TULAFONO AVEESE AI FA’ATAPULA’A TAUSAGA FA’AMASINO LAGOLAGO

Ua i luma o le maota maualuga a le Senate se tulafono taufa’aofi, e aveese ai le fa’atapula’aina o tausaga mo fa’amasino Lagolago e soloa’i atu i le Faamasinoga Maualuga a Amerika Samoa.

I le tulafono o lo o i ai nei, e fa’amalolo se tasi mai lona nofoia o le nofoa mo fa’amasino le tumau i le matua o le soifua e 70 tausaga, peita’i o le tulafono taufa’aofi lea ua i luma nei o le maota maualuga, ua aveesea ai le fa’atapula’a o ia tausaga.

O afioga i ali’i senatoa sa fa’aulufaleina lenei tulafono e aofia ai Soliai T. Fuimaono, Afoa  L. Su’esu’e, Mauga Tasi Asuega, Laolagi Fonoti Savali Vaeao ma Uti Petelo.

FA’ATAUA LE SOIFUA O TAGATA I LE FALELIMA I SASA’E

O le agaga autu o le i’ugafono lea ua taoto i luma o le maota o sui, e talosagaina ai le fausia o se taligalu e amata atu i Alao e oo i Tula, o le taumafai lava ina ia puipuia le soifua saogalemu o le mamalu o le atunu’u o lo o alala i le Falelima i Sasa’e.

O lea i’ugafono sa fa’aulufaleina e afioga i ali’i faipule ia Fatulegae’e Palepoi Mauga ma Talaimatai Elisara Su’a, ma ua taoto atu i le komiti o Galuega Lautele a le malo e fa’atulaga i ai se iloiloga.

I le agaga o lenei i’ugafono, o lo o talosagaina ai le afioga i le ali’i kovana ia Lolo Matalasi Moliga, ina ia fa’atonu le Ofisa o Galuega Lautele, mo le fa’atulagaina lea o se su’esu’ega i se auala talafeagai e fausia ai se taligalu e puipuia ai le gataifale o afioaga e pei ona taua.

O lo o taua i se vaega o le i’ugafono e fa’apea, o se vaega tele o le auala e feoa’i ai ta’avale i le itu i Sasa’e, o lo o maitauina pea le aga’i ina tafea i le sami, ona o lo o fa’aauau pea ona tu’i e galu le eleele, ma, e faigata tele ona vave oo atu auaunaga i taimi o fa’alavelave fa’afuase’i i taimi e tutupu ai ni fa’alavelave i nofoaga mamao fa’apea i le atunu’u.

O le Falelima i Sasa’e, o le vaega lona lua lea i le atunu’u o lo o tele vave le fa’atupulaia o le faitau aofa’i, o le tele fo’i o vaega o le alatele, e na o vaega e i ai pi’oga o lo o fausia ai pa u’amea e puipuia ai ta’avale mai le oso i lalo o le sami, peitai, ua maitauina le tele o tagata ua manunu’a ma maliliu ona o fa’alavelave tau ta’avale e tutupu fa’afuase’i.

FESILIGIA TULAFONO FA’ASA AI ULAULA TAPA’A NOFOAGA FAITELE

O le taeao ananafi na tula’i ai le afioga i le ali’i faipule ia Puleleiite Li’amatua Tufele Jr i luma o le maota o sui, ma ia fesiligia le tulaga ua i ai le fa’amalosiga e le malo o le tulafono sa pasia e le Fono Faitulafono i ni tausaga ua mavae, e fa’asa ai le ulaula tapa’a i nofoaga faitele, aemaise ai nofoaga e nofoia e le lautele o le atunu’u.

Saunoa Puleleiite e fa’apea, i le mae’a ai o ni feutanaiga sa faia ma ni isi o Faalapotopotoga Tuamaoti i le atunu’u, ua atagia mai ai i le latou molimau, e le o lelei le faamalosia o lea tulafono.

“O se tulafono taua e manaomia le fa’amalosia e le malo, aemaise lava i le Ofisa o Leoleo, ina ia mautinoa e malupuipuia ma saogalemu ai le atunu’u atoa”, o le saunoaga lea a Puleleiite.

FA’ATAUA FAIPULE IUGAFONO A LE SENATE

Na taua e le afioga i le ali’i faipule mai Swains ia Su’a Alexander E. Jennings le tatau lea i le maota o sui ona fa’ataua le iugafono taua lea ua pasia e le maota maualuga, e talosagaina ai le Fono Fa’afoe o Faiga Faiva a le Pasefika, ina ia fa’atumauina pea le mamao e 50 maila mo ogasami puipuia i fagotaga mo Amerika Samoa.

Saunoa le ali’i faipule e faapea, o le taua o lenei mataupu, e atagia mai ai le tutu fa’atasi o le Fono Faitulafono e lagolago taumafaiga a ta’ita’i o le malo, ina ia finauina lenei mataupu taua mo Amerika Samoa.

O le taeao nei lea ua fa’amoemoe le maota o sui e tu’uina atu ai le i’ugafono ua pasia e le Senate mo lona faitauina fa’atolu.

Na tele saunoaga a afioga i senatoa i le mataupu e faatatau i le fa’aiuga lea ua faia e le Fono Fa’afoe o Faiga Faiva a le Pasefika, e fa’aitiitia ai i le 12 maila ogasami fa’asao mo fagota i le teritori.

Saunoa afioga i senatoa e fa’apea, o lenei faiga ua faia e le Fono Faafoe, ua atagia mai ai lo latou fai fa’amalosi o fa’aiuga e a’afia ai atumotu o le Pasefika e aofia ai ma Amerika Samoa, e aunoa ma le fesiligia o ni o latou finagalo.