PASIA SENATE PILI FA’AMAGALO NONOGATUPE $5 MILIONA A LE LBJ

E 13-0 le palota na pasia ai e le maota maualuga a le Senate le pili e fa’amagalo ai le aitalafu e $5 miliona a le Falema’i o le LBJ, ma ua fa’amoemoe e tauaao atu lea pili i luma o le maota o sui mo sa latou fa’aiuga.

O le faaiuga a le senate e pasia ai lenei tulafono, na faia lea ina ua mae’a sa latou iloiloga puupuu sa faia i le aso Gafua na te’a nei, lea na fa’amanino ai e le afioga i le ali’i senatoa ia Laolagi Fonoti Savali Vaeao le mafua’aga autu o le tulafono taufaaofi lea ua i luma o le fono faitulafono.

Saunoa Laolagi e fa’apea, o le agaga o le tulafono, ia mafai ona pasia lenei tulafono e aloaia ai le aveese mai fa’amaumauga a le malo o le aitalafu a le falema’i o le LBJ, ona o le aitalafu sa faia ma le agaga e fesoasoani ai i le falema’i, lea fo’i na nono mai i tupe a le malo.

 Na fesili ni isi o afioga i senatoa pe i ai se a’afiaga i tupe a le malo pe afai e fa’amagalo lenei aitalafu tele, peita’i na fa’amanino e le afioga Laolagi e fa’apea, e leai se a’afiaga o le malo pe afai e pasia le tulafono e fa’amagalo ai le aitalafu, pau le itu o le a fa’aleleia, o le a aveese mai ai i fa’amaumauga a le malo le aitalafu a le falema’i.

O le tulafono lenei na afua mai i lalo o se fautuaga a le sui teutupe ia Tina Onosa’i-Va’a ma ni isi o sui o le pulega a le falema’i o le LBJ, ina ua latou fautuaina le senate i se latou iloiloga sa faia ai i le lua vaiaso talu ai, e mana’omia se tulafono e fa’aulu ma pasia ina ia mafai ai ona fa’ailoa i fa’amaumauga a le malo ma le falema’i le aloaia o le fa’amagaloina o lenei aitalafu.

I’UGAFONO FA’AMALOLO AI LE FONO MO LE LUA VAIASO

O le taeao ananafi na taunu’u ai i luma o maota e lua a le fono faitulafono i’ugafono a maota e lua, e aloaia ai le malologa a le Fono Faitulafono mo le umi e lua vaiaso.

I le tino o le iugafono na tau fai pasia e le senate ma le maota o sui ananafi, o lo o taua ai le malologa a le fono lea ua fuafua e amata i le aso 29 Fepuari 2016, ma le fa’amoemoe e toe amata ana galuega masani i le aso 14 Mati.

E ui o lea ua alo atu le fono faitulafono mo lana malologa masani, peita’i na fa’amanatu e ta’ita’i fono i senatoa ma faipule le le tatau lea ona taofia ai fua galuega fa’atino e moomia ona fa’ataunu’u.

Na fa’ailoa e le afioga i le fofoga fetalai ia Savali Talavou Ale i le maota o sui e fa’apea, talu ai o lea ua maitauina le saoasaoa o le pipisi o le fa’ama’i o le ‘Zika virus’, e le tatau ai i le maota ma le komiti o le soifua maloloina ona taofia galuega lelei e moomia le fia fa’ataunu’uina, pe afai e manaomia se iloiloga i le taimi o le malologa.

“O le galuega a le Fono Faitulafono e le muta i le taimi e malolo ai maota e lua, ae fa’aauau pea i soo se taimi e moomia ai le fesoasoani a le Fono mo le tausaga atoa,” o le saunoaga lea a Savali.

I luma o le maota maualuga i le taeao ananafi, sa fautuaina ai fo’i e le afioga i le Peresetene o le senate ia Gaotetoe Palaie Tofau afioga i senatoa, ina ia fa’aauau pea galuega e moomia le fa’ataunuuina tusa lava pe malolo maota e lua.

SAUNI FAIPULE FESILIGIA PULEGA FOU A LE FALETUPE ANZ BANK

O le itula e 8:00 i le taeao nei lea ua fa’atulaga e faia ai le iloiloga a le Komiti o le Tamaoaiga o le maota o sui ma le pulega fou a le Faletupe o le ANZ Bank, mo le fesiligiaina o ni isi o tulaga ua o o i ai la latou tautua i le atunu’u, talu mai le taimi na pasia ai e le maota o sui se i’ugafono i le tausaga na te’a nei, e talosagaina ai le pulega a le Faletupe ina ia fa’aleleia le tulaga o a latou tautua mo le atunu’u.

Saunoa le afioga i le ali’i faipule ia Larry Sanitoa, o ia fo’i lea o le Taitaifono o le Komiti i luma o le maota o sui ananafi e fa’apea, talu mai le taimi na pasia ai e le maota o sui la latou i’ugafono, ua i ai nai suiga laiti ua molimauina, se’i vagana ai tulaga o a latou totogi o tautua o lo o tumau pea i le taimi nei, ae talosia ia i ai se taimi e mafai ai ona foia lea tulaga ma maua ai se fa’amama avega mo le atunu’u.