofaia ai le faleaoga a le Aoga a Leone.