PILI E AVEA AI MA SOLITULAFONO LE TAU FA’A MATA’U

Ua i luma o le maota o sui le pili mo se tulafono tau faaofi e faaulutalaina, o se pili e avea ai ma solitulafono le faia o uiga tau faamata’u.

I le tino o le tulafono o lo o taua ai le tulaga lea, e avea ma solitulafono lea gaioiga pe afai e faatinoina e se tagata, i se auala na te faia ai ni folafolaga tau faamata’u i se isi tagata, o le a faaoo ia te ia se leaga, se manu’a matuia poo le oti fo’i, po o le folafola fo’i i ai o se gaioiga e faaaoga ai se a’upega e ono oo ai le oti i lea tagata, poo se mea fo’i e foliga mai o se a’upega mata’utia.

O le solitulafono o le faia o uiga tau faamata’u i le tulaga muamua, o se solitulafono D i le faatulagaina o solitulafono mamafa, sei vagana ua faia e se tagata nei gaioiga faasaga i se leoleo, poo se ofisa o lo o gafa ma le tausia o le filemu, e pei o se Satini o le Fono Faitulafono, atoa ai ma se leoleo o lo o puipuia Faamasino o Tulafono Tau Galuega (ALJ), ona avea loa lea o lea solitulafono o se solitulafono mamafa i le vaega C.

O le solitulafono mamafa i le vaega C, e mafai ona faasala ai se tasi i le toese mo le umi e le silia i le 7 tausaga, pe faasala fo’i i le salatupe e le silia i le $5,000, pe faasala fo’i i faasalaga uma ia e lua, ae o le solitulafono mamafa i le vaega D, e mafai ona faasala ai se tasi i le toese mo le umi e le silia i le 5 tausaga, pe faasala fo’i i le salatupe e le silia i le $5,000, pe faasala fo’i i faasalaga uma ia e lua.

Ae mo le tagata na te soliina le tulafono o le tau fa’amata’u i le tulaga lua, na te faia pe afai na te faafefeina se isi tagata ma lona lagona fefe, e ala i lona faailoa i se tagata o le a ia faaoo le oti ia te ia, poo se leaga fo’i e ala i lona faatino i ai o se gaioiga matuia.

O le tau faamata’u i le tulaga lua, o se solitulafono A i le faatulagaina o solitulafono mama, lea e mafai ona faasala ai se tasi i le toese mo le umi e tasi le tausaga, pe faasala foi i le salatupe e le silia i le $1,000, pe faasala fo’i i faasalaga uma ia e lua.

PASIA SENATE LE LISI A TE’O MA LE MALO

O le taeao ananafi na pasia ai e le Senate le toe faaauauina o le lisi i le va o le malo ma Te’o J. Fuavai & Sons mo le isi 30 tausaga, e ala i le teena e le Senate o le i’ugafono sa faaulu e pasia ai le toe faaopoopo o tausaga o le lisi.

O le lisi lenei ina ua faatoa sainia e i lalo mai o le 10 tausaga le umi, ma sa fuafua e mae’a i le tausaga e 2022, peita’i ua finagalo le aiga o le afioga ia Aumoeualogo ia toe faaopoopo tausaga o le lisi ina ia oo atu i le 30 tausaga, o le mafuaaga lena sa latou talosagaina ai loa le malo mo le toe faaopoopoina o tausaga o le lisi mo le fanua i Atuu o lo o latou lisi mai le malo.

O le fanua a le malo o lo o lisi atu i le afioga a Aumoeualogo e tusa ma le 0.217 eka, ma o lo o totogiina atu e le pisinisi i le malo le tupe e $300 i le masina mo le lisi.

TOFIA REV. KALEPO AVEA MA TOTINO KOMITI SIKOLASIPI

Ua i luma o le Fono Faitulafono tofiga a le alii kovana ia Lolo Matalasi Moliga, mo le avea o le susuga ia Rev. Kalepo Vaitautolu e avea ma totino o le Komiti Faafoe o Fesoasoani tau tupe mo fanau aoga a le malo.

I se tusi a Lolo i taitai o le fono i le aso 11 Mati 2014, sa ia taua ai le tele o le agavaa o lo o ia Rev. Kalepo e mafai ai ona avea o ia ma totino o lenei Komiti Faafoe taua a le malo, faavae mai lea i lona agavaa mai galuega sa galue muamua ai.

Na taua e Lolo e faapea, o Rev. Kalepo sa galue i le Matagaluega o Galuega Lautele a le malo atoa ai ma le Matagaluega o Tupe, o ia fo’i o se faifeau faaaloalogia i totonu o le atunuu, i le Ekalesia EFKAS mai Vaitogi.

Ua taoto atu nei i le Komiti o Aoga a le maota o sui tofiga a le kovana mo Rev. Kalepo, e faatulaga i ai se aso e valaauina ai se iloiloga.