MANA’OMIA LE SAOGALEMU I LUGA O AUALA A LE MALO

Ua talosagaina e le afioga i le alii senatoa mai Saole ia Saole Mila le Komiti o Galuega a le maota, ina ia fautuaina le Matagaluega o Galuega Lautele a le malo, ina ia saili se auala e aveese ai laau o lo o falala i luga o le alatele a le malo, manu e le’i mae’a le fausiaina o auala fou i le itu i Sasa’e o le motu lea ua amata faataoto i le taimi nei.

Na taua e le afioga Saole i le taimi o folafolaga a le maota maualuga ananafi e faapea, ua mananaia le faataotoina o galuega mo le fausia o auala i le itu i Sasa’e, pau le faafitauli, o lo tele laau e pei o niu o lo o falala i luga o le auala, ma e ono avea lea ma itu e lamatia ai se ola o se tasi pe faaleagaina ai fo’i se taavale, pe a oo i le taimi e pau ifo ai se popo mai luga o niu nei, po o se laau fo’i e pau i luga o le auala.

“E taua tele le mataupu lenei aua e aafia ai le malo i se taimi mulimuli ane, pe afai e tula’i mai se faalavelave ma aafia ai se soifua o se tagata, ae lelei le tapena atu i le taimi lenei manu o lo o lava le taimi e faatino ai suiga nei,” o le fautuaga lea a le alii senatoa ia Saole.

Ua fautuaina e le sui peresetene o le maota maualuga ia Nuanuaolefeagaiga S. Nua le taitaifono o le komiti o Galuega a le maota maualuga ia Alo Faauuga, ina ia silasila toto’a i lenei mataupu taua.

FAUTUAINA SENATOA INA IA LAGOLAGO I LE ASO FANAU STARKIST

Ua talosagaina e le afioga i le ali’i senatoa ia Alo Fa’auuga le mamalu o afioga i Senatoa, ina ia tuu atu la latou lagolago e sapaia ai le faamanatuina o le 50 tausaga talu ona faavae le kamupani i’a a le StarKist i le masina fou, ma faailoa atu ai le lagolagoina e le Fono o le tautua a lenei kamupani, o se tasi o kamupani o lo o tele sona sao i le tamaoaiga o le atunuu.

O le saunoaga a le alii senatoa mai Fagasa, na faavae lea i luga o tusi valaaulia ua maea ona tufatufaina atu i sui o le fono, e valaaulia ai i latou ina ia auai i le faamanatuina o le aso fanau a le kamupani.

“E le taua tupe po o ni mea tatou te tuuina atu, pau le itu taua ia faailoa la tatou lagolago atoa ai ma le tatou talisapaia o le tautua sa ofoina mai e lenei kamupani mo le atunuu ma le malo,” o le saunoaga lea a le alii senatoa.

O le amataga o le tausaga nei na amata faatino mai ai polokalame eseese a le kamupani e pei o taaloga ma tauvaga pese faasamoa, e tomua ai le faalauiloaina o le latou faamoemoe i le amataga o le masina fou o Aokuso.

Na taua e se sui o le kamupani i le Samoa News e faapea, ua sauni le pulega a le kamupani mo le faamanatuina o le atoaga o lona 50 tausaga talu ona tatala le tautua a le StarKist i Amerika Samoa.