Tala otooto mai le Fono Faitulafono

PASIA E LE FONO TOTINO KOMISI FUAFUA FA’ATERITORI

 

Ua pasia nei e le Fono Faitulafono tofiga a le afioga i le ali’i kovana ia Lolo Matalasi Moliga, mo i latou e to’alima e avea ma totino o le Komisi o Fuafuaga Fa’ateritori, ina ua pasia e le senate i latou nei i le aso Faraile na te’a nei, i le palota e 11-0 mo sui uma e to’alima.

 

O i latou e to’alima na pasia e le senate i le vaiaso na te’a nei, e aofia ai ni sui se to’alua sa tautua i le maota o sui i le nofoaiga lona 33 a le Fono Faitulafono ua mavae atu, le susuga a Taotasi A. Soliai, ma le susuga ia Atualevao Gafatasi Afalava, faapea ai isi sui e to’atolu e aofia ai Papalii Jake Ierome, Pogia Tusi Suianoa ma Rosa Mana Hopkinson.

 

E le i umi lava se taimi o le iloiloga a le senate i le vaiaso na te’a nei ma i latou nei, ae pasia loa le mau ina ia fa’aagafua i latou, ae sauni le maota mo sana fa’aiuga.

 

Ina ua fesiligia e le senate i latou nei ta’ito’atasi e tusa ai o le tofiga ua valaauina i ai latou e le kovana, sa latou taua ai lo latou sauni e ofo atu le tomai ma le agava’a ua latou maua, e tautua ai le faigamalo a Amerika Samoa.

 

SAUNI SENATOA ILOILO PILI MAOTA O SUI MO LE KILIA $20

 

O le taeao nei lea ua fa’atulaga e le maota maualuga a le Senate, e tatau ona faia ai sa latou fa’aiuga i le pili a le faigamalo a Lolo ma Lemanu lea ua pasia e le maota o sui, e fa’ae’e ai le kilia e $20 mo tagata e malaga ese atu ma le teritori o Amerika Samoa, i le malae va’alele atoa ai ma le uafu.

 

E ui o lea ua taunu’u i le maota maualuga le pili lea a le maota o sui, peita’i o lo o taoto pea le pili a le Senate i le komiti o le Paketi, e le i faia i ai sa latou fa’aiuga, talu mai le taimi na mae’a ai le iloiloga a le komiti ma le Fa’atonusili o le Pulega o Taulaga ma Malae va’alele i le vaiaso na te’a nei, le afioga a Taimalelagi Dr. Claire Tuia Poumele.

 

Ina ua fesiligia e  le komiti ia Taimalelagi i le kilia e $20 lea ua fuafua le malo e fa’aee i tagata e malaga ese atu mai le teritori, i le malae va’alele ma le uafu, pe i ai se fete’enaiga ma tulafono a le feterale, na saunoa ai Taimalelagi e faapea, e le fa’atagaina e tulafono a le feterale o lo o pulea ai malae va’alele i totonu o setete ma teritori a le Iunaite Setete, ona fa’aee se lafoga poo ni tupe totogi i tagata femalagaa’i.

 

I le maualuga ai o tulafono a le feterale i soo se tulafono a Amerika Samoa, na saunoa ai Taimalelagi e faapea, e ono afaina tulafono a le feterale i le kilia lea ua fuafua le malo e fa’ae’e i le malae va’alele, ma, e ono avea lea ma itu e a’afia atu ai ma le faitau miliona ma miliona o lo o maua mai e Amerika Samoa mai le vaega a le FAA o lo o pulea malae va’alele, e fesoasoai ai i le atina’eina ma le fa’aleleia o le malae va’alele a le atunu’u i tausaga ta’itasi.

 

E talitonu ni isi o senatoa, e le tatau i le malo ona naunau e fa’ae’e lenei kilia i tagata femalagaa’i, ma le fa’amoemoe e maua mai ai se vaega tupe laititi, ae avea ai ma itu e afaina ai le faitau miliona ma miliona o tupe o lo o maua mai i le FAA e fesoasoani ai i le atina’e o le malae va’alele a le atunu’u i tausaga ta’itasi.

Comment Here