Ads by Google Ads by Google

Tala otooto mai le Fono Faitulafono

TALOSAGAINA TEUTUPE TOE FAAAUAU TAUTUA SA MAUA TAGATA FAIGALUEGA MALO

 

Ua i luma o le maota o sui se iugafono e talosagaina ai  le kovana sili, ina ia fautuaina le Teutupe a le malo e faaauau pea le tautua sa mafai ona maua e ni isi o tagata faigaluega a le malo, o le toese mai o tupe mai a latou siaki e totogi ai a latou pili ma isi aitalafu.

 

I le tino o le iugafono o lo o taua ai e faapea, i se taimi e lei mamao atu na faasalalau mai ai le taofia faafuasei e le malo o lea tautua ma ua avea lea tulaga ma tulaga o le a motusia faafuasei ai se auaunaga ua uma ona osi feagaiga ai tagata faigaluega a le malo ma pisinisi tua.

 

O le isi itu taua o lenei auaunaga, ina ia mafai ai ona tumau le tauleleia o le igoa o le tagata o lo o aitalafu i le pisinisi, ma o le taofia ai la o lenei tautua, e na o pisinisi tua o le a aafia ai, ae o isi tautua i tupe toese mai siaki o le silia i le tasi o vae tolu o tagata faigaluega o lo o aofia i lenei auaunaga, o lo o tumau pea lea mo vaega e pei o pili vai, eletise ma le telefoni.

 

E talitonu le iugafono a le maota o sui, o le toe faaauauina o lenei auaunaga o le a mafai ai foi ona toe sologa lelei atu ai ma le auaunaga mo nai pisinisi tua.

 

E toafitu faipule o lo o sainia i lenei iugafono. O  i latou ia e aofia ai Iaulualo Faafetai Talia, Atualevao Gafatasi Afalava, Timusa Tini Lam Yuen, Maugaoalii Leapai Tusipa Anoai, Faimealelei Anthony Fu’e Allen, Puletuimalo Dick Koko, Fatulegae’e Palepoi Mauga ma Talaimatai Elisara Su’a.

 

IUGAFONO E FAAFETAIA AI KOMITI TAUSIMAVAEGA TUPE LITAEA

 

Ua pasia e le maota maualuga sana iugafono e momoli atu ai le faamalo ma le faafetai i le Komiti o Tausimavaega a le Tupe o le Litaea, ona o le tele o tausaga o la latou tautua faamaoni lea ua mafua ai ona tulaga manuia teugatupe a le litaea.

 

O sui o le komiti o lo o aofia i lenei iugafono e aofia ai le taitaifono ia Aleki Sene Sr, Magalei Logovii lea ua avea nei ma senatoa, Faoa Aitofele Sunia, Fanene Morris Scanlan ma Brandt Judy.

 

I se vaega o le iugafono o lo o taua ai e faapea, sa tulaga lelei le pulea ma le tausia o tupe a le litaea sa inivesi mai le tele o tausaga e le komiti, e ui i tulaga faaletonu o le tamaoaiga o le lalolagi sa i ai i le 2008 e oo mai i le 2011, sa mafai lava ona maua le tupe e $19 miliona, ma oo atu ai i le $200 miliona le aofai o lea teugatupe seia oo mai i le 2012.

 

O tulaga lelei o lenei galuega ua malosi ai le tulaga o le tupe a le litaea i le 90%, ma ua tulai mai ai Amerika Samoa i le tulaga 15 mai le aofai e 125 o teugatupe tau penisione o lo o vaavaaia e le Vaega e Pulea Tupe Litaea.

 

O galuega lelei a le komiti ma le alualu i luma o fuafuaga tau tupe a le litaea, ua mafai ai ona faaopoopo le ta’i 2% i siaki a tagata litaea, ona o le tulaga alualu i luma ua i ai le lelei o teugatupe, ma ua vaaia ai le tupe tele o ana teugatupe na tulai mai ai i se tulaga sa lei mafaufauina e oo i ai ia tupe.

 

O le isi foi o ana tautua sa mafai ona ofoina mai e ala i aitalafu a le malo, ma ua alaga tatau ai ona tuuina atu le faafetai e tusa ai o le latou tautua.

 

PASIA CATHERINE AIGAMAUA-SAELUA E AVEA MA FAATONUSILI OFISA PAKETI MALO

 

Ua aloaia nei tofiga a le kovana mo Catherine Dora Aigamaua-Saelua e avea ma Faatonusili o le Ofisa o le Paketi a le malo, ina ua pasia o ia e faipule i le taeao ananafi i le palota e 17-1 .

 

O le faaiuga a faipule e pasia ai Catherine, sa faia lea ina ua maea sa latou iloiloga i le taeao ananafi e fesiligia ai agavaa o le tamaitai faatonu, lea sa faatautaia e le komiti o le Paketi a le maota o sui, i lalo o le taitaiga a le afioga i le alii faipule ia Timusa Tini Lam Yuen.

 

O le toatele o faipule na saunoa i le taimi o le iloiloga, sa taua i a latou saunoaga le lava  tapena o le tamaitai faatonu mo le faatinoina o tiute e pei ona tofia i ai o ia e le kovana, ona o le agavaa ma le tomai ua ia te ia.

 

Sa latou faafetaia le kovana ina ua ia tofia lenei tina e avea ma faatonusili o se tasi o matagaluega taua a le malo.