Tala otooto mai le Fono Faitulafono
FEAGAI FALELIMA I SASA’E MA FAALETONU SUAVAI TAUMAFA
Na fa’aalia e le alii Faipule ia Fatulegae’e Palepoi Mauga i le taeao ananafi, ni isi o faaletonu ua feagai ma ni afioaga i le Falelima i Sasa’e, e pei o le tulaga le manuia o le suavai, aemaise o le faatanoa vai o lo o i Alao, lea ua le toe i ai se suavai ma ua faalagolago tagata o le nuu i le suavai e maua mai i le timu.
Saunoa le alii Faipule, ua manaomia lava se fesoasoani a le Faalapotopotoga o le Eletise ma le Sauvai (ASPA) mo lona nu’u.
Ae na taua e ni isi o tagata mai le Falelima i Sasa’e i le Samoa News, o le isi faaletonu o lo o feagai ma le tele o afioaga, o le le mafai ona inu le suavai a le ASPA, ona ua malosi tele le manogi o le vailaau o lo o maua ai.
Ua sauni le komiti o le ASPA a le maota o sui i lalo o le taitaiga a le alii faipule ia Puletuimalo D. Koko e saili se faamatalaga mai le ASPA e faatatau i lenei faafitauli.
Saunoa Puletuimalo e faapea, o lo o galulue pea le ASPA mo le faaleleia o lana tautua i le atunuu, e le gata o le suavai ae faapea foi i moli eletise e pei ona vaaia ai le tele o moli i ni isi o nuu ua toe faaola.
Pau le faafitauli ua molimauina e le ASPA, o lo o faaaoga e tupulaga fana meme’i e tafana ai moli o le auala ma mafua ai ona faaleagaina.
Ua talosagaina afioga i faipule ina ia galulue faatasi ma Pulenuu o a latou itumalo, e vaavaai faaletonu e pei ona molimauina i fanau talavou.
TUSI FAAFETAI VUI FLORENCE SAULO I LE ALII KOVANA
O le vave tali atu o le alii kovana i se talosaga sa tuuina atu mo le faaleleia o se vaega o auala i le itumalo o Tualauta, na mafua ai ona tusia e le afioga i le tamaitai faipule ia Vui Florence Vaili Saulo sana tusi faafetai i le alii kovana ia Lolo Matalasi Moligai.
Na taua e Vui i lana tusi ia Lolo e faapea, ua uma ona logoina o ia e le Faatonusili o le Matagaluega o Galuega a le malo, e faatatau i le galuega o le auala i Tafeta e oo atu i Tafuna, lea e le o toe mamao se taimi ona amataina lea, ma ua i ai foi le tupe e faatinoina ai e le konekarate fau auala a le McConnell lenei galuega tele.
E le gata i le agaga faafetai a Vui, ae sa tuuina atu ai foi sana fautuaga mo se ata faataoto i le tulaga e tatau ona i ai le auala o lo o aga’i atu i le malae vaalele lea ua amata ona fausia i le taimi nei, atoa ai ma le aga’i atu i Fagaima.
Saunoa Vui e faapea, ao faagasolo ai galuega mo le auala i le malae vaalele, o se tulaga lelei foi pe afai ae amata ai loa foi ma galuega mo le auala e amata atu i Tafeta ma faasolo atu ai i Tafuna.
Fai mai Vui, o lea ua agai atu i le vaitaimi pisi mo faauuga a fanau aoga, ma o le auala lea e ui atu i Fagaima, o le isi lea auala e pito sili ona pisi ai taavale, e ao foi ona oo atu i lea vaitau ua tulaga lelei tapenaga mo le faaleleia o omoomo o lo o faaletonu ai isi vaega o ia auala.
O le agaga o le tamaitai faipule, ia mafai ona faaleleia auala mo femalagaaiga saogalemu a le atunuu i soo se taimi o le aso.
FAAFETAIA FALELIMA I SASA’E GALUEGA FESOASOANI A LE ALII KOVANA
Na fai le afioga i le alii faipule ia Puleleiite Tufele Li’amatua Jr ma sui o faipule uma o le Falelima i Sasa’e e faaleoina le agaga faafetai faasaga i le alii kovana ma le faigamalo, ona o le galuega ua mafai ona foia ai le faafitauli sa feagai ma le aoga maualuga i Fagaitua mo le tele o aso ua tuana’i atu.
Na taua e le alii faipule e faapea, o le taeao ananafi na ia molimauina ai se asiasiga a le alii kovana i Fagaitua, ma ua maua foi ripoti i le konekarate o lo o galulue ai i le aoga mo le faaleleia o le ea malulu ma isi faaletonu sa feagai ma le aoga.
O le masina na te’a nei na folasia ai e le alii faipule ia Fatulegaee Palepoi Mauga le mataupu lenei i luma o le maota, peitai e le’i faatulagaina se iloiloga e fesiligia ai le Ofisa o Aoga, ae i le fono a le kapeneta sa faia i le vaiaso na te’a nei, na faalauiloa ai e le alii kovana ia Lolo Matalasi Moliga e faapea, ua i ai le konekarate o lo o galulue mo le toe faaleleia o le ea malulu a Fagaitua, faatasi ai ma lona faatonuina o le Ofisa o Galuega ma le Ofisa o Aoga a le malo ina ia galulue e foia le faafitauli o lo o tulai mai i le aoga i Fagaitua, afai e le mafai o le a ia tapunia le aoga.
Ina ua fesiligia le Ofisa o le puleaoga i Fagaitua ananafi, na faamaonia mai ai e se sui o le aoga e le’i finagalo e faailoa lona suafa e faapea, ua maea ona toe faaleleia tulaga sa faaletonu i le aoga e pei o le ea malulu ma fale taele.
SAUNI KOMITI PAKETI MAOTA E LUA E ILOILO LE PILI TUPE $5MILIONA
O le itula e 11:00 i le taeao nei lea ua faatulaga e faia ai le iloiloga a le komiti o le Paketi a le senate, mo le iloiloina lea o le pili tupe a le kovana e talosagaina ai le $5miliona e totogi ai aitalafu ma ni isi o manaoga a le malo o lo o i ai.
O le Teutupe a le malo ia Falema’o Phil Ma’o ma le Faatonusili o le Ofisa o le Paketi ia Catherine Aigamaua-Saelua o le a molimau i lenei tulafono taufaaofi, ae o le alii senatoa ia Laolagi Fonoti Savali Vaeao o le a faatautaia le iloiloga.
I le maota o sui, o le komiti o le Paketi a le maota lea ua taoto atu i ai le pili tupe lenei, i lalo o le taitaiga a le afioga i le alii faipule ia Timusa Tini Lam Yuen o le taitai komiti.