Version:1.0 StartHTML:0000000215 EndHTML:0000023576 StartFragment:0000002467 EndFragment:0000023540 SourceURL:file://localhost/Users/pattypage/Desktop/04_05_13%20LE%20LALI/4.%20%2004_05%20AF%20tala%20fono.rtf

(w/ banner)

TAUNUU FONO TOFIGA KOVANA MO KOMITI FAAFOE FALETUPE ATINA’E

Ua i luma o le Fono Faitulafono tofiga a le kovana sili mo i latou e to’alima o le a avea ma totino o le Komiti Faafoe o le Faletupe o Atina’e a Amerika Samoa, e aofia ai le afioga i le alii senatoa ia Nuanuaolefeagaiga T. Saoluaga; le afioga i le alii faipule ia Iaulualo Faafetai Talia; Fiapa’ipa’i Fruean; Muagututi’a Leapei Fa’aola ma Malepeai Setu.

I sana tusi i taitai o le fono faitulafono na taua ai e Lolo e faapea, o i latou ua ia tofia o lo o i ai le tomai ma le agava’a faapitoa e mafai ai ona latou tauaveina tiute tauave mo le komiti faafoe o le Faletupe.

O i latou e toatolu o lo o i ai le silafia i mataupu tau tulafono ma le to’alua o ni tagata faipisinisi i le atunuu.

PASIA PILI FAAOPOOPO AI TOTINO KOMITI FEMALAGAAIGA

Na fulisia le maota maualuga e pasia le pili lea ua pasia e le maota o sui faatasi ma suiga, e faaopoopo ai le aofai o totino o le Komiti Faafoe a le Ofisa o Femalagaaiga mai le toa 5 i le toa 7.

O le pili na faaulu e le alii kovana, ia sui le tulafono o lo o i ai mai le toa 5 i le toa 9, ma ia le silia foi ma le toa 5 sui o le komiti o Nesionale ma Sitiseni a le malo tele, e tupuga mai Amerika Samoa.

O suiga a le maota o sui lea foi na pasia e le senate ina ua faitau faalua le pili ananafi, ia suia le aofai o le komiti mai le toa 5 i le toa 7, ma ia avea uma foi totino o le komiti o Nesionale ma Sitiseni o le Iunaite Setete, e tupuga mai i Amerika Samoa.

TELE AUALA ITUMALO TUALAUTA UA AGA’I INA MAE’A ONA TOE FAALELEIA

E ui i tulaga faaletonu sa i ai le tele o auala i totonu o le itumalo o Tualauta, peita’i o lea ua aga’i atu ina mae’a galuega mo le toe faaleleia o ni isi o auala, e pei ona saunoa i ai le afioga i le tamaitai faipule ia Vui Florence Vaili Saulo i luma o le maota i le vaiaso nei.

Na taua e Vui e faapea, o lo o galulue pea le Matagaluega mo le faaleleia o ni isi o auala i totonu o le itumalo, peitai o ni isi o auala o lo o ia fesoasoani e faaleleia, e ala i le totogiina o uta ma le totogiina o masini a ofisa o Galuega a le malo e faaleleia ai.

O le agaga o le tamaitai faipule e le o le fia faailoa o sana tautua, ae o le manatu ina ia fesoasoani i le tulaga pagatia o lo o feagai ma le itumalo aemaise ai o le atunuu o lo o feafioa’i i auala o lo o i totonu o le itumalo.

Na faafetaia e Vui le faatonusili o le matagaluega o galuega a le malo, ona o le fesoasoani o lo o mafai ona tuuina atu mo le itumalo aemaise ai o le atunuu atoa.

PASIA KOMITI PAKETI MAOTA SUI SUIGA SENATE PILI TUPE KOVANA

Ua pasia e le komiti o le paketi a le maota o sui suiga a le senate i le pili tupe sa faaulu e le kovana, e faasoasoa atu ai le $5miliona e faatupe ai ni isi o manaoga a le malo, atoa ai ma le totogiina o ni isi o faaiuga a le faamasinoga, faapea ai tupe sa totogi atu mo totogi faaiu a tagata ae le’i faamaonia atu e le fono.

O le faaiuga a le komiti e pasia suiga a le senate, sa faia lea i le taimi na faia ai sa latou iloiloga puupuu i le aso ananafi, i lalo o le taitaiga a afioga i le alii faipule ia Timusa Lam Yuen o le ta’ita’i komiti.

O suiga e pei ona pasia e le senate i le latou pili, e aveese mai ai le $100,000 mai le $300,000 o lo o fuafua le kovana e faatupe ai galuega mo le toe faaleleia o faleaoga i le atunuu, ae tuu atu e faaleleia ai le vaa o le MV Sili.

Saunoa le tamaitai faipule ia Vui Florence Vaili Saulo e faapea, na te lagolagoina le manaoga ina ia faaleleia le vaa mo Manu’a, ae o le aveese mai o le tupe ua fuafua mo le Ofisa o Aoga, ae o lea o lo o tele faaletonu i ni isi o faleaoga i le atunuu, o se itu lea e atugalu ai lona loto.

O le toatele o sui o le komiti sa latou lagolagoina le faamoemoe ina ia tuuina atu le tupe e faaleleia ai le vaa a Manu’a, pau lo latou finagalo, manaia ae saili mai i se isi alagatupe nai lo le aveese mai i le tupe ua faatulaga mo le faaleleia o faleaoga.

Na taua e Timusa i le Samoa News e faapea, o se tasi o popolega sa ia te ia ma le komiti, ina ne’i faaletonu le pili pe afai ae toe fai i ai ni isi suiga a le komiti, ae o lea ua toe tolu aso maea e tauaofiaga a le fono.

I le faaiuga o le iloiloga a le komiti, sa latou pasia ai loa ina ia talia suiga a le senate, ma ua faamoemoe o le taeao nei e ripoti ai i luma o le maota o sui le faaiuga a le komiti mo se finagalo o le maota, i le taimi e faitau faalua ai le pili a le senate.