FAATAUTO SENATOA ITUMALO SUA #2

O le taeao ananafi na faatauto ai le afioga ia Mata’utia A. Lui Afonotele e avea ma Senatoa o le Itumalo o Sua #2, e sui tulaga i le afioga i le alii senatoa ia Sua Vaiuli Mata’utia ua tuumalo.

A’o le i faataunuuina le sauniga e faatauto ai le alii senatoa, na tofia e le peresetene o le Senate ia Gaoteote Palaie Tofau se Komiti Iloilo a le Senate, latou te ioiloina le faaiuga a le Ofisa o Mataupu Tau Samoa, e ala i le tofiaina o le afioga i le Sa’o Papa e avea ma senatoa o le itumalo.

O le afioga i le sui peresetene ia Nuanuaolefeagaiga S. Nua na taitaia le komiti iloilo, lea foi na aofia ai le afioga i alii senatoa ia Magalei Logovii ma Soliai Tuipine Fuimaono.

E le’i umi ona iloilo e le komiti le faaiuga e tofia ai Mata’utia i le tofi senatoa a le itumalo, ae tuuina atu loa la latou ripoti i luma o le maota maualuga, ina ia aloaia le tofiaina o le Sa’o Papa e ala i le faatautoina o ia.

O le afioga i le alii faamasino lagolago ia Logoai Siaki na faatautoina le alii senatoa, a’o uuina e lona faletua ia Leafatia Te’o Tavai Mata’utia le Tusi Paia.

O le maea ai o le faatautoina o Matautia i le tofi senatoa a lona itumalo, ua atoa ai le toa 16 o sui o le maota maualuga i le taimi nei, ona e le’i taunuu atu i le maota tofiga a le itumalo o Tualauta ma le Maoputasi, e tusa ai o i laua ua tofia e sui tulaga i afioga i senatoa e toalua ua usufono.

O le afioga Matautia sa tautua i vaega au a le malo tele o Amerika talu mai le tausaga e 1973, ae litaea ma’i i le tausaga e 1989 ina ua lavea a’o faatino ai lana tautua i totonu o vaega au a le malo, ma toe fo’i mai ai loa i lona aiga ma tautua i lona aiga, itumalo ma le atunuu.

AMATA LE FONO FAAPITOA A LE KOVANA I LE ASO FARAILE NEI

O le itula e 10:00 i le taeao o le aso Faraile o le vaiaso nei, Setema 27, 2013 ua faatulaga e ta’ita’i o maota e lua a le fono faitulafono, e amata aloaia ai le Fono Faapitoa ua valaau e le alii kovana.

I le maea ai ona feutana’i o le alii peresetene o le senate ma le fofoga fetalai o le maota o sui i le taimi ma le aso e tatau ona amata aloaia ai le fono faapitoa a le kovana, na faia ai loa le faaiuga o le a aloaia le taimi e pei ona taua e le kovana i lana tusi e tatau ona amata ai le fono faapitoa mo le umi e le sili atu i le 20 aso.

O le taeao nei i le itula e 8:30 o le a tatala ai le aofia a le Senate ma le Maota o Sui, mo le faamaea aloaiaina o le Tauaofiaga lona lua o le nofoaiga 33 a le Fono Faitulafono, i le tuana’i ai o aso fono e 45.

E na o le fa mataupu ua fuafua le kovana e tuuina atu mo lana fono faapitoa, ma ua i ai le faamoemoe e tatau ona taunuu i luma o le fono ia mataupu i le aso a’o lumana’i ai le tatala aloaiaina o le fono faapitoa i le aso a taeao.

TAUNUU ISI TOFIGA A LE KOVANA I LUMA O LE FONO

O ananafi na taunuu ai i luma o le maota o sui tofiga a le kovana sili mo i latou e to’aiva ua ia tofia e avea ma totino o le Komisi o Fuafuaga a le Teritori, ma ua taoto atu i le Komiti o Tulafono a le maota o sui, lea o lo o taitaifono ai le sui fofoga fetalai ia Iaulualo Talia Faafetai lenei iugafono mo lona iloiloina.

Na taua e le alii kovana ia Lolo Matalasi Moliga i lana tusi i taitai o le fono e faapea, o i latou e toaiva ua ia tofia, o le a fai ma sui o Itumalo ma Pisinisi tua latou te faia fuafuaga mo le manuia o le teritori.

O i latou e to’aiva ua tofia e aofia ai Meleagi Suitonu Chapman; Puaatuaa Onosai Vaa; Malepeai Setu; Gi Malala; Andra Samoa; Tauai P. Suiaunoa; Ngaire Ho Ching ma Aaron Forsgren, ma e le’i faatulagaina se aso e iloiloina ai e le komiti suafa o i latou nei.