FESILIGIA TUIASINA FAAFITAULI TULA’I MAI VAEGA TOSOVA’A

Ua talosagaina e le ali’i senatoa ia Tuiasina S. Esera le komiti o Pulega o Uafu ma Taulaga a le maota maualuga, ina ia faia sa latou asiasiga i le nofoaga o lo o i ai le vaega toso vaa i Satala faapea ai ma le uafu o va’a faila i Malaloa, ona o ni isi o faafitauli o lo o maitauina le tula’i mai ai.

O faafitauli na taua e le alii senatoa o lo o tulai mai i le vaega toso vaa i Satala, e le gata i le paepae solo o u’amea vaega e faatino ai galuega, ova i le ta’i 30 tausaga le matutua o le tele o masini o lo o faaaoga, ae foliga mai foi e tele galuega o lo o moomia le faatino ae le o lava tagata faigaluega.

Ae i le uafu o vaa faila i Malaloa, ua avea le taula ai o va’a fagota lapopo’a ma itu ua ta’e ai se vaega o le uafu, e mafua mai e le o lava pa’u e faapipi’i i le tino o le uafu ina ia va ai le uafu ma le va’a.

“O nofoaga nei e lua o lo o maua mai ai le isi vaega tupe a le malo, ae afai e faatamala i latou o lo o vaavaaiga tulaga nei i le tausia lelei o mea totino a le malo, lona uiga o le a toe faaalu e le malo isi tupe e toe faaleleia ai vaega nei pe a faaletonu,” o le saunoaga lea a le alii senatoa i le Samoa News.

Ae na taua e se sui o le vaega toso vaa i Satala e faapea, e mafua ona paepae solo u’amea i totonu o le lotoa, o lo o faagasolo galuega mo le toe faafouina o totonu o le vaega tosovaa i le taimi nei, e aofia ai ma le suiina o filifili o lo o faaaoga e toso mai ai va’a mo le toe faaleleia.

O le faanaunauga o le pulega a le vaega toso vaa e pei ona taua i se latou ripoti sa tuuina atu i le kovana, afai e toe faafou vaega tuai e aofia ai ma masini o lo o i ai, ona faigofie lea ona faatino galuega e fesoasoani ai i tupe maua mo le faalapotopotoga.

FAUTUA MAUGA I LE FONO INA IA FAAAUAU PEA LE FAATAUA O LE AGANUU

A’o tele ai finagalo ma manatu o ni isi o sui o le fono atoa ai ma ta’ita’i faaleaganu’u i le faatauaina lea o le mataupu e faatatau i le faaauauina o saoga mea (toga ma tupe) i taimi o fa’alavelave, na taua ai e le afioga i le alii Senatoa ia Mauga Tasi Asuega le tatau pea lea i le fono ma tagata uma o le atunuu ona faaauau le faatauaina o tu ma agaifanua a Samoa, aua o iina o lo o taofo ai le aganuu ma le agaifanua.

Saunoa le alii senatoa ia Mauga e faapea, e mafua ona faia e Samoa faalavelave, e le gata o se tasi lea o vaega o lana agaifanua, ae o iina e faailoa atu ai lona alofa ma le tausi aiga i le atunuu ma le lalolagi.

“O le aganuu ma le agaifanua a Samoa e faavae i le alofa, lona uiga, o mea tatou te faia e le faatuaoia, ae fai ona o le alofa ia Samoa ma lana aganuu,” o le saunoaga lea a le alii senatoa.

E talitonu le ali’i senatoa, tusa lava pe laititi se mea e ofo atu e le Samoa mo faalavelave, e aofia ai foi ma faaaloaloga i Faafeaiga, o le itu taua ia fai i le loto malie ma le alofa.

SAUNI FAIPULE E FESILIGIA LE VAEGA A LE ASPA

O le itula e 8:30 i le taeao nei lea ua faatulaga e faia ai le iloiloga a le Komiti o le ASPA/TEO a le maota o sui ma sui o le Faalapotopotoga o le Eletise ma le Suavai a le malo (ASPA), ona o le mataupu e uiga i le suia o le nofoaga o le a fausia ai le nofoaga autu o le eletise (power plant) mo le atunuu.

O le pulesili o le ASPA ia Utu Abe Malae ua valaaulia e auai i le iloiloga, lea foi o le a maua ai le avanoa o afioga i ali’i faipule e fesiligia ai o ia e tusa ai o nei fesuiaiga.

O le mataupu na tofu atu i luma o le maota o sui i le vaiaso nei, ina ua tula’i ma le ali’i faipule mai Aua ia Faimealelei Anthony Fu’e Allen ma faailoa sona finagalo le fiafia, i le faaiuga ua faia e le ASPA ina ia sitia le fausiaina o le nofoaga autu mo le latou power plant mai Satala i Tafuna, ona e to’atele atu le faitau aofa’i o tagata o le atunuu o lo o alala i le nofoaga lea nai lo le itu i sisifo o le motu nei.

Na taua e le alii faipule mai Aua e faapea, e taua tele le fausia o le power plant a le ASPA i lona nofoaga tuai sa i ai i Satala, e le gata o lo o tele ai pisinisi ae o lo o i ai foi ma le pisinisi e pito sili ona to’atele tagata faigaluega i totonu o le teritori o lo o galulue ai, le kamupani i’a a le StarKist Samoa.