TULAFONO E AIAIA AI TIUTE FA’A FOMA’I

Ua i luma o le Fono Faitulafono se pili na tuuina atu i ai e le kovana sili ma le faigamalo, e faavae ai se Maga fou i le Tulafono, e aiaia ai se Komiti o Foma’i, latou te iloiloina ma vaavaai agavaa ma tomai o i latou o loo fia galulue i lenei matata taua.

I se tusi a Togiola Tulafono i taitai o le fono mo le faalauiloaina o lenei tulafono taua sa ia taua ai e faapea, ao feagai ai le falemai o le LBJ ma faafitauli i le tau sailia lea o ni fomai lelei ma agavaa e galulue mo le falemai, o loo i ai nisi o fomai ua tautino e ofo atu lo latou ola e faataunuuina ai lenei tautua taua mo le atunuu, e ala i le tausia ma le vaaia lelei lea o gasegase.

Saunoa Togiola, o le tatalaina atu o lea avanoa i fomai e faalautele ai lo latou agavaa i lenei matata, o le a o gatasi ai ma le avanoa lea ua tatala atu i isi matata e pei o le suetusi, faakonekarate, loia ma isi lava matata faapena.

Saunoa Togiola, sa ia fesiligia le Asosi o Fomai i Amerika Samoa i so latou finagalo e tusa ai o lenei tulafono, ma ua latou taua ai le taua ma le aoga o le fuafuaga ua faia, ina ia mafai ai ona siitia maualuga le tautua faafomai i le teritori, ma faalautele atu ai le tomai o i latou o loo i ai le naunau e aoaoina i latou i lenei matata, poo i latou foi ua mananao e faalautele le iloa o loo i ai i galuega faafoma’i.

TEENA SENATE PILI TUPE FAASOASOA AI LE $6.8 MILIONA

Ua teena e le Senate lana pili tupe ma le pili tupe a le maota o sui, lea e faasoasoa atu ai le $6.8 miliona e faaatoa ai le paketi a le malo mo le tausaga tupe fou 2013.

O le amataga o le vaiaso na te’a nei na pasia ai e le maota o sui i le faitauga faatolu la latou pili e faasoasoa atu ai le $6.8 miliona e faaatoa ai le paketi a le malo, peitai ina ua oo atu i le Senate, na teena ai loa e Senatoa i le faitauga faalua.

O le taitaifono o le komiti o le paketi a le Senate ia Lemanu P. Mauga na faauluina le mau i le maota, ina ia teena pili tupe e lua e pei ona taua.

A’o lei faia le palota a le Senate e teena ai pili tupe e pei ona taua, na fesiligia e le sui peresetene o le maota maualuga ia Tulifua Tini Lam Yuen ia Lemanu i le mafuaaga ua ala ai ona manatu le komiti e teena pili tupe nei e lua, ae na tali Lemanu, ua maea ona faamaonia e le kovana i sana tusi sa tuuina atu i le fono, e leai se vaega tupe faapea o i ai i teugatupe a le malo.

O le $6.8 miliona e pei ona talanoaina e le fono, o le tupe lea fai mai molimau a le malo na maua mai e le malo i le maliliega o le Tapaa mai le aitalafu i le Initeria, peitai mulimuli ane ina ua fesiligia e le Fono pe faamaonia o loo i ai se tupe faapea, ae atagia mai i molimau a sui o le malo e le o mautinoa lelei.

E ui o lea, na tasi le finagalo o le fono ina ia aveese le tupe lea mai le paketi a le malo mo le tausaga tupe fou, ae faaulu se pili e faasoasoa atu ai e le fono le faaaogaina o lea tupe e faaatoa ai le paketi, peitai i se tusi na tuuina atu e Togiola Tulafono i luma o le fono i le vaiaso na te’a nei, sa ia taua ai le leai o se tupe faapea o i ai i teugatupe a le malo.

ALOAIA TAUTUA AFONOTELE PETELO I SE IUGAFONO MAOTA SUI

O se iugafono na pasia e le Fono Faitulafono ua aloaia ai le tautua a le susuga Afonotele Petelo Lui-Lafaele, ma manatua ai lana auaunaga i lona aiga, malo ma le atunuu.

O le aso Faraile na te’a nei na faia ai toe sauniga o le susuga Afonotele i lona aiga, ma lagomau ai loa o ia i lona aiga lava, ina ua valaauina o ia e le Atua ao tautua i lona aiga, nuu, ekalesia ma le malo, e pei ona lauiloa ai o ia i lana galuega i le Faalapotopotoga o le Eletise ma le Suavai (ASPA).

I le tino o le iugafono a le maota o sui, o loo faamatalaina ai Afonotele o se tagata finau mai lava i lona laititi seia oo ina faaeaina lana taumafai.

Na amata le tautua a Afonotele ina ua galue i le kamupani a le StarKist Samoa, peitai na toe faalautele lona tomai ina ua malaga i fafo ma toe aoaoina ai o ia, ma faamanuiaina ai loa o ia i faailoga maualuluga, ma galue ai loa mo le ASPA seia oo mai lava i le taimi nei ma maliu ai o ia.

O lana tautua i le ASPA faapea ai lana ekalesia ua iloga ai ona faagalo gata o ia e ona aiga, uo ma e masani.

O le iugafono a le maota o sui na tauaao atu i toe sauniga o le susuga ia Afonotele i le aso Faraile na te’a nei.