PASIA FAGAFAGA AVEA MA FAATONU OFISA FAASALALAUGA KVZK-TV

Ua aloaia nei le avea o le tofa a Fagafaga Daniel Langkilde e avea ma Faatonusili o le Ofisa o Faasalalauga a le malo, le KVZK-TV, ina ua pasia o ia e le senate i le vaiaso na tea nei i le palota e 11-6. O le masina na te’a nei na pasia ai e le maota o sui tofiga a le kovana mo Fagafaga.

O Fagafaga o se tasi o tamalii o le atunuu ua loa lana tautua i le malo faapea ai ma tulaga tau pisinisi.

FAAFETAIA FONO FUAFUAGA KOVANA MO LE FAAMAMAINA ATUNUU

Ua faaalia e taitai o le fono faitulafono lo la faafetaia o se faaiuga ua faia e le alii kovana sili, e faaaoga ai tagata faigaluega a le malo e fesoasoani i le faamamaina o tafatafa o le auala ma vaega eseese o le atunuu, e pei ona vaaia i le aso Tofi o le vaiaso na te’a nei.

Saunoa le alii peresetene o le senate ia Gaoteote Palaie Tofau e faapea, o galulue ai o tagata faigaluega a le malo ma o latou taitai e faamama laufanua o le atunuu, o le ata vaaia lea o le galulue faatasi o taitai ma le atunuu atoa e fai so latou sao mo le faamatagofieina o Amerika Samoa.

O le itula e 10:00 i le aso Tofi na te’a nei na vaaia ai le pisi o vaega o le auala e amata mai i Matuu e oo atu i Aua, i tagata faigaluega a le malo e aofia ai ma Faatonusili sa galulue mo le faamamaina o le otaota i tafatafa o le alatele.

O lea auaunaga e faia i masina uma lava e pei ona saunoa le alii kovana ia Lolo Matalasi Moliga i le fono a le kapeneta na faatoa maea atu nei.

TAUNUU ISI TOFIGA A LE KOVANA I LUMA  O LE FONO

O le taeao ananafi na taunuu ai i le Fono Faitulafono isi tofiga a le kovana, mo i latou o le     a avea ma totino o Komiti Faafoe a le Falema’i o le LBJ ma le Faalapotopotoga o le Eletise ma le Suavai (ASPA)

O le masina na te’a nei na faalauiloa ai e le alii kovana sili ia Lolo Matalasi Moliga ana tofiga nei, peitai o lea faatoa tuuina atu i luma o le Fono.

O le komiti faafoe a le LBJ e aofia ai Sandra King-Young, o ia foi lea o le taitai komiti; Dr. Tofaeono Victor Williams; le afioga i le alii faipule ia Faimealelei Anthony Fu’e Allen; Leiataua Leuga Turner; ma le tofa ia Mase Akapo.

I se tusi a le alii kovana i taitai o le fono i le aso 26 Mati 2013 sa ia taua ai e faapea, o i latou e toalua ua ia tofia e avea ma totino o le komiti faafoe a le falema’i, ua i ai le agavaa ma le tomai e faatinoina ai le galuega, ma ua ia talitonuina foi le agavaa o lo o ia te i latou.

Fai mai Lolo, o Sandra o se tamaitai faipisinisi i le atunuu. O Dr. Tofaeono o se alii fomai ua malolo litaea mai le galuega faafoma’i, ma ua lava lona tomai i le galuega a le falemai.

O Leiataua ua tele tausaga o galue i mataupu tau i le soifua maloloina, e malamalama foi i mataupu o lo o faatupe mai e le feterale, ae o Faimealelei ma Akapo, o lo o i ai lo la tomai i mataupu tau Fono Faitulafono.

Mo le komiti faafoe a le ASPA, ua tofia i ai le susuga ia Perelini Perelini e fai ma taitaifono; o isi sui o le komiti faafoe e aofia ai Peter Crispin, Isabel Hudson; Daniel King ma le sui tuai ia Vaa Sokelati Fala.

I le tusi a Lolo i taitai o le fono sa ia taua ai e faapea, o i latou ua ia tofia e avea ma totino o le komiti faafoe a le ASPA, ua atoa uma i ai le tomai ma le agavaa e manaomia mo le galuega.

Mo se faataitaiga o le susuga ia Perelini sa galue i le faalapotopotoga o le Eletise a Samoa ma le CNMI. O Crispin, Hudson ma King o ni tagata faipisinisi ua i ai le tomai i mataupu e faatatau i le ASPA, ma le susuga Fala ua tele tausaga o tautua i le komiti faafoe a le ASPA.

O le komiti faafoe a le ASPA e pasia pe afai e faamaonia uma e maota e lua, peitai o le komiti faafoe a le LBJ, e na o le Senate e faamaoniaina.

TALOSAGA TOEAINA INA IA FAALELEIA AUALA O LO O FAALETONU

A’o faagasolo ai galuega mo le faaleleia o auala i totonu o le atunuu, ua talosagaina ai e le alii faipule mai Manu’a ia Toeaina Faufano Autele le tatau lea ona faaleleia atu ai ma ni isi o auala o lo o ogatotonu i ai ni isi o femalagaaiga i le atunuu, peitai o lo o maitauina pea le faaletonu e pei o le va iti o auala.

O ni isi o auala na taua e Toeaina i lana saunoaga o le auala o lo o aga’i atu i totonu o Kanana Fou ma Petesa.

O atugaluga o le alii faipule, o auala nei o lo o uia e le toatele o le atunuu, peitai o le faafitauli o lo o i ai, e va iti e le ofi ai ni taavale se lua i le taimi e tasi.

Fai mai le alii faipule, afai o fanua o aiga o lo o fai ma faafitauli ua mafua ai ona va iti auala nei, e tatau ona galulue le malo e fofo lea faafitauli, ina ia mautinoa e saogalemu tagata o lo o feoai i luga o le alatele.

Na lagolagoina e le afioga i le alii fofoga fetalai ia Savali Talavou Ale le finagalo o Toeaina, ma ia fautuaina ai loa le taitai komiti o Galuega a le maota ia Atualevao Gafatasi Afalava, ina ia silasila toto’a i le mataupu lenei, ina ne’i alu tupe a le malo e fausia ai auala ae tulai mai ai ni faaletonu.