Ads by Google Ads by Google

Tala otooto mai le Fono Faitulafono

TALI LE ASPA I LE TALOSAGA A AUNUU

 

E ui i tulaga pagatia sa i ai le motu o Aunuu i le faaletonu o le suavai ma le eletise, peitai na faamaonia e le taitaifono o le komiti a le Faalapotopotoga o le Eletise ma le Suavai (ASPA) ia Puletuimalo D. Koko ananafi le toe faaauau o lenei auaunaga mo Aunuu, ina ua vave tali atu i ai le ASPA.

 

O le faafitauli sa feagai ma Aunuu e pei ona saunoa le alii faipule ia Talaimatai Elisara Su’a, mo le motusia soo lea o le eletise atoa ai ma le faaletonu o le suavai taumafa mo le motu, peitai ina ua maua le tala fiafia ananafi, na tulai ai le alii faipule ia Su’a ma faafetaia le afioga ia Utu Abe Malae ma le ofisa a le ASPA, ona o le talia o se talosaga sa tuuina atu mo lona itumalo.

 

Ae na taua e Puletuimalo, o lo o faaauau pea galuega fesoasoani a le ASPA mo le motu o Tutuila, Aunuu ma Manu’a i le taimi nei, ae le o faapito i se toatasi.

 

PASIA FAIPULE TULAFONO FAAOPOOPO AI TOTINO KOMITI FEMALAGAAIGA

 

O ananafi na pasia ai e le maota o sui i le faitauga faatolu le latou tulafono e faaopoopo ai le aofai o totino o le Komiti Faafoe a le Ofisa o Femalagaaiga, mai le to’a 5 o lo o i ai nei i le to’a 7.

 

O le tulafono na faaulu e le kovana sili ia Lolo Matalasi Moliga i luma o le fono, ia sui mai le to’a 5 o lo o i ai i le to’a 9, peitai o lea toe sui e le maota o sui i le to’a 7.

 

E 13-2 le aofai o le palota na pasia ai e le maota o sui lenei tulafono taufaaofi, ma ua tuuina atu nei i le maota maualuga mo sa latou faaiuga.

 

Ae pei ona silafia, o le lua vaiaso talu ai na teena ai e le maota maualuga la latou tulafono e tutusa ma le tulafono lea a le maota o sui, e faaopoopo ai totino o le komiti faafoe mai le toa 5 i le toa 9.

 

Na mafua ona teena e le senate le tulafono lenei, ona sa aofia ai i se vaega o le tulafono le faaupuga faapea, mai le toa 9 o totino o le komiti faafoe o le a i ai, ia le silia ma le toa 5 o i latou nei o Nesionale ma Sitiseni o le malo tele o Amerika e tupuga mai i Amerika Samoa.

 

O popolega o le senate i lenei tulafono, afai na o le toa 5 totino o le komiti o Nesionale ma Sitiseni o le malo tele, lona uiga ua tatala e le tulafono le avanoa i tagata e le o ni Nesionala poo Sitiseni o le malo tele e avea ai ma totino o lenei komiti faafoe taua.

 

ALOAIA E LE FONO TOTINO E TO’A 5 KOMITI FAAFOE OFISA FEMALAGAAIGA

 

Ua aloaia nei le avea o totino e toalima na tofi e le kovana e avea ma totino o le komiti faafoe a le Ofisa o Femalagaaiga, ina ua pasia e le Senate i latou uma nei i le taeao ananafi.

 

O le palota a le senate e aofia ai le 17-1 mo Frank Gaisoa; 14-4 mo Sherry Butler; 16-2 mo Rev. Anetere’a Misioka; 12-6 mo Moetulu’i Sipili Fuiava; ma le 13-5 mo Fareti ‘Fred’ Mamea.

 

O le lua vaiaso talu ai na pasia uma ai e le maota o sui i latou nei ina ua maea ona o latou fesiligia agavaa ma tomai o i latou nei e faatino ai le galuega.

 

Ao lei pasia e le senate suafa o i latou nei, sa maua le avanoa e fesiligia ai e le komiti o Mataupu Tau Tulafono a le maota e fesiligia ai i latou uma nei.

 

O le lua vaiaso talu ai na fesiligia ai e le komiti le isi toatolu o molimau, ae o ananafi na faatoa maua ai le avanoa e fesiligia ai Gaisoa ma Rev. Misioka.

 

O le tele o saunoaga a afioga i alii senatoa i le taimi o le iloiloga, o le fautuaina lea o Gaisoa ma Rev. Misioka ina ia faamaoni i le faatinoina o le galuega, ma ia faamalosia tulafono tau femalagaaiga mo tagata mai fafo ua fau ma soloi i le atunuu.

 

Saunoa le alii senatoa ia Tuiasina S. Esera e faapea, o se tasi o faafitauli o lo o ia maitauina i le taimi nei, e aumai e tagata o le atunuu tagata mai Asia e faafoe pisinisi ma le faamoemoe, ia maua ai ni galuega a alo ma fanau o le atunuu, ae o le taimi lava e ola ma tulaga lelei ai pisinisi o lo o pulea e tagata Asia, latou te eu eu ese ai fanau a le atunuu ae faa faigaluega na latou tagata mai Asia.

 

“Na mafua ona faavae pisinisi ia maua ai galuega mo tagata o le atunuu, ae le na o le nofonofo ma matamata nai o tatou tagata ae tafili saunoa tagata mai Asia i avanoa faigaluega,” o le saunoaga lea a Tuiasina.

 

Na saunoa le alii senatoa ia LeAtualevao S. Asifoa e faapea, na mafua ona tatala e le tulafono pisinisi latou te sponsor tagata mai fafo, ina ia mafai ai ona aumai le tomai ma le agavaa e le o maua i Amerika Samoa, peitai o le faafitauli ua ia maitauina, ua oo lava i tagata fai faatoaga ua aumai mai Saina ma Kolea e galulue i le teritori, ma ua afaina ai le tulafono i tulaga nei.

 

Na fautua e alii senatoa sui o le komiti ina ia silasila toto’a i faafitauli nei, ina ia mautinoa e le toe tulai mai i le taimi latou te nofoia ai nofoa o le komiti faafoe.

 

Ae na taua e Gaisoa e faapea, afai lava e fai mai le tulafono e toe faafoi le tagata mai fafo ona ua le tusa ai lona nofo i le atunuu ma le tulafono, e usitai lava le latou komiti i le tulafono.