Ads by Google Ads by Google

Tala otooto mai le Fono Faitulafono

PASIA FAIPULE TOFIGA A LE KOVANA MO REV. KALEPO

 

E 13-1 le palota na pasia ai e le maota o sui i le aso Gafua, tofiga a le alii kovana mo le susuga i le ali’i faifeau ia Rev. Kalepo Vaitautolu e avea ai ma totino o le Komiti Fa’afoe o Tupe Fesoasoani mo fanau aoga.

 

O Rev. Kalepo o lo o galue i le Ekalesia EFKAS a Vaitogi, o ia fo’i o se sui e aoga tele mo tulaga tau atina’e i aoaoga a le fanau aoga.

 

E talitonu le kovana, o le tomai i tulaga tau atina’e aemaise ai o le itu tau tupe o lo o umia e le alii faifeau, o le a fesoasoani tele lea i faaiuga fai a le komiti faafoe.

 

O le vaiaso na te’a nei na taunuu ai i luma o le maota maualuga lea tofiga a le kovana.

 

TALOSAGA FAALELEIA FALE FAATALI PASESE MALAE VAALELE

 

Ua i luma o le maota maualuga se iugafono na faaulufaleina e le afioga i le alii senatoa ia Faumuina Tagisiaali’i, e talosaga ai ma le faaaloalo le alii kovana, ina ia faatonu le Matagaluega o Uafu ma Malaevaalele, ina ia faalautele le fale e taunuu i ai pasese i le malae vaalele faavaomalo i Tafuna, e aofia ai le faia o se fale foga falelua, mo le fausiaina o se ala savali mo le saogalemu o le aga’i atu atoa ai ma le aga’i mai o pasese i le va’alele.

 

O le lelei o ituaiga ala savali faapenei e pei ona taua i le iugafono, e le gata e faigofie ai ona agai atu pasese i totonu o le vaalele ma toe agai ese mai i le taimi e taunuu ai le vaalele, ae aoga foi mo i latou e le atoa le malosi o le tino aemaise ai fo’i tagata matutua, e faigofie ai ona savavali sa’o atu lava mai le fale faatali pasese ma ulufale loa i totonu o le vaalele, po o le savavali sa’o mai i le vaalele ma aga’i mai loa i totonu o le fale faatali pasese, e aunoa ma le tau faaaogaina o fasitepu poo lifi.

 

Na faafetaia e le alii peresetene ia Gaoteote Palaie Tofau le agaga o le iugafono e pei ona taoto i luma o le maota, ona o se iugafono taua ma matagofie mo le faaleleia o lea foi itu o le auaunaga a le malo.

 

Pau le fautuaga a le alii peresetene sa tuuina atu i afioga i senatoa, o ituaiga iugafono taua faapenei pe a toe faaulu i luma o le maota, e sili atu ona lelei ma malosi pe afai e fa’aulu o se pili, e lelei lea e saili atu ai ma le agalatupe e faatupe ai le galuega.

 

“A avatu le iugafono lenei i le alii kovana, ona tau mafai lea o le kovana e tau saili se alaga tupe e faatupe ai le talosaga, ae afai e avatu faa pili, e le toe i ai lava se isi gaioiga e faia i ai, aua o lea ua i ai le tulafono atoa ai ma le alaga tupe e faatupe ai le galuega, pau le gaioiga a le faigamalo e fai o le faamalosia o le tulafono ua pasia atu,” o le saunoaga lea a Gaoteote.

 

Ua taoto atu nei le iugafono i le komiti faafoe o pulega o Taulaga ma Malaevaalele mo le faataunuuina o se iloiloga.

 

FESILIGIA FAIMEALELEI GALUEGA TALU MAI LE GALULOLO

 

E ui ua leva ona tuana’i le galulolo na faaleagaina ai le tele o atina’e ma soifua na maliliu ai i le atunuu i le 2009, ae o le taeao o le aso Gafua na te’a nei na talosagaina ai e le alii faipule mai Aua ia Faimealelei Anthony Fu’e Allen se ripoti mai le Matagaluega o Galuega Lautele, i tulaga o galuega fa’aleleia i auala, auvai, auala laupapa ma taligalu mo le Fagaloa.

 

Na taua e le alii faipule e faapea, o lea ua amata ni isi o galuega mo vaega sa faaleagaina i le galulolo e pei o le auala laupapa i Leone, ae mo totonu lava ia o le Fagaloa, amata mai i Fagaalu e oo atu i Aua, e tele vaega sa faaleagaina e le i faia lava i ai se galuega e pei o auvai ma taligalu ina ia puipuia ai le toe aafia o afioaga i le galu.

 

Saunoa Faimealelei e faapea, ua fiu e faalogo i le tali a le Ofisa o Galuega Lautele, fai mai o lo o faagasolo pea lava galuega, ae o lenei lava ua lata i le 5 tausaga talu ona tuana’i le galulolo e le i faia lava ni galuega i le Fagaloa.

 

O le iloiloga a le maota o sui i le aso Tofi o le vaiaso nei ma le Faatonusili o le Ofisa o Galuega a le malo, o le a faamanino atili ai lenei mataupu.