Ads by Google Ads by Google

Tala otooto mai le Fono Faitulafono

SAUNI LE SENATE E FESILIGIA LE TEUTUPE A LE MALO

 

O le aso Tofi o le vaiaso nei lea ua fa’atulaga e le komiti o le Paketi a le maota maualuga, o le a feiloa’i ai ma le Teutupe a le malo ia Dr. Falema’o Phil Pili, mo le fesiligiaina o ia i ni isi o mataupu tau tupe a le malo, aemaise ai lava le tupe na maua mai e le malo i le lafoga o totogi e 2%, lea na faamoemoe e tuuina atu mo le falema’i o le LBJ, a’o lea ua maua i ripoti ua fa’aaoga e le malo e totogi ai isi ana aitalafu.

 

E ese mai i le mataupu o le lafoga o totogi e 2%, ua sauni fo’i le komiti e fesiligia le Teutupe i isi mataupu, e pei o tupe na totoe mai i le tausaga tupe e 2013, lea sa tuuina atu e toe faapolokalame mai e le Fono i le aofaiga e $4.3 miliona, a’o lea ua toe talosaga atu i le fono e faapolokalame mai na o le $625,000 e fa’aleleia ai auala i le itu i Sasa’e o Tutuila.

 

O le mataupu i le 2% mo le falema’i, e le i nofo lelei i finagalo o afioga i senatoa i le vaiaso na te’a nei, ina ua tauaao e le maota maualuga se ripoti mai le Teutupe, o lo o taua ai le fa’aalu e le malo o se vaega tupe tele mai le lafoga e 2% e totogi ai isi pili a le malo, ae o le tupe lea ua maea ona fa’atulafonoina e ave mo le falema’i, ona ave lea o le isi 50% e faatupe ai gaioiga a le falema’i, ae ave le isi 50% e faatupe ai le polokalame e auina ai gasegase i fafo mo togafitiga.

 

O lo o fia malamalama fo’i afioga i senatoa i le mataupu e faatatau i le tupe o lo o maua mai i le Maliliega o le Tapaa (Tobacco Settlement).

 

Na taua e le afioga i le alii senatoa ia Laolagi Fonoti Savali Vaeao o le taitai komiti a le maota maualuga, afai ua maea ona pasia le tulafono e faasoasoa ai le faaaogaina o le tupe e maua mai i le lafoga e 2%, e le tatau la i le malo ona faaaoga le tupe i auala e le o taua i le tulafono.

 

AUALA MO SULUFAIGA I PAGO PAGO MA FAGATOGO

 

Ua i luma o le komiti o Galuega Lautele a le maota o sui se iugafono malilie faatasi a le maota, e talosagaina ai ma le faaaloalo le alii kovana ina ia faatonu le Faatonusili o Galuega Lautele a le malo, mo le faataotoina o ni fuafuaga aua le atina’eina ma le fausiaina o se auala alo mo Fagatogo, Utulei, Fagaalu ma Pago Pago, e sulufa’i i ai tagata pe a toe tula’i mai se isi fa’alavelave fa’alenatura i le lumana’i.

 

I le agaa o le iugafono malilie faatasi o lo o sainia ai afioga i alii faipule e toa 11 o le maota o sui, o le faalavelave faalenatura lea na aafia ai Amerika Samoa ia Setema 2009, ua atagia mai ai le lamatia o soifua o tagata o lo o alala i le Fagaloa Bay, ona o le maualalo o lea nofoaga.

 

O lea faalavelave na maliliu ai le toatele o soifua, ma ua manino mai ai le tatau lea ona vaavaai loa taitai o le malo i se isi auala e faaleleia ai le lumana’i o tagata o lo o alala i nei afioaga, pe a toe tulai mai se isi faalavelave faalenatura i le lumanai.

 

O le mea moni o lo o maitauina i nofoaga e pei ona taua, e le gata o lo o tele ai pisinisi ae o lo o taoto ai foi ni isi o ofisa tetele o le malo e aofia ai ana meatotino e le tatau ona faamaimauina.

 

O le amata faataoto o galuega mo le fausiaina o lenei galuega tele, o se auala lea o le a atagia mai ai le aga’i atu o lenei atina’e i se tulaga manuia.

 

O le agaga o le iugafono, e sili lava le puipuia nai lo le tau togafitia.

 

LEAI NI VAILAAU FA’ASAINA O LO O FA’AAOGA I FA’ATOAGA

 

Na faamaonia mai e le Faatonusili o le Ofisa o Fa’atoaga ia Lealao M. Purcell i le Samoa News, e leai ni vailaau oona o lo o faaaoga e tagata fai faatoaga mai Asia e faaleleia ai a latou fa’atoaga, e pei ona masalomia ai e le toatele.

 

Sa ia taua e faapea, o lo o asia pea e lana aufaigaluega faatoaga o togalaau aina a tagata Asia, ma o lo o faamaonia fo’i le lelei o le tausiaina.

 

Pau le fesoasoani lea ua sauni le malo e faia, o le faatau lea e le Ofisa o le EPA o le masini e su’e ai ituaiga vailaau eseese i totonu o le tino o le fualaau ‘aina, ina ia fa’amaonia ai po o aafia i ni vailaau oona.