Tala otooto mai le Fono Faitulafono

FAATAUNUU ILOILOGA FAIPULE MA KOMITI O KOLISI MA IUNIVESITE

 

O le taeao nei lea ua faamoemoe e feiloa’i ai le Komiti o Aoga a le Maota o Sui, ma le Komiti o Kolisi ma Iunivesite na tofia e le kovana, mo le iloiloina o tofiga e pei ona filifilia i ai i latou e le tofa i le tootoo ia Lolo Matalasi Moliga.

 

O le Aso Tofi na te’a nei na faatulaga e faataunuuina ai lea iloiloga, i lalo o le ta’ita’iga a le afioga i le ta’ita’i komiti ia Vaetasi Tu’umolimoli Saena Moliga, peita’i o le taimi fo’i lea o lo o faia ai le iloiloga a lea komiti ma le komiti o Aoga a le Senate.

 

O ni isi o mataupu ua sauni alii faipule e fesiligia i le taeao nei o tulaga e pei ona faamanuiaina ai le Kolisi Tuufaatasi a le atunuu (ASCC) mo le aveina o faailoga mo le umi e fa tausaga (BA), aemaise ai o ni isi o auala e faaleleia ai tulaga o a’oa’oga i totonu o le teritori.

 

TAULIMAINA E LE FONO TOFIGA MO TUAOLO E AVEA MA KOMESINA PALOTA

 

O le vaiaso na te’a nei na fa’aulufale ai i luma o le Fono Faitulafono se i’ugafono e faamaonia ai le tofiga a le kovana sili mo Tuaolo M. Fruean, e avea ma Komesina o le Ofisa Sili o Palota a le atunuu.

 

I se tusi a le afioga i le kovana sili ia Lolo Matalasi Moliga i ta’ita’i o le Fono i le aso 8 o Iulai 2013, sa ia taua ai le talafeagai ona agava’a o Tuaolo mo le tauaveina o lenei tofiga mo le isi tolu tausaga, e afua atu i le taimi e faamaonia ai o ia.

 

Na taua e Lolo i ta’ita’i o le fono e faapea, o Tuaolo, o se ta’ita’i faaaloalogia faaleaganu’u, e tele lona tomai masani  o lo o i ai e aoga mo le galuega, ma o se tasi fo’i sa vea ma faipule i le maota o sui, faapea ai ma le tofi senatoa i le maota maualuga ma sa avea fo’i o ia ma Fa’amasino i le Fa’amasinoga Maualuga a Amerika Samoa mo le tele o tausaga.

 

Na taua e le alii kovana e faapea, o le tomai masani a Tuaolo i lala uma e tolu o le faigamalo atoa ai ma le avea o ia ma ta’ita’i faaleaganuu, ua tele ai lona agavaa i le feagai ai ma lu’itau o lenei galuega.

 

 Na faai’u le tusi a Lolo i lona talosagaina o ta’ita’i o le fono ina ia latou iloiloina ma le toto’a agava’a o Tuaolo ma ia pasia o ia e avea ma Komesina o Ofisa Sili o Palota a le malo.

 

O le Aso Lulu o le vaiaso nei lea ua faatulaga e faia ai le iloiloga a le komiti o le Faagaioiga o le Malo a le maota o sui, mo lenei tofiga i lalo o le ta’ita’iga a le ta’ita’i komiti ia Faimealelei Anthony Fu’e Allen.

 

PASIA I’UGAFONO AVATU AI LE FAAMALO IA JOANNA NUNAN O LE MALO TELE

 

O le vaiaso na te’a nei na pasia ai e le Fono Faitulafono sana i’ugafono malilie faatasi, e tuu atu ai le agaga faafetai ma le faamalo i le tama’ita’i Kapeteni ia Joanna Nunan o le malo tele o Amerika, i lana tautua le faalogologo tiga sa ofoina mai mo Amerika Samoa i le tele o tausaga.

 

O Joanna e galue i le vaega a le US Coast Guard a le malo tele, ma o ia lea na fa’atuina se matati’a o le aumaia o ni moliaga tau i le le tausia lelei o le si’osi’omaga faasaga i ni va’a fagota i Amerika Samoa, ona o le fa’alavelave lea na gogoto ai i le taulaga i Fagatogo ni va’a fagota ia Iuni 2012, ma masa’a ai le ova ma le 26,000 kalone suau’u i le sami.

 

E tele ni isi o matati’a na faatutu e Cpt. Joanna mo Amerika Samoa, e ala i le faaaogaina o lona tofiga o se sui o le US Coast Guard, sa galulue soosoo tauau fo’i ma ni isi o ofisa o le malo o Amerika Samoa mo le tuuina mai o faamatalaga e faatatau i le tau, aemaise lava i taimi e tulaga faaletonu ai le tau i Amerika Samoa nei.

 

O ni isi o vaega sa malosi ai le fesoasoani a lenei tama’ita’i mo Amerika Samoa, o le toe faaleleia lea o le sootaga a Amerika Samoa ma ni isi o lala o le malo feterale, mo le tuuina mai o vaega tupe e fesaosoani ai i le faaleleia o tulaga tau i le puipuiga i luga o le sami.

 

E talitonu le Fono Faitulafono, o le tele o gaioiga sa faia e lenei tama’ita’i ua manuia ai Amerika Samoa.

 

O lenei i’ugafono na tauaao atu ia Cpt Joanna i le sauniga o le sisigafu’a ua mavae atu i le masina o Aperila, peita’i o lea faatoa faaulufale ma pasia e le Fono Faitulafono.

Comment Here