TEENA SENATE TOFIGA KOVANA MO JONES MA PA’U

 Ua toe teena fo’i e le Senate tofiga a le kovana sili mo Pa’u Roy Ausage ma Timothy Jones, ina ua mae’a le palota ananafi ma tula’i mai ai le fa’aiuga, e ta’i 4-9 le palota na teena ai suafa a i laua nei.

I lalo o le tulafono, afai e teena e le fono se tofiga a le kovana mo le taimi muamua, e mafai ona toe tuuina atu e le kovana le suafa o le ua teena mo le taimi lona lua ina ia toe iloilo e le Fono, ae a toe teena loa e le Fono i le taimi lona lua, e le mafai ona toe faaulu nei suafa.

O Pa’u ma Jones na pasia a le maota o sui ae ae na teena e le Senate i le Tauaofiaga a le Fono ua mavae atu ae peita’i, na toe faaulu e le kovana o la suafa e toe iloilo e le Fono.

O le vaiaso na te’a na pasia ai e le maota o sui na o le suafa o Pa’u ae teena Jones, peitai na toe talia e le maota le mau ina ia toe tuuina atu le suafa o Jones i totonu e toe faia i ai sa latou fa’aiuga, ma e oo mai lava i le taimi nei e le’i toe tuuina atu lava le suafa o Jones e toe palota i ai afioga i faipule.

I luma o le maota maualuga, e le’i toe faia se iloiloga mo Pa’u ma Jones e fesiligia ai o la aagavaa, ae na faamanino e le peresetene o le senate ia Gaoteote Palaie Tofau e faapea, ua uma ona fesiligia e le komiti agavaa a i laua nei i le taimi muamua, pau le tulaga o lo o totoe o le tuuina atu o la igoa e palota i ai afioga i senatoa.

Na taua e Lolo Matalasi Moliga i sana tusi i ta’ita’i o le fono e tusa ai o lona tofiaina o Pa’u ma Jones, o i laua nei ua i ai le tomai ma le agava’a faapitoa e faatino ai galuega ua tofia i ai o ia e le faigamalo.

O Pa’u na tofia e avea ma Faatonusili o le Matagaluega o Tupulaga Talavou ma Tama’ita’i, ae o Jones na tofia e avea ma Faatonusili o le Ofisa o le Enetia a le malo.

VALOIA TEUTUPE SIITIA TUPE MAUA FAALOTOIFALE A LE MALO

I le amata aloaia ai o le iloiloga tu’ufa’atasi a le Fono Faitulafono i le taeao ananafi, mo le talanoaina lea o le Paketi a le malo mo le Tausagga Tupe fou 2014, na valoia ai e le Teutupe a le malo ia Falema’o ‘Phil’ Pili le si’itia o tupe maua fa’alotoifale a le malo i le aofa’i e 17miliona, mai le 6miliona e pei ona fuafuaina e maua i le tausaga tupe lenei 2013.

Ina ua fesiligia e sui o le komiti le Teutupe po o fea e fa’avae mai ai lana molimau i le si’itia lea o tupe maua a le malo i lafoga a pisinisi ma tagata faigaluega mo le tausaga tupe fou, na fa’amanino ai e Falema’o e fa’apea, e 6miliona le tupe na valoia e le malo e tatau ona maua mai lafoga a pisinisi ma tagata faigaluega i le tausaga tupe lenei 2013, ae tusa ai ma fa’amaumauga a le Ofisa o Tupe ua i ai nei talu mai le masina na te’a nei, ua tusa nei ma le 13miliona ua maea ona ao e le malo a’o lea e toe tasi le masina o lo o totoe o le tausaga tupe lenei.

MANINO PAKETI PULEGA UAFU NI ISI O TUPE FAAOPOOPO MO LE MALO

Na manino i le iloiloga o le Paketi a le Pulega o Taulaga ma Uafu i le vaiaso nei, le mafai lea e le Matagaluega ona ao ni isi o vaega tupe faaopoopo mo le malo, e mafua mai i le lisi a le konekarate o le McConnell Dowell ma lana masini vili ma’a lea o lo o i totonu o le fanua o lo o i ai le malae vaalele i Tafuna.

Na taua e le Faatonusili o le Matagaluega o Taulaga ma Malae vaalele e faapea, i totonu o le masina talu ai, e i le va o le $13,000 ma le $15,000 na maua mai e le matagaluega mai le lisi lea, e mafua mai ina ua tele galuega faaleleia mo auala sa manaomia ai le ma’a o lo o vili mai i fanua o le malo.

Na fautuaina e le afioga i le alii Senatoa ia Magalei Logovii le tamaitai faatonu ina ia silasila toto’a pea i le lisi ina ia mautinoa e penefiti mai ai le malo ma maua mai ai ni isi alagatupe faaopoopo e faatino ai isi atina’e.