PASIA SENATE ALE AVEA MA TOTINO KOMITI ATINA’E MALO

O le amataga o le vaiaso nei na pasia ai e le Senate tofiga a le aii’i kovana mo le afioga i le Loia Sili ia Talauega Eleasalo Ale, e avea ai o ia ma totino o le Komiti o le Atina’e a le malo, i le palota e 16-1.

A o le i pasia e le senate le suafa o Talauega, sa muamua faia se iloiloga a le maota maualuga ma le ali’i loia sili, lea na fa’atautaia e le Komiti o le Sailiga o le Tamaoaiga, e avatu ai fautuaga ma timaiga a afioga i senatoa i le ali’i loia sili, e tusa ai o le galuega fita lea ua alo atu nei i ai.

O ni isi o fautuaga, e le gata ia silasila toto’a i auala e fa’amalosia ma fa’amautu ai le tamaoaiga o le malo, a ia silasila toto’a fo’i i tulafono e puipuia ai le malo mai le a’afia i ni isi fa’afitauli i se taimi o i luma.

O le to’atele o afioga i senatoa sa maua le avanoa e tulei saunoa ai, sa latou taua le lava o le agava’a ma le tomai o le loia sili e avea ai o ia ma totino o lenei komiti.

Na taua e le alii kovana ia Lolo Matalasi Moliga i sana tusi i ta’ita’i o le fono e fa’apea, ua ia tofia Talauega e avea ma totino o le komiti o le atina’e a le malo, e sui tulaga i le afioga i le Aloali’i ia Afoa M. Lutu lea o lo o avea ma totino o le komiti o le atina’e i le taimi nei, lea ua fa’amoemoe e mae’a lona taimi i le masina o Setema 2015.

FA’ASALA SENATOA E TO’ALUA TA’ITA’I KOMITI A LE MAOTA

E to’alua afioga i Senatoa ua fa’asala e le Ta’ita’ifono o le Komiti o Tulafono a le aota maualuga ananafi, la te saunia se taumafataga mo afioga i ali’i senatoa, ina ua la le usitaia ni isi o tulafono a le maota i le taimi e fa’atino ai ana galuega masani.

O afioga i ali’i senatoa ua fa’asala e aofia ai Faletagoa’i Tuiolemotu ma Gaea Falautusi Perefoti, lea na togisala i ai le afioga i le sui peresetene o le maota maualuga ia Nuanuaolefeaiga S. Nua.

O le fa’aiuga a Nuanuaolefeagaiga fa’asaga ia Faletagoa’i ma Gaea, na afua mai i le taimi o le iloiloga a le Komiti o le Puipuiga o le Saogalemu Lautele a le Senate i le aso Lulu na te’a nei, ina ua le fa’aaoga e Faletagoa’i le suafa matai a se tasi o senatoa i le taimi o le iloiloga, ma mafua ai loa ona tau si’isi’i le tai i le finagalo o lea sui senatoa, atoa ai ma le talanoa lea o Gaea i lana telefoni i le taimi o le iloiloga.

Saunoa Nuanuaolefeagaiga e fa’apea, ua maea ona taoto aulape a le maota e ta’iala ai ana galuega fa’atino, ma e ui ua tele aso ma tauaofiaga e le i faia i ai se fa’aiuga, ae i lona talitonuga e tatau lava ona fa’amalosia.

Na fautua le sui peresetene le afioga ia Faletagoa’i ina ia fa’aaoga suafa matai o afioga i Senatoa i so o se taimi e fa’atino ai galuega a le maota, sa ia fautuaina fo’i le afioga Gaea ina ia taofi le talanoa i lana telefoni i taimi o iloiloga a komiti.

Na lagolagoina e le peresetene o le Senate ia Gaoteote Palaie Tofau le fa’aiuga a le sui peresetene, ma ia toe fautuaina ai afioga i senatoa ina ia tausisi i tulafono a le maota.

Saunoa Gaoteote e fa’apea, e le o se tiute o le laulau le tau fa’atonu o afioga i senatoa, ona o i latou uma o tagata matutua, ae o se tulaga ‘mataga’ le talanoa o se sui i lana telefoni i le taimi e faia ai iloiloga po o tauaofiaga a le maota.

Na fa’amalulu Faletagoa’i i le maota e tusa ai o se fa’aletonu na tula’i mai i lana pito laau i le aso Lulu na te’a nei.