Ads by Google Ads by Google

Tala otooto mai le Fono Faitulafono

PASIA SENATE SUIGA I LE TULAFONO TOFIA AI TAUSI MAVAEGA LITAEA

 

Ua pasia e le maota maualuga se tulafono e faatulaga ai le aofai o totino o le au tausi mavaega mo le litaea, mai le 9 i le 7 e pei ona i ai nei.

 

O le tulafono o lo o i ai nei, e to’alima totino o le au tausi mavaega o lo o i ai e aofia ai le toalua e tofia mai e le kovana.

 

Ae o le tulafono fou lea na tuuina mai i le Ofisa o le alii kovana, ia toaiva totino o le au tausi mavaega, toalua e tofia mai e le kovana, o i latou foi o ni totino o le tupe o le litaea, ae o le isi toafitu e le tofia mai e le kovana, e le o i latou o ni totino o le tupe o le litaea, ao ni isi e i ai le tomai i mea tau pisinisi.

 

Ae o suiga lea ua faia e le senate i le tulafono ma ua latou pasia, e lava le to’afitu o totino o le au tausi mavaega o le litaea, to’afa sui e tofia mai e le kovana mai totino o le tupe o le litaea, ae toatolu e le o ni totino o le litaea.

 

Na taua e le alii senatoa ia Magalei Logovii i le taimi na fetufaa’i ai le maota e faatatau i suiga nei, e tatau ona toe vaavaai i le aofai o sui ia e tofia mai i fafo atu o tagata o lo o i ai i le tupe o le litaea, ina ne’i i ai se faaletonu e tulai mai i tupe o le litaea, ona avea lea ma to’atuga mo tupulaga talavou o lo o aga’i mai i luga o latou olaga tautua mo le malo.

 

FESILIGIA MATAUPU I TAGATA O LO O NOFO AITALAFU MALO

 

Ua talosagaina e le alii faipule mai Manu’a ia Toeaina Faufano Autele le Fofoga Fetalai o le maota o sui, ina ia silasila toto’a i le mataupu e faatatau i tagata faigaluega a le malo atoa ai ma isi tagatanuu o lo o nofo aitalafu i le malo i le taimi nei.

 

Na taua e Toeaina e faapea, o se tasi lenei o mataupu o lo o maitauina le tele i ai o tusitusiga a le au faasalalau atoa ai ma manatu o le atunuu, ona o aitalafu a ni isi o tagatanuu e le o mafai ona totogia i le malo.

 

O le itu pito sili ona taua e pei ona talosagaina e Toeaina, o le maua o se avanoa e fesiligia ai e faipule le malo, po o a ni a latou auala  ua faataoto e mafai ai ona toe totogi atu e tagata a latou aitalafu i le malo.

 

“O lea e pagatia le malo i le taimi nei i le itu tau tupe, ma o se avanoa lelei lenei e maua ai e le malo ni isi o tupe o lo o aitalafu ai tagata e fesoasoani ai i lona tamaoaiga ua faaletonu,” o se vaega lea o le saunoaga a le alii faipule.

 

E lei faapupula e Toeaina po o a aitalafu o lo o faatatau i ai lana saunoaga, ae na taua e ni isi o faipule e faapea, o ni isi o aitalafu o lo o maitauina le faatupulaia i le malo i le taimi nei, o lisi o fanua a le malo lea o lo o lisi atu i tagata ma pisinisi, lea ua maitauina le toatele o tagata e le o faamaoni i le totogia.

 

Ua fautuaina e le alii fofoga fetalai ia Savali Talavou Ale le taitaifono o le komiti o le paketi ia Timusa Tini Lam Yuen, ina ia silasila toto’a i lenei mataupu pe ono valaau se iloiloga.

 

PASIA E FAIPULE SUIGA TULAFONO FAAOPOOPO AI TOTINO KOMITI FEMALAGAAIGA

 

Ua pasia e le maota o sui a latou suiga i le tulafono na faaulu e le alii kovana, ina ia sui le  aofai o totino o le Komiti o Femalagaaiga mai le to’alima o i ai nei, i le to’a 9.

 

Ae ina ua mae’a se iloiloga faapitoa sa faatautaia e le komiti o Mataupu Tau Tulafono a le maota o sui i le taeao ananafi, na pasia ai le suiga ina ia sui mai le to’a 9 i le to’a 7.

 

I le tulafono fou na tuuina mai i le ofisa o le alii kovana o lo o taua ai, mai le toa 9 o sui o le komiti faafoe, ia le silia ma le toalima o i latou nei o “nesionale poo sitiseni o le Iunaite Setete e tupuga mai i Amerika Samoa,” peitai o lea suiga ua avesea a le maota o sui, a ia toe foi lava le tulafono i le tulaga tuai o lo o i ai, o sui uma o le komiti e toa 7 o i latou o nesionale poo sitiseni o le Iunaite Setete o Amerika e tupuga mai i Amerika Samoa.

 

O le isi suiga a le komiti e pei ona pasia ananafi, tusa lava pe ua maea le taimi e galue ai le totino i totonu o le komiti, o le a agavaa pea ona galue o ia sei vagana ua tofia mai e le kovana se isi sui fou ma faamaonia e le fono, ona faatoa muta lea o lana auaunaga.

 

Na taua e le alii faipule ia Faimealelei Anthony Fue Allen lona lagolagoina o le tulafono tuai o lo o i ai, ina ia faatumauina pea totino o le komiti i le toa 5, ona o se tasi o faigata o lo o feagai ma mea nei o komiti,  o le fiu lea e tau sue totino o le komiti e atoa i ai le kalama i taimi o fonotaga.

 

O le taeao nei lea ua faamoemoe e faitau tolu ai le tulafono al e maota o sui mo lona paisiaina. O le afioga i le taitai komiti ia Vui Florence Vaili Saulo na faatautaia le iloiloga a le komiti i le taeao ananafi, o ia foi o se totino o le komiti faafoe a le vaega o Femalagaaiga o lo o i ai nei.

 

Ae pei ona silafia, o le lua vaiaso talu ai na faia ai le faaiuga a le senate ina ia latou teena le tulafono lea e tutusa lelei ma le tulafono a le maota o sui, ona o atugaluga o afioga i Senatoa, ina nei avea le tatala o le avanoa i tagata e le o ni nesionale poo sitiseni o le Iunaite Setete e avea ai ma totino o le Komiti Faafoe, ma itu e afaina ai mataupu tau Femalagaaiga.

 

MANAOMIA SE FESOASOANI MO FALEAOGA I SISIFO

 

Ua talosagaina e ni isi o sui o le Falelima i Sisifo i totonu o le Fono Faitulafono se fesoasoani a le malo mo le faaleleia o faleaoga i le itu i sisifo o le atunuu, lea o lo o maitauina le tele o se galuega fesoasoani e fia faia i ai.

 

Na taua e le tamaitai faipule ia Vui Florence Vaili Saulo, o lo o i ai tulaga faaletonu i fale  taele ma ni isi potu aoga i le aoga maualuga a Tafuna, e manaomia ai se fesoasoani faanatinati a le malo ma le ofisa o aoga.

 

Ae na taua e le alii senatoa ia Tuiasina S.Esera ananafi e faapea, e faapena foi i le aoga maualuga a Leone, o lo o tele foi faaletonu ma faafitauli o lo o feagai ma le aoga a Leone i le taimi nei, i le faaletonu lea o ni isi o faleaoga e oo lava foi i le malae.

 

Na taua foi e Tuiasina e faapea, e le gata i le aoga a Leone, ae faapena foi i isi aoga i totonu o le falelima i Sisifo, o lo o manaomia ni galuega mo le faaleleia o vaega o lo o faaletonu.

 

Ua taoto atu le mataupu i faleaoga i komiti o aoga a maota e lua, mo le faatulagaina lea o ni iloiloga ma le ofisa o aoga a le malo e faatatau i lenei mataupu.