Tala otooto mai le Fono Faitulafono

FIA MALAMALAMA SENATE FUAFUAGA TRI MARINE

O le aso Lua o le vaiaso nei, o a taeao lea, ua faamoemoe ai le komiti o le Paketi a le Senate latou te fesiligia ai le pulega a le kamupani i’a o le Tri Marine, e tusa ai o a latou fuafuaga lea o loo taua i totonu o le Paketi a le malo mo le tausaga tupe 2013.

Saunoa le taitaifono o le komiti o le Paketi a le Senate ia Lemanu Peleti Mauga i luma o le maota maualuga i le vaiaso na te’a nei, e tatau ona fesiligia le pulega a le kamupani ina ia faamalamalama atu i le maota, poo a tonu a latou fuafuaga ia ua faailoa i le malo, ae fia fo’i se aofai o ni a latou tagata faigaluega ua faamoemoe e faa faigaluega i le tausaga fou.

I le paketi a le malo mo le tausaga tupe fou, ua valoia ai le mafai e le malo ona ao le tusa ma le $77 miliona mai tupe lotoifale, ma o lea aofaiga o loo aofia ai le $52.1 miliona e maua mai i lafoga.

O lafoga ia e aofia ai lafoga mai tagata faigaluega i le aofai e $6 miliona, lafoga i tupe maua a tagata i le aofai e $25 miliona, lafoga i oloa lautele i le aofai e $18 miliona ma le lafoga e maua mai apainu suamalie i le aofai e $2 miliona.

E pei ona silafia, o le kamupani fou o le Tri Marine, o le kamupani lea ua sui tulaga i le kamupani i’a o le COS Samoa Packing ua tapuni, peitai talu lava ona ulufale mai i le atunuu, e le’i iloga lava ona toatele nisi ua mafai ona galulue ai, ona o loo galulue pea le kamupani mo le tau faamautuina o fuafuaga uma mo ana galuega, ona faatoa tatala ai loa lea o le avanoa i tagata e saili galuega atu ai.

FESILIGIA FUAFUAGA A LE VAEGA TOSO VAA

A maea le iloiloga a le komiti o le Paketi a le Senate i le aso Lua, ona sosoo ai loa lea ma le latou iloiloga i le aso Lulu, lea o le a fesiligia ai le Komiti Faafoe a le Vaega Tosovaa a le malo i Satala, mo le faamaninoina lea o le tulaga o a latou tupe maua, lea foi ua valoia e le malo o le a mafai ona fesoasoani ai i ana tupe maua mo le tausaga tupe fou.

E pei ona silafia, o le masina o Me o le tausaga na te’a nei na amata tauaveina ai e le malo le Vaega Tosovaa i Satala, ma ua maitauina tulaga manuia i ana galuega faatino, aemaise ai o ana tupe maua, e pei ona manino i molimau a sui o le latou komiti faafoe i soo se taimi e fesiligia ai e le Fono.

E $100,000 le tupe faasili a le Vaega Tosovaa ua latou valoia e ono mafai ona maua, pe afai e maea le tausaga tupe tuai lenei 2012, lea ua faamoemoe e faamuta i le aso 30 Setema 2012.

E le gata i le tulaga o tupe maua a le Vaega Tosovaa lea ua fuafua le komiti e fesiligia, ae ua manatu foi latou te fesiligia le mafuaaga ua ala ai ona maualuga le latou paketi mo le tausaga tupe fou.

Na taua e le alii kovana i lana tusi i taitai o le fono e faapea, o se tasi o tulaga manuia ma le alualu i luma i le tamaoaiga o le atunuu, o le faaopoopoina lea o galuega fou mai pisinisi tua e aofia ai kamupani i’a atoa ai ma kamupani laiti, aemaise ai o le faaopoopoina lea o tagata faigaluega i le Vaega Tosovaa.

Saunoa Togiola Tulafono e faapea, o le toatele o tagata sa galulue i lalo o le kamupani lea sa latou faafoeina le Vaega Tosovaa i tausaga ua mavae, ua toe faa faigaluegaina uma e le malo ina ua latou tauaveina le galuega, ma ua oo atu nei i le 42 le aofai o tagata faigaluega i le Vaega Tosovaa i Satala i le taimi nei.

FA*ATULAGA LE ISI ILOILOGA A LE KOMITI SUESUE SENATE

E foliga mai ua maea le iloiloga sa alo atu i ai le Komiti Suesue a le Senate e uiga i le mataupu e faatatau i le faatauina mai o le vaa toso vaa o le Sailele ma Lagisi mai le nonogatupe e $20 miliona a le malo, ae o lea ua agai atu le komiti mo le suesueina o le mataupu e uiga i le $1.2 miliona lea na taua i ni ripoti na auina atu i se faletupe i Vietnam.

E pei ona silafia, o le mataupu e uiga i le $1.2 miliona o loo gugulu ai le atunuu, na tulai mai i le aso 31 Aokuso 2011, ina ua maua i faamaumauga le aveese mai o se tupe mai totonu o teugatupe a le malo i le Faletupe o Hawaii, ae auina atu i se faletupe i Vietnam.

E tusa ai ma ripoti ua maua e le SIC o loo taua ai e faapea, o le tupe a le malo e pei ona fesiligia, o loo i ai pea i le faletupe i Vietnam e le’i toe faafoiina mai i Amerika Samoa.

O molimau ua faamoemoe le komiti e valaauina e aofia ai le Teutupe a le malo ia Magalei Logovii, o se tagata faigaluega a le Ofisa o le Tupe, faapea ai ma le pulesili o le Faletupe a Hawaii.

O le aso a taeao lea ua faamoemoe e faataunuuina ai lea iloiloga i luma o le potu fono a le Senate.

Comment Here