Ads by Google Ads by Google

Tala otooto mai le Fono Faitulafono

PASIA PILI TAOFI AI SAUAINA O FANAU

 

Ua pasia nei e le maota maualuga o le senate suiga a le maota o sui i le pili e taofi ai sauga i fanau, ma ua tuuina atu nei lea tulafono taufaaofi i le afioga i le kovana sili mo le sainiaina ina ia aloaia loa le avea ma tulafono.

 

I le tino o le pili e pei ona pasia e maota a lua, o le a avea ma solitulafono le faia o sauaga i fanau laiti, pe afai e iloa lelei e le tagata lana gaioiga ua faia, e aofia ai lona faaoo o manu’aga tuga i le tino o le tama po o le teine i auala e aafia ai lona saogalemu.

 

O ni isi o auala e pei ona taua i le tulafono e aofia ai le titina, kiki po o le ato o le fanau i se isi itu, ma tau aafia ai le tulaga i lana manava, pe aafia fo’i i ni manu’a e ono aafia ai lona ola.

 

E le gata fo’i i lea, o le faaaogaina lea o ni a’upega mata’utia e faaoo ai manu’a i fanau i se tulaga matuia.

 

O le vaiaso na te’a nei na faia ai se iloiloga faapitoa a le Komiti o Faamasinoga a le Senate, e talanoaina ai suiga e pei ona pasiaina nei, i lalo o le taitaiga a le afioga i le alii senatoa ia Soliai Tuipine Fuimaono o le taitai komiti, lea fo’i sa molimau ai le tamaitai loia sili lagolago ia Mitzie Jessop, o ia fo’i lea sa auai i le tusiaina o lenei tulafono.

 

Sa tau i ai lava si popolega i afioga i senatoa ina ua talanoaina lenei tulafono i le tausaga na te’a nei, ona o le popolega i le auala o lo o faaupu ai vaega o le tulafono, ae ina ua faamanino e Jessop tulaga uma o lo o manino i le tulafono, na finagalo ai loa le maota ina ia lagolagoina suiga a le maota o sui.

 

PILI FAATAGA AI ONA FAATAU ITUAIGA FANA MA PULU

 

Ua i luma nei o le maota o sui se tulafono e faaulutalaina, “o se tulafono e faataga ai le faatau, aumaia, faatau atu, faapa ma le lesitalaina o fana ‘ea ma latou pulu i totonu o le teritori.”

 

Afai ae pasia lenei tulafono, o le a mafai ona faatau mai e tagata ma latou umia ituaiga fana eseese ma latou pulu i le teritori.

 

O le tulafono o lo o i ai nei, pau fana o lo o faataga i le tulafono o le ituaiga o le 12, 16, 20 ma le 410, ma o nei foi ituaiga fana e tatau ona laisene muamua ona faatoa mafai lea ona umia e tagata lautele.

 

O lenei tulafono taufaaofi na faaulufale e le afioga i le alii faipule ia Atualevao Gafatasi Afalava, ma ua taoto atu nei i le komiti o le Puipuiga o le Saogalemu Lautele mo lona iloiloina.

 

TAUNUU I LE FONO ISI TOFIGA A LE KOVANA

 

O le vaiaso na te’a nei na faatoa taunuu ai i le Fono Faitulafono nisi o tofiga a le alii kovana ia Lolo Matalasi Moliga, e faamaonia ai tofiga mo ni isi ua ia filifilia e fai ma faatonu o ofisa ma matagaluega a le malo.

 

O ia tofiga e aofia ai le tofia o Talauega Eleasalo Ale e avea ma loia sili a le malo, faapea ai Aliitama Sotoa e avea ma Faatonusili o le Ofisa o le Enetia a le malo (TEO).

 

Na taua e Lolo i lana tusi i taitai o le fono e faapea, ina ua tofia Talauega na te tauaveina le tulaga o le loia sili le tumau, sa ia faatinoina tiute uma e tauave e le loia sili, ma maua ai le avanoa na te pulea ai vaega o loia i totonu o le ofisa o le loia sili.

 

O tausaga e 17 na galue ai Talauega i galuega faaloia i fafo, ua lava lea ma totoe e fesoasoani ai i lana galuega ua tofia i ai o ia, e pei ona taua e Lolo i se vaega o lana tusi.

 

Mo le susuga Ali’itama, na taua e le alii kovana le tele o se agavaa o loo i lenei alo o le atunuu, i tulaga tau i enetia atoa ai ma le sailia o auala e mafai ona faasao mai ai enetia i le atunuu.